موضوع بخصوص شهاده mcse

[sasa.magdy]

السلام عليكم ورحمه الله وبركاته
انا ناوي ان شاء الله اخد كورس شبكات mcse
ايه رايكو فيها وليها مستقبل كويس ولا لاء وكمان سهله ولا صعبه و انا كمان لسالي سنه من الدراسه في الجامعه هل من الممكن نسيان الدوره
وياريت لو حد عنده تفاصيل اخري يقولهالي

[sasa.magdy]

ايه يا جماعه محدش عارف يرد عليه ليه انا مش شايف ان الموضوع صعب

[internetworld]

كل شيء سهل طالما انت عايز تتعلم وعندك نيه انك تذاكر بجديه
توكل على الله وبلاش تسوف وتعتمد على اراء الناس اذا عزمت توكل على الله وطل مانت مستنى حد يقولك سهل ولا صعب يبقي انت لسه مش مستعد للكورس
مجال IT مجال متطور بسرعه لا تتخيلها هتفضل مستنى الردود وواحد يكون ناجح يقولك سهل وواحد يكون مذاكر باسفورشور بس وميعرفش اى حاجه يقولك صعب وواحد وواحد وتدخل فمتاهه كبيره انت فى غنى عنها
بس انا عايز حضرتك قبل ماتبدا تاخد الكورس تسال نفسك انت عايز تاخده ليه؟؟؟؟؟؟
لان الاجابه هتفرق فحياتك فرق السماء من الارض
شوف انت اخترت المجال دا ليه .............
وتاكد تماما ان اللى عايز حاجه بيوصلها طول ماعنده صبر وامل وعزيمه واصرار انه يحقق هدفه ويوصل يبقي هيوصل
بالنسبه لانك طالب يبقي اول حاجه تفكر فيها دراستك وفالاجازه تاخد الكورسات واحده واحده وعلى مهلك
بالنسبه لسهوله الكورس
فدى مساله نسبيه تختلف من واحد للتانى حسب قدراتك ومدى اهتمامك بالعلم والتعلم
ومن وجهه نظرى ان الكورس بسيط بس محتاج مجهود وصبر لانه طويل شويه
اما بالنسبه للنسيان
طول منت بتطبق عملى عمرك ماهتنسي وحتى لو افترضنا انك نسيت فلو رجعت تراجع المعلومه من تانى مش هتبقي صعوبتها عليك زى اول مره تتعرف فيها على المعلومه
اما تطبق ازاى وانت مش بتشتغل فالمجال ولسه بتدرس فعندك برنامج رائع اسمه vmware هيقوم معاك باحلى واجب
لو انت مش عندك خلفيه عن الشبكات خالص ومعلوماتك بسيطه فالكمبيوتر يبقي عليك وعلى كورس A+ و N+
تذاكرهم بس ومش تمتحن فيهم هيدولك خلفيه كويسه عن الشبكات وتبدا بيها كورس MCITP الخاص بمايكروسوفت 2008
في خلال السنه اللى انت فيها فالكليه تابع المنتدى واقرى المشاركات اللى فيها مشاكل الاعضاء مع تشغيل السيرفرات حتى لو مش تعرف عنها حاجه اقرى وشوف الناس دى بتتكلم فايه هتستفيد معلومات كويسه
ادخل على مواقع وابحث عن معلومات ودور واتعب شويه
ابدا اسمع كورس 70-270 ودا الخاص ب xp وكورس 70-620 الخاص بالفيستا اسمعهم كدا كانك بتتفرج على مسلسل وانسي حكايه انك تمتحن فيهم لغايه ماتخلص الكليه عشان مش يبقي عليك ضغط عصبي وبدل مايبقي حمل امتحانات الكليه وامتحانات مايكروسوفت كمان
دور كدا على المعلومه بروقان واتمتع بقي بالمعلومات الجديده وشوف نفسك وانت بتنزل الويندوز بطرق جديده وبتعمل شبكه كمبيوترات على برنامج vmware استمتع بالعلم والمعلومات
وبعد ماتخلص الكليه وتنتهى من حكايه الجيش
ابدا بقي بالطحن
ذاكر وادخل امتحن هتلاقى كل المعلومات مش بتفهمها بس لاء دى كمان بتتحفر فدماغك لانك ذاكرت وانت بعيد عن اى ضغط عصبي ولا حتى تفكير فشغل ولا امتحانات
ملحوظه صغيره
حاول انك تذاكر من الكتب بالانجليزي وانك تسمع فيدوهات الانجليزيه
وحط قاعده فحياتك
ان الشروحات العربي مجرد رفاهيه ومش تتعود عليها
لان حياتك بعد كدا تبقي كلها انجليزي مزاكره وتحديث شهادات وممكن تسبق كل الناس طول منت معاك الاساس سليم وهو اللغه ودماغك شغاله وبتحب المجال دا
حط لنفسك برنامج تمشي عليه عشان تقدر تحكم على مدى تقدمك ونجاحك وكمان عشان مش يطول على الوقت وتحس بالملل
افتكر كلامى دا كويس وبعد سنه ان كان لينا عمر نتقابل وتقولنا عملت ايه
اتمنى لك دوام التوفيق والنجاح

[egy_semooo]

أخي الفاضل internetworld لكم أستمتع بقراءة ردودك على كافة المواضيع لكم أستمتع باحترامك لنفسك وللآخرين لكم أستمتع بتواضعك وأنا أعلم أنك على قدر كبير من العلم تقبل من هذه الكلمات من أخ لك في إسلام وجزاك الله ألف خير

[sasa.magdy]

شكرا ليك internetworld كلامك 10/10 وجميل جدااااااااااااا
انا بالفعل حجزت الكورس وهبدا كمان اسبوع كده ان شاء الله
وحكايه اني اركز في دراستي دي انا هركز فيها ومش عاوز ازنق نفسي في اخر سنه ليه علشان الجيش وكده فكرت ان اخدها الصيف ده لان مش ورايه حاجه علشان ميبقاش عليه ضغط زي ما انت بتقول وافصل بين امتحانات الكليه والكورس لانها هتخلص قبلها ان شاء الله وربنا معانا ان شاء الله ونخدم ديننا في حاجه ان شاء الله
وشكرا ليك مره تانيه علي المجهود الرائع ده
وتقبل تحياتي
السلام عليكم ورحمه الله وبركاته