هل تعانى من TE Data مثلى ؟؟

[ŤǾЯŊΛĐф]

أزيكوا يا شباب ، أنا ركبت من حوالى إسبوعين خط 1MB تبع TE Data ، بس لاحظت إن ال Ping مش مستقر ، يعنى الصبح بدرى عادة بيبقى فى حدود 40:60 أما بعد الظهر فحدث ولا حرج ، و على المغرب كده ممكن يعدى ال 2000 مستريح ، المهم كلمت الشركة كذا مرة و قالولى إن الشركة مش بتعترف بال Ping و إن طالما ال Download rate كويس يبقى مالهومش دعوة ، الغريبة إن بعد اليوم اللى هبت فيه العاصفة على مصر (الخميس) الPing كان تمام 24/7 لحد إنهاردة ، عشان كده أنا قررت إنى هفكس من TE Data و أعمل إشتراك مع Link من أول الشهر الجاى لأنى كنت قبل كده فى شبكة مع الجيران Link و مكنش فى نفس المشكلة ، يا ريت يا جماعة لو حد لاحظ نفس المشكلة دى عنده يقول .
*طبعا ال Ping بيأثر على الOnline Games وال Live Streaming .

[Mithrandir]

أحمد زي الحاج أحمد ،،،

[Black-Edition]

الى محيرنى وهيجننى انى مش عارف مين الاحسن :D

احمد ولا الحج احمد :rolleyes:

[Flashy]

أحمد زي الحاج أحمد ،،،

فعلا

الاتنين زي بعض بالضبط متتعبش نفسك و استحمل

ممكن مع تركيب الكابل الجديد في مصر البينج و السرعات تتحسن
هو مش ممكن ده أكيد

[ezz201]

انا مشترك في TE Data وخنقه(ليه تزنق نفسك TE Data هي اللي هتزنقك)
وزمايلي اللي في لينك كرهوا النت لعدم الاستقرار
بس ليه واحد صاحبي مشترك Vodafone ADSL ومبيشتكيش خالص
(ما شاء الله)

[ŤǾЯŊΛĐф]

المشكلة إن الPing بيأثر جامد على ال Online Games و أهم حاجة بالنسبالى ال Live Streaming .

[ALL4US]

انا برده TE Data وموصل خط واحد ميجا لوحدى والداونلود مبيطلعش فوق ال 110 والبينج دايما 300 - 400 واحيانا اكتر .. وفى الصبح بيبقى 250 او اقل شويه ... لدرجه انى بطلت العب اونلاين من 3 سنين تقريبا :eek:
يعنى انت فى نعيم :D .. < هحسدك ..
وعلفكره وزى ما قالولك ... مفيش فرق انا جربت LINK برده ولوحدى وبرده مفرقتش وده بالعكس link مشاكلها اكتر واكتر .. اى نعم البنج كان ثابت 150 او اكتر بشويه لكن الداونلود كان تييييييييييييييت (حذف الرقابه) :mad:

وربنا يسهل ونشوف هيحصل ايه بعد الكابل اللى بيفكروا يعملوه ... (دا اذا عملوه<<)

[Mr.pOPo]

أحمد زي الحاج أحمد ،،،

+1

لافرق بينهم. وانا برضوا بعانى من نفس المشكلة، وكل مره اتصل يقولولى نفس اللى قالوهولك. بس انا سمعت ان المشكلة دى هتنتهى على نص شهر 3، يعنى قول 3\18 او 3\20 ...

[sir.7atem]

الاسكندرية نفس النظام المريوطية نفس النظام اسيوط برضه في بنج بس مش عالي اوي زي اسكندرية و المريوطية

[SeeNoEvil]

انا رأيي مختلف شويه
مشترك في tedata بقالي بتاع 3 سنين او اكتر والسرعه بتوصلي كامله والبينج معظم الوقت كويس جدا
ومفيش مره النت قطع

[White h@cker]

النت فى مصر عموما بقى يخنق خصوصا مع تى-تاتا :mad:


انا رأيي مختلف شويه
مشترك في tedata بقالي بتاع 3 سنين او اكتر والسرعه بتوصلي كامله والبينج معظم الوقت كويس جدا
ومفيش مره النت قطع


يبقى انت الوحيد :D واكيد تقرب لوزير الاتصالات او لمدير شركة تى-تاتا :D

[SeeNoEvil]

مش دايما والله دلوقتي بقا البنج زي الزفت برضو اكتر من 1000

[Aksam75]

انا بقى حكايتى غريبه شويه ...

أنا مشترك فى TEDate من حوالى سنتين على سرعة 512

والبنج كان مبيعلاش عن 200 وساعات بيبقى 135 معظم الوقت ... طبعاً مش هتصدوقو ...

أللى حصل اييه بقى أنى قررت أرفع السرعة من شهر الى 1 ميجا علشان البنج ينخفض أكثر ( شوف الطمع ياأخى ) :D

وأللى حصل صدمه :ah26: ... لاقيت البنج أصبح 400 ثم 800 ثم 1000 ثم 1200 ومين يزود

واتصل بيهم لاقيت رد غريب جداً ... بيقولولى أصل فى بطئ عام فى السنترال هههههههه ...

وأن شاء الله من الأشتراك القادم هرجع تانى لل512 ... بطئ ببطئ ...

[EL-MARIACHY]

والله أنا زيك بالظبط النت من شهر كده بقت يعنى......(مش لاقى كلمه حقيره كافيه) و أنا 1ميجا و بأنزل ب40-50kbs

و كل ما أكلمهم يقولوا لى السنترال فيه مشكله اصبر معانا احنا مافيش حاجه فى ايدينا نعملهالك

[yarny22]

زى ما الاخوة بيقولو احمد زى الحج احمد مفيش فرق خليك مع لينك كويسة

[bebo2005]

+1
لا يوجد فرق بين الشركتين على الإطلاق الخدمه سيئه في Tedata و link أنا ليا صاحبي شغال في لينك بيقولي في عندهم accepted download rate طالما إنت معده خلاص ملهمش دعوه و بالنسبه للواحد ميجا أعتقد الأكسبتيد 50 فيما أكثر

[folelfol]

انا كمان ال ping عندي واقع واقع بقاله كام يووم
انا مشترك مع te-data علي سرعة واحد ميجا

والحق يقال ... انا مشترك من زمااان حوالي 3 سنين وشوية عمر النت (( غير لما حصلت المشكلة بتاعة الكابلات البحرية ده قطع شوية و بعد كده رجع بسرعة بطيئة جدا لغاية ما اتحلت المشكلة ))ما قطع و شغال ال 24 ساعة داونلود بسرعة ثابتة من ايام ما كنت علي سرعة 256 ... و 512 ..... لحد 1 ميجا السرعة بصراحة ثابتة و البينج كان ممتاز ما بيعديش 90

بس الفترة اللي فاتت ده بقي متذبذب

بس لو بتعمل speed test من www.speedtest.net حاول تغير السيرفر غير cairo هتلاقي البينج قل كتير

اكيد ده مشكلة وهتتحل لان البينج اللي فوق ال1000 ده اكيد غير طبيعي ... وسيبك من بتوع خدمة العملاء لان دول معظمهم حافظ مش فاهم

[BionicMan]

https://www.speedtest.net/result/736292476.png (https://www.speedtest.net)

https://www.pingtest.net/result/11744863.png (https://www.pingtest.net)

احب انقل لكم معاناتي مع هذه الشركة

التيست ده متاخد فى نفس الوقت الي عملت فيه المشاركة ديه الساعة 2 بليل يوم الاربعاء

وكما قال الاخوة الافاضل احمد زي عم احمد

وحتي لو عملو الكابل ده برده ولا هيبقي في اي تغيير مجرد عملاء جدد زيادة وبدل ما هتبقي واخدة 70% من سعة الانترنت فى مصر
هتبقي 72% من السعة يعني ولا حاجة

ديه سياسة حقيرة علشان لقو ان سياسة بتاعت عادل ديه الي كانو طالعين فيها فاشلة

لا هم بيطبقوها بردوه بس بطريقة تانية من تحت التربيزة

اه صحيح نسيت النت عندي 1 ميجا لوحدي

[The King2]

يا رب تيجى هيا عليا نص شهر 3 يا شبااااب ، أنا بعااانى من تسحن النت فجراً لحد الظهر و فى الفتره مابين ذلك النت بيكون عامل زى خط تلفون أو خط التلفون أحسن ،

مافيش أخبار جديده عن الكابلات الجديده اللى قالو إنها هاتوصل أول السنه دى :D ؟؟؟؟

[BionicMan]

وديه يوم الخميس الصبح الساعة 9.30

https://www.speedtest.net/result/736567852.png (https://www.speedtest.net)

https://www.pingtest.net/result/11762949.png (https://www.pingtest.net)

الي عايز يعمل داونلود وبراوزينج او حتي لايف ستريمينج يعملوه الصبح اريحله

الواحد بعد كده هيقوم من الفجرية علشان يستمتع بالنت

حسبي الله ونعم الوكيل فى الي في بالي - والله لطلع بطاقة انتخابية عنند فيه

[Mithrandir]

المشكلة تتلخص في مصر عموما كالآتي:

الشركات باعت سعات انترنت أكبر من السعات المتاحة لها أصلا. يعني لو أن السعة المتاحة للشركة 1 جيجابت انترنت فإنها قد تبيع 3 جيجا بت. بمعنى أكثر وضوحا أن الشركات باعت لنا وصلات على هيئة خطوط.

- البنج عالي في جميع سنترالات الجمهورية. قد يصل البنج إلى 40 ثانية والخط غير مشغول ولكن إذا حاولت فتح أي صفحة على الانترنت تجده يقفز إلى ما فوق ال 500 ثانية. وأنت وحدك على الخط.
- الدعم الفني يخبرك مهما كان سنترالك أن المشكلة هي بطء في السنترال وهم صادقون في ذلك لأن السنترال الذي يتحمل 100 مشترك تجد فيه اليوم 250 مشترك ويزيد.
- الكابلان البحريان المصريان الجديدان تقول الأخبار أن تركيبهم سيكون في منتصف العام. أي يمكن انتظار نتائجهم على شهر 8.
- إذا كان خطك لا يعاني من أي مشكلة فلا تغامر برفع أو خفض سرعته. بل اتركه كما هو. الواضح أن سيستم الشركات يعاني من مشكلات فنية كبيرة حتى أن بعض الخطوط أطلب منهم فصلها ويقومون بفصلها فعلا من على السيستم ولكن الخطوط تظل عاملة لدى المشتركين.

يولع النت عالنتيتة عاللي عينتتو عليه.

[Aksam75]

شوفو ياشباب أنا عندى فكره ... عايزين نربى شركه TE Data ...

أولاً أنك تخفض السرعة أو تعليها بيكون من غير مصاريف ...

المصاريف بس فى انك تغير من محدود الى غير محدود او العكس ...

طيب ان رأيى أن كل أللى عنده السرعه 1 ميجا يروح الشركه فى ميعاد انتهاء الأشترك ويطلب تخفيض السرعه الى 512 ...
صدقونى الموضوع ده هيعملهم برجله ... وهيتربو ... :mad:

ولما يصلحو الخدمه وتبقى تمام ساعتها أللى عايز يعلى السرعه الى 1 ميجا يبقى يعليها ...

أصل مش معقول أن أدفع أشتراك 1 ميجا وكأنى شغال على 512 ...
لأن انا كنت مشترك فى الأول على 512 ولما عليت السرعه الى 1 ميجا من شهر مش حاسس بأى فرق ...

أنا شخصياً يوم 10 مارس هينتهى الأشتراك وان شاء الله هخفض السرعه ل512 ...

والله ياجماعه الموضوع ده لو أتعمل هنربى الشركه بس نتفق كلنا

تخيل فى كام واحد مشترك على 1 ميجا لما هيخفضو الأشتراك الى 512 الشركه هتخسر كتير ...

دول عملين موضوع البنج ده علشان يحسسوك أن النت بطئ فتروح تعلى السرعه ... دى شركات نصابه ... :mad:






========

[Mithrandir]

شوفو ياشباب أنا عندى فكره ... عايزين نربى شركه TE Data ...

أولاً أنك تخفض السرعة أو تعليها بيكون من غير مصاريف ...

المصاريف بس فى انك تغير من محدود الى غير محدود او العكس ...

طيب ان رأيى أن كل أللى عنده السرعه 1 ميجا يروح الشركه فى ميعاد انتهاء الأشترك ويطلب تخفيض السرعه الى 512 ...
صدقونى الموضوع ده هيعملهم برجله ... وهيتربو ... :mad:

ولما يصلحو الخدمه وتبقى تمام ساعتها أللى عايز يعلى السرعه الى 1 ميجا يبقى يعليها ...

أصل مش معقول أن أدفع أشتراك 1 ميجا وكأنى شغال على 512 ...
لأن انا كنت مشترك فى الأول على 512 ولما عليت السرعه الى 1 ميجا من شهر مش حاسس بأى فرق ...

أنا شخصياً يوم 10 مارس هينتهى الأشتراك وان شاء الله هخفض السرعه ل512 ...

والله ياجماعه الموضوع ده لو أتعمل هنربى الشركه بس نتفق كلنا

تخيل فى كام واحد مشترك على 1 ميجا لما هيخفضو الأشتراك الى 512 الشركه هتخسر كتير ...

دول عملين موضوع البنج ده علشان يحسسوك أن النت بطئ فتروح تعلى السرعه ... دى شركات نصابه ... :mad:






========


مينفعش. مش هتعمل حاجة. الشركات مش عاملة المشاكل دي بمزاجها. المشاكل دي جاية من سوء تخطيط وطمع.

[Aksam75]

مينفعش. مش هتعمل حاجة. الشركات مش عاملة المشاكل دي بمزاجها. المشاكل دي جاية من سوء تخطيط وطمع.


وانت عرفت منين ان الموضوع مش هيعمل حاجه ...

انت مش خسران حاجه لما هتنزل السرعه من 1 ميجا الى 512 هما أللى هيخسرو ...

وبعدين لو الموضوع معملش حاجه زى مأنت بتقول أبقى ساعتها عليها تانى ل1 ميجا ... الموضوع سهل ... :rolleyes:

وكمان طول ماأحنا سلبيين مفيش حاجه هتتغير ....


=========

[S.O.S]

LINK DOT NET FTW
:D:D
https://www.pingtest.net/result/11766440.png

[Aksam75]

LINK DOT NET FTW



:D:D
https://www.pingtest.net/result/11766440.png







https://dc11.arabsh.com/i/01228/deud9wpniiwg.png (https://arabsh.com)





ياريت تعمل الأختبار على سيرفر القاهره مش على سيرفر Amman ....

عن طريق الموقع ده https://www.speedtest.net/ (https://www.speedtest.net/)

وورينا النتيجه ... :rolleyes:

[BionicMan]

ايه ده يا سوس البينج الرائع ده

انت اكيد بتاخد درس خصوصي فى السنترال صح ؟ :)

قال FTW قاااال

والله ضحكتني يا جدع :D

[Mithrandir]

وانت عرفت منين ان الموضوع مش هيعمل حاجه ...

انت مش خسران حاجه لما هتنزل السرعه من 1 ميجا الى 512 هما أللى هيخسرو ...

وبعدين لو الموضوع معملش حاجه زى مأنت بتقول أبقى ساعتها عليها تانى ل1 ميجا ... الموضوع سهل ... :rolleyes:

وكمان طول ماأحنا سلبيين مفيش حاجه هتتغير ....


=========


ملوش لزمة الاتهام بالسلبية ده. مين فهمك إن لو نزلت السرعة الشركة هتخسر؟ كل شريحة لها نسبة ربح. وكلما زادت الشريحة قلت نسبة الربح.

يعني لنفرض السنترال يتحمل 50 خط بسرعة 1 ميجا و100 خط بسرعة 512 كيلو.
لو باعت الشركة الخطوط كلها 512 فستكسب أكثر من بيعها للخطوط بسرعات 1 ميجا.

وحتى لو افترضنا جدلا إن تقليل السرعة فيه أي سلبيات هتعود عالشركة. الشركة معندهاش الآلية اللي تتلافى بها السلبيات دي دلوئت. يعني سيان عندها تفضل موصل أو تفصل الخط نهائي. لأنها كده كده هتستنا الكابلات الجديدة.

[Aksam75]

ملوش لزمة الاتهام بالسلبية ده. مين فهمك إن لو نزلت السرعة الشركة هتخسر؟ كل شريحة لها نسبة ربح. وكلما زادت الشريحة قلت نسبة الربح.

يعني لنفرض السنترال يتحمل 50 خط بسرعة 1 ميجا و100 خط بسرعة 512 كيلو.
لو باعت الشركة الخطوط كلها 512 فستكسب أكثر من بيعها للخطوط بسرعات 1 ميجا.

وحتى لو افترضنا جدلا إن تقليل السرعة فيه أي سلبيات هتعود عالشركة. الشركة معندهاش الآلية اللي تتلافى بها السلبيات دي دلوئت. يعني سيان عندها تفضل موصل أو تفصل الخط نهائي. لأنها كده كده هتستنا الكابلات الجديدة.



انا لا أتهمك بالسلبيه ... بس كلام ( مفيش حل _ مش هيعمل حاجه _ مفيش شئ هيتغير )

كل الكلام أللى من النوع ده كلام سلبى ...

نعمل حاجه الأول وبعدين نشوف النتائج ...

وزى ماأقولتلك انت مش خسران حاجه واكيد هما خسرانين لأن الموضوع مبيتحسبش زى ماأنت بتقول ...

وياسيدى الفاضل انت مش عايز تجرب أنت حر ...

الموضوع وصل ان أنا حاسس ان سرعة 1 ميجا أصبحت تقريباً زى 512 وده عن تجربه ...

يبقى الواحد حرام يدفع اشتراك 1 ميجا ولايستفيد منه ...


==============

[m.!.x]

انا سمعت انها بتفرق علي حسب السنترال انا في سنترال الهرم وتي داتا احسن بكتير من لينك لان عندي في البيت تي داتا وشغال زي الفل وعمرها ماحصلي مشاكل معاها قبلها كنت مع جيراني في لينك وكانت بتقطع كتير