مساعدة عاجلة ( علشان انتهاء الضمان بعد اسبوع ) Samsung LCD 19inch و خطوط باهتة

[I-IEMA]

الســلام عليكم ورحمة الله وبركاته


يااااا شباب

انا عندى شاشة samsung 943nwx 19inch WS اشتريتها من 10 شهور ونص

الشاشة لاحظت من شهرين ان فيها خط باهت اللون ناعم الحواف فى اعلى اليمين , و مش بلاحظ الخط ده إلا فى الالوان الفاتحة
كبرت دماغى و قولت لسه هاوديها ضمان و مش عارف هايقبلوها اساسا ولا لأ , و هانتظرها شهر على ما ترجع و يا عالم ايه اللى هايحصل !

النهاردة لاحظت كمان خط رفيع حاد الحواف فى اسفل الشاشة تركيزه اكتر جهة اليمين برضه
قولت كدا مش هاينفع خااالص ,, لازم اشوف ايه المشكلة و الحق الضمان و ربنا يسهل

لكن فى الاول قررت آخد رأيكم , فـ فتحت الفوتوشوب علشان احاول ارسم صورة للشاشة و الخطين اللى فيها تحاكى المشكلة الحالية

الفوتوشوب بعد الانتهاء من الصورة تقريبا هنج و قفل :mad: ,, قررت افتحه تانى و اعمل الصورة من اول وجديد :(

لقيت المفاجئة :
حواف الـ boxes اللى بتبقى على اليمين و فوق و الشمال بتظهر برضه خطوط باهتة على خلفية سادة لونها فاتح :eek:

و اكتشفت ان الخطوط القديمة اللى هى بداية المشكلة
الخط الاعلى : الحواف العليا ( عند الـ address bar )
الخط الاسفل : حافة الـ Task bar ,, و سبب ظهوره مؤخرا انى غيرت الثيم لـ ثيم حوافه ظاهرة

كدا ايه المشكلة !؟؟ و ايه الظاهرة الغريبة دى ؟؟

اللى اعرفه الـ ghosting بس مش بيبقى بالطريقة دى !!

ياااا ريت بعد اذنكم تردوا عليا فى اسرع وقت ممكن علشان انا شاريها بالظبط يوم 6/15
و لقيت مكتوب على الفاتورة 5/26 , مش فاهم إذا كانت دى انتهاء الضمان او ايه بالظبط !

كدا كدا هى هاتتحسب على 11 شهر ,, يعنى قدامى اسبوع فى الضمان :(:(
مش عارف هايقبلوا الشاشة ولا لأ ,, علشان لسه هاتتشحن , و احنا عندنا الشحن ممكن ياخد شهر لوحده :o

فى انتظاركم
و شكــــــــــرا
إبراهــI-IEMAــيم

[ThE AlCheMisT]

المفروض هيقبلوها، هم هيحاسبوك على تاريخ استلام الشاشة فى الصيانة
و الله أعلم

[I-IEMA]

المفروض هيقبلوها، هم هيحاسبوك على تاريخ استلام الشاشة فى الصيانة
و الله أعلم



هى ضمان مترا , المفروض هاتروح على مترا ولا فين ؟

هل ضمان مترا غير المحل اللى اشتريتها منه ( لإنه المفروض سنتين )؟

و لو المحل مثلا جايبها من محل تانى رئيسى :D ,, كدا يبقى الضمان تاه فى النص بينهم ؟؟

يا ريت لو حضرتك تعرف الاجابة ,, أو اى عضو يقدر يفيدنى فيها
يبقى جزاكم الله خيرا

و لســـه برضه عاوز اعرف إذن كان العيب دا شائع ولا ايه نظامه ؟ و ايه اللى يسبب العيب ده ؟
علشان برضه اعرف اتكلم مع الراجل و انا برجع الشاشة

و موضوع ضمان آخر اسبوع دا سارى ؟ ولا ممكن الاقى مفاجآت ؟

[Black-Edition]

ربنا معاك :ah49:

[ThE AlCheMisT]

هى ضمان مترا , المفروض هاتروح على مترا ولا فين ؟

هل ضمان مترا غير المحل اللى اشتريتها منه ( لإنه المفروض سنتين )؟

و لو المحل مثلا جايبها من محل تانى رئيسى :D ,, كدا يبقى الضمان تاه فى النص بينهم ؟؟

يا ريت لو حضرتك تعرف الاجابة ,, أو اى عضو يقدر يفيدنى فيها
يبقى جزاكم الله خيرا

و لســـه برضه عاوز اعرف إذن كان العيب دا شائع ولا ايه نظامه ؟ و ايه اللى يسبب العيب ده ؟
علشان برضه اعرف اتكلم مع الراجل و انا برجع الشاشة

و موضوع ضمان آخر اسبوع دا سارى ؟ ولا ممكن الاقى مفاجآت ؟



من كل الأسئلة دى معرفش أجاوبك غير على حاجة واحدة بس: لو الشاشة ضمان مترا يعنى عليها ستيكر مترا شيلها هيلا بيلا و اطلع على المهندسين و روح توكيل مترا و هم بإذن الله مش هيرجعوك بيها بايظة
اه صح فى كمان سؤال أعرف أجاوبه: اه ممكن تلاقى مفاجأت :D
ربنا يعينك عشان بجد التوكيلات دول ........... :cdcd::ah46::ah26::ah50::ah26::ah46::cdcd:

[MOHAMED HIGHEND]

اولا السلام عليكم
ثانيا لو الكرتونه بتعتك عليها استيكر مترا الشاشه بيبقى عليها ضمان 3 سنوات
وعنوان مترا 30 ش وادى النيل المهندسين امام مسجد الحمديه الشزليه
وعلى فكره الناس متعونه جدا ومحترمين جدا وهيخدموك فعلا لو فيه مشكله

[SeeNoEvil]

اطلع على الضمان علطول

[I-IEMA]

شكــــــــرا لكل الاخوة الكرام اللى تواجدوا معايا فى الموضوع
وجودكم معايا فرق كتير , لإنى كنت اتخنقت لما شوفت المشكلة دى ووجودكم خفف عليا الموضوع كتـــير
( و خصوصا رد رامز اللى يموت من الضحك ;) )

انا دورت على النت علشان اشوف ايه سبب المشكلة دى
لقيت ان فيه screensaver معينة بعملها علشان تشيل الخطوط دى
انا قولت اجرب ,, هو المفروض اسيبها 12 ساعة شغالة

انا جربت حوالى 3 أو 4 ساعات ,, لقيت فيه تحسن ملحوظ بخصوص الخطوط دى , لكن لسه ماراحتش نهائى
هاجرب النهاردة اسيبها 12 ساعة و اشوف هاتروح ولا لأ

المشكلة ان انا مش من القاهرة , لو كنت منها كنت شيلتها على مترا على طول زى ما نصحتونى
على الاقل كان ممكن يطلع حظى حلو و استبدلها و ادفع فرق و اجيب واحدة Full HD :D

[I-IEMA]

شبــــــاااب ,, المشكلة كنت اعتقد انها حاجة اسمها : burn-in
ما طلعتش كدا

و على حد قول واحد من الجماعة الاجانب طلعت : faulty driver circuit
حد ليه فى الالكترونيات يشرحلنا بالتفصيل ايه العيب ده و هل سهل حله ؟


شكـــــــلى كدا هاطلع على القاهرة بعد موسم الامتحانات :(
مشواااار مفترى !!

اسئلة مهمة جدا بقى :)

لما اروحلهم هايبقى عديت سنة من تاريخ الشراء ,, هى مكتوب علي علبتها بقلم جاف 5/26
كدا عادى ؟؟؟
انا عارف انه سؤال رخم بالنسبة لملصق طويل عريض مكتوب عليه "ضمان 3 سنوات" ,, لكن دا اول تعامل ليا مع ضمان

هل هايبقى عندهم علم بالشاشة و تاريخ شرائها ؟؟ ولا ممكن يكون مالهاش تاريخ سيريال عندهم ؟
( انا معايا الفاتورة لكنها مش مكتوب عليها حتى اسم المحل , مكتوب آخر 6 ارقام من السيريال و تاريخ الشراء و الثمن فقط )
^^^^^
السؤال دا الموزعين و اصحاب التوكيلات اعتقد هما اللى ممكن يقدروا يجاوبونى عليه

فترة صيانتها اد ايه ؟؟
ممكن آخدها فى اسبوع :),, شهر :o؟؟,, سنة:eek: ؟؟

ممكن اعرض على المحل اللى شارى الشاشة منه انها تبعتهالى مع الزامى بمصاريف الشحن ؟؟

اى حاجة تانية آخد بالى منها و انا رايح المشوار ده ؟؟

----------

حد اتعامل مع مترا فى ضمان شاشة قبل كدا ؟؟
من فضلك احكيلى بالتفصيل القصة كاملة من لحظة ما روحتلهم بالشاشة لحد ما اخدتها من عندهم


-----
انا دخلت اعمل للشاشة register من موقع مترا , لقيته لسه تحت الانشاء !!

[I-IEMA]

اثناء بحثى عن مترا لقيت دى :

https://i50.tinypic.com/hs8ilk.jpg

هل دى بيانات مترا ؟
هل مترا ليها فرع فى المنصورة فعلا ؟؟؟
و هل الفرع ده ممكن ياخد منى الشاشة و يصلحها ؟ ولا ايه وضعه ؟؟

[محمد الجوهري]

قلقان ليه يا هيما ؟

سلمها لله يا اخى

و ان شاء الله تتعدل و ربنا يكرمك

أولا : انا شاشتى كانت قبل كده فيها مشكله انها مش بتشتغل تماما
الا لو دست على زرار الباور 10 مرات ... تطفى و تقيد و هى برضه مديه شاشه سودا
و فى الاخر تقوم تلقط الصوره ...

المهم وديتها الضمان و رجعت متصلحه و زى الفل
فانت اطمن خالص
والضمان 3 سنين عند مترا
و مترا توكيل محترم
و بيبقى متسجل عندهم سيريال اى شاشه عليها لزقه الضمان بتاعهم
لان فيه قاعده بيانات هناك ... شغل نضيف يعنى

بس فيه سؤال بيطرح نفسه

ليه مش بتوديها دلوقت قبل 26/ 5 ؟؟؟

[محمد الجوهري]

هل دى بيانات مترا ؟
هل مترا ليها فرع فى المنصورة فعلا ؟؟؟
و هل الفرع ده ممكن ياخد منى الشاشة و يصلحها ؟ ولا ايه وضعه ؟؟


ليه لآ

جايز الفرع ده المسئول عن الدلتا مثلا و شمال افريقيا .... قصدى شمال مصر :D
اتصل بيهم بكره الصبح
و على فكره الشاشه بتاخد لها فى الضمان اسبوع ان شاء الله
ممكن ياخدو منك الشاشه عادى جدا

[I-IEMA]

طمنتنى ربنا يطمنك يا استاذ محمد




بس فيه سؤال بيطرح نفسه

ليه مش بتوديها دلوقت قبل 26/ 5 ؟؟؟


قصدك اوديها المحل ؟ ولا مترا ؟

لو المحل : انا ماعرفش نظامهم ايه فى الضمان و الكلام ده
لإن بقت محلات كتير بتعطى ضمان 11 شهر ,, مش 12 !!
انا شاريها 6/15 .

انا هاتصل بالمحل برضه و اشوف ايه موقف الشاشة من الضمان عندهم
و هاتصل برضه بالارقام بتاعت مترا اللى فى المنصورة و اسألهم

و انت بتودى شاشتك لـ مترا , جربتها عندهم علشان تقولهم على المشكلة ؟ و لا قولتلهم فقط بدون تجريب ؟
( اصل مشكلتى لازم اجربها قدامهم علشان اقولهم على المشكلة ,, و لازم تبقى شغالة بتاع ساعتين أو 3 كمان :D )

قالولك تعالا خدها بعد اسبوع ؟ ولا اتصلوا بيك بعد التصليح ؟ ولا اعطوك رقم تتصل بيهم تسألهم اتصلحت ولا لأ ؟

و شكـــــرا يا استاذ محمد على مشاركتك ,
كدا انا ارتحت شوية :)

[Mshadow.me]

ريح دماغك يا هيما و وديها مترا بنفسك

قولهم علي المشكلة و تفاصيلها و أسألهم حتأخدها منهم أمتي

و لو عايز أتصل بيهم الأول أسأل عن الليلة كلها:)

[محمد الجوهري]

قصدك اوديها المحل ؟ ولا مترا ؟

لو المحل : انا ماعرفش نظامهم ايه فى الضمان و الكلام ده
لإن بقت محلات كتير بتعطى ضمان 11 شهر ,, مش 12 !!
انا شاريها 6/15 .

انا هاتصل بالمحل برضه و اشوف ايه موقف الشاشة من الضمان عندهم
و هاتصل برضه بالارقام بتاعت مترا اللى فى المنصورة و اسألهم

و انت بتودى شاشتك لـ مترا , جربتها عندهم علشان تقولهم على المشكلة ؟ و لا قولتلهم فقط بدون تجريب ؟
( اصل مشكلتى لازم اجربها قدامهم علشان اقولهم على المشكلة ,, و لازم تبقى شغالة بتاع ساعتين أو 3 كمان )

قالولك تعالا خدها بعد اسبوع ؟ ولا اتصلوا بيك بعد التصليح ؟ ولا اعطوك رقم تتصل بيهم تسألهم اتصلحت ولا لأ ؟

و شكـــــرا يا استاذ محمد على مشاركتك ,
كدا انا ارتحت شوية

الأفضل توديها المحل و تريح دماغك ... ليه ؟

علشان هما بيبقى لهم تعامل خاص مع مترا
ماهم مش بيودو شاشه بس ... دول بيودو بورده و مثلا سماعات و حاجات كتير فبتلاقى ان بينهم و بين بعض تعاملات خاصه
سيبك من نظام 11 شهر ... الكلام ده عندنا هنا فى الأقاليم بس ... قول له ان الشاشه مكتوب عليها ضمان 3 سنين و قول له
لازم تتصرف و لسه ما عداش عليها سنه ... و خليك خشن معاهم !!

اتصل بالمحل الأول و ده الحل الأفضل

انا ما وديتهاش مترا , انا وديتها ماكسيمم هاردوير و الأستاذ هانى أول ما شاف العيب قال لى اقفل الشاشه خلاص
المهم انه يشوف العيب عامل ازاى ... و عادى لو شغلتها عنده 3 ساعات ... المهم تبين له العيب

الاستاذ هانى اتصل بيا لما الشاشه راحت عنده الشركه و انا رحت أخدتها و انت المفروض تتابع مع الشركه و تتصل بيهم بعد اسبوع

لو انا منك ما تتتاخرش و قوم وديها النهارده

ربنا معاك

[I-IEMA]

الحمد لله

اخدت بنصيحة محمد باشا الجوهرى ,,
و كلمت المحل النهاردة و قالى هاتها و نشوفها و لو فيها عيب نبعتها التوكيل

فكيت الشاشة و حطيتها فى العلبة ( كمان فى الفلين بتاعها :p )
و جربناها هناك , طبعا العيوب ماظهرتش بشكل كبير اوى علشان بتظهر مع ساعات العمل الطويلة
لكن خط الـ task bar هو اللى ملازم الشاشة دائما !! فكان سهل انه يظهر و فعلا قالوا انها ترجع ضمان

شكــــــــر خاص للاستاذ محمود ( شركة الهدى - دمياط ) , لإنه بجد كان متعاون جدا معايا

هو قالى على نقطة الـ 11 شهر ضمان , لكن قالى عادى نوديهالك الضمان , احنا يهمنا مصلحة العميل :)

و بعد ما تم الاتفاق على انها هاتروح الضمان ,
قالى : المشكلة يا ابراهيم ان موضوع العيب ده بيظهر بعد ساعات شغل , و الناس هناك بيبقى قدامهم الشغل بالطوابير ,و ممكن ماياخدوش بالهم .

قولتله : اكتب ورقة نبعتها مع الشاشة نشرح فيها المشكلة بالتفصيل ؟
قالى تمام ماشى , اكتبها بالتفصيل لإن هى دى الورقة اللى هانبعتها معاها بيان العيب

و شكــــرا للاستاذ كارم ( شركة الهدى ) ,, هو اللى كان معايا و احنا بنختبر الشاشة
^^^
كاتبها والله قبل ما تبعتلى الرسالة ;)



الحــــــــــــــــــــــــمد لله



و بكلمكم حاليا من شاشة CRT 15 inch ,, لكن بعد الحادثة بتاعتها بقت بتاع 12 inch :D
دا غير الالوان الضايعة منها ;)

شكـــــــر لكم يا اخوانى على تعاونكم معى فى الموضوع
شكــــرا لشركة الهدى ,, رغم ان تعاملاتى معاهم مش كتيرة , إلا انها اكتر شركة محترمة اتعاملت معاها

[I-IEMA]

و عادت الشاشة من التوكيل و استلمتها منذ يومان

و بعد أن ذهبت لهم و بها عيب , فقد جائت و بها عيبــــ(2)ــــان !!

للأسف بعد ما ركبتها و شغلتها بحوالى 3 ساعات , بدأ خط الـ address bar فى الظهور مجددا
و مع الاستخدام رجعت باقى الخطوط تانى
و كمان ظهرت مشكلة جديدة , وجود "بقعة" صغيرة جدا اضائتها اقل من اضائة الشاشة العادية !!!

---
الراجل الاجنبى فى منتدى غير متخصص فسرلى المشكلة وقالى ان حلها سهل
و كل ده بمجرد انه قرأ شرحى للمشكلة

توقعت انى لما ابعت مع الشاشة شرح بالمشكلة هناك فى مترا من غير ما يشغلوا الشاشة هايعرفوا على طول المشكلة و يحلوها !!

لكن دلوقتى انا نفسى اعرف هما عملوا فيها ايه هناك ؟؟؟
( غير انهم شبعوا تقليب فيها من كتر البصمات اللى مسحتها من على الشاشة ! )
---

انا من شدة احباطى ماكنتش عاوز اتكلم فى الموضوع دا تانى , و احاول انسى الشاشة و مشاكلها
لكن لما هديت شوية ( و لو انى ولا هديت ولا حاجة ) قولت اعرض عليكم النتيجة و اشوف رأيكم فيها ايه
و برضه اعرف رأى شركة الهدى فى الموضوع .

[hamada999]

مفيش حاجة اسمها احباط فى حاجة اسمها انت العميل انت اللى دافع فلوس و المنتج عليه ضمان راحت و رجعت زى الاول ترجعلهم تانى و ده حقك و لازم تعرف كده و لو حصل نفس الموقف يبئى اتبع طريقة 424 اكيد عرفها ;)

[HuLkY]

مفيش حاجة اسمها احباط فى حاجة اسمها انت العميل انت اللى دافع فلوس و المنتج عليه ضمان راحت و رجعت زى الاول ترجعلهم تانى و ده حقك و لازم تعرف كده و لو حصل نفس الموقف يبئى اتبع طريقة 424 اكيد عرفها ;)

+1000000

[I-IEMA]

مفيش حاجة اسمها احباط فى حاجة اسمها انت العميل انت اللى دافع فلوس و المنتج عليه ضمان راحت و رجعت زى الاول ترجعلهم تانى و ده حقك و لازم تعرف كده و لو حصل نفس الموقف يبئى اتبع طريقة 424 اكيد عرفها ;)


مهو للأسف التعامل مش مباشر بينى و بين الضمان
لإن انا من دمياط , و مترا فى القاهرة

و لو فضلت على الحال ده هافضل اودى و اجيب فى الشاشة و يا عالم هاتتصلح ولا لأ
و افك الشاشة و اشيلها تانى للمحل و افضل استاها ,, دا غير مصاريف الشحن

و انا مش لاقى تفسير لإنها ما اتصلحتش فى المرة الاولى :
هل جربوها دقيقتين مالقوش فيها حاجة و رجعوها بدون حتى يراجعوا ورقتى المرفقة بالمشكلة
هل ماعرفوش يصلحوها و رجعوها بحالتها

و موضوع العيب الجديد دا هو اللى خانقنى :ah1:
----
ما هى طريقة 424 :D ؟
تخمينى بيقول دا رقم شكاوى ؟؟ و لا انت بتتكلم عن ماتش النهاردة :p ؟

[Mshadow.me]

ما هى طريقة 424 :D ؟
تخمينى بيقول دا رقم شكاوى ؟؟ و لا انت بتتكلم عن ماتش النهاردة :p ؟



+1

أيه طريقة 424 دي؟:D

و أيه الحل اللي الراجل اللي في المنتدي الأجنبي قاللك عليه يا هيما؟

[hamada999]

انا رأى تنزل انت بيها القاهرة لو فاضى بدل ما الضمان يخلص و متعرفش تعمل حاجة بعد كده
انا كنت بهزر فى موضوع 424 ده كل اللى كان قصدى ان لو رجعتلهم الشاشة و متصلحش العيب تستخدم طريقة غير محترمة فى التعامل و سعات كتير هى اللى بتجيب نتيجة للأسف

[I-IEMA]

+1

أيه طريقة 424 دي؟:D

و أيه الحل اللي الراجل اللي في المنتدي الأجنبي قاللك عليه يا هيما؟

دا كلامه :




Horizontal lines aren't burn-in, or image persistance as we say with LCD, but a faulty driver circuit. It's unlikely the problem is worth repairing. If you know a friendly repair person then get a quote certainly. With the price of new stuff these you may as well pay for a new item with warranty.



انا رأى تنزل انت بيها القاهرة لو فاضى بدل ما الضمان يخلص و متعرفش تعمل حاجة بعد كده
انا كنت بهزر فى موضوع 424 ده كل اللى كان قصدى ان لو رجعتلهم الشاشة و متصلحش العيب تستخدم طريقة غير محترمة فى التعامل و سعات كتير هى اللى بتجيب نتيجة للأسف

مسألة انى اروح بيها القاهرة دى شىء صعب جدا ,

طيب ازاى اتواصل مع قسم الصيانة بتاع مترا ؟

ليهم ايميل اقدر ابعت ليك لينك للموضوع هنا و ابعتلهم سيريال الشاشة علشان اعرف هما عملوا ايه ؟