امتحان رخصة قيادة السيارات فى مصر

[Mr.pOPo]

السلام عليكم ورحمة الله وبركاته.

كنت عايز أسأل الناس اللى امتحنت قريب او امتحنت و تعرف الامتحان شكله ايه سواء النظرى او امتحان القراطيس. أنا كنت سمعت ان امتحان القراطيس اتغير، وبقى بدل ما كانوا بيحطوها على خط واحد، وتعديهم مره قدام و مره بظهر العربية. بقوا بيحطوها على هيئة علامات طريق اخده انحراف صغير.

ياريت اللى عنده فكره أو نصيحة يفيدنى. :)

جراكم الله خيراً...

[medoamado]

انا امتحنت من زمان بس فيه حاجة مهمة
لو انت داخل مدرسة متقلقش لأنك مش هتمتحن كمبيوتر والسواقة هتبقى اسهل بكتير من الناس بتوع الدورة التنشيطية وفى المدرسة اصلا هيعلمك على الإمتحان
لكن لو هتمتحن علطول اللى هى دورة تنشيطية يعنى دى هتمتحن انت الكمبيوتر ولو مش معاك حد هناك نسبة كبيرة جدا مش هتعدى لأن فيه نسبة نجاح معينه فبينجحوا بتوع المدرسة وجزء كبير من الناس اللى واخدة دورة تنشيطية مش بتنجح
انا مش باعقدك والله بس دا اللى انا اعرفه واللى ناس كتير من اصحابى حصلهم
ربنا يوفقك

[Mr.pOPo]

شكراً لرد حضرتك.

انا مش داخل مدرسة ولا حاجة، و انا فعلاً همتحن الكومبيوتر + الجزء العملى طبعا. وانا معايا ربنا :)

و بالفعل انا كنت سمعت عن الحكاية بتاعت نسبة النجاح، فانا هتوكل على الله و اخش عادى و امتحن. لو قدر الله و معدتش، يبقى يحل الحللّال ساعتها.

شكراً مرة تانية..

[medoamado]

ربنا يوفقك وبرده حاجة نسيت اقولك عليها وان شاء الله مش هتحتاجها
لو لاقدر الله منجحتش ليك مرة تانية بعد 3 شهور بنفس الفلوس دا اللى انا فاكره

[Mr.pOPo]

تمام - شكرا ليك.

[Mr. Nova]

بص يا مان هو العملي او القراطيس على رايك بيبقى كل نقطة مرور وليها امتحانها على مزاجهم

انا كنت روحت امتحنت تبع مدرسة فكان الامتحان اي كلام

لكن طالما انت هتروح تبع نفسك يبقى خد بالك عشان الامتحان مش بيكون بسيط يعني الناس اللي امتحنوا ادامنا مكنوش تبع المدرسة حطولهم القراطيس على شكل حرف U والمفروض ياخدوه رايح جاي من غير ولا غلطة

الناس اللي كانوا بسيقطوهم مكنوش بيسطقوهم عشان نسب النجاح والكلام ده لكن بيسقطوا عشان هم سقطوا فعلا وغلطوا لان نسبة الناس اللي عرفوا يعدوا الامتحان صح لا تتعدى 10% من اللي امنحنوا ادامي ساعتها

[Mr.pOPo]

يعنى افضلى ان اخش مدرسة علشان تسهل عليا فى الامتحان كون ان انا جاى من مدرسة؟ مش جاى تبع نفسى؟

لو فعلا كدا، اخش مدرسة. لأن الاخ medoamado (https://www.arabhardware.net/forum/member.php?u=11123157) قال ان لو انا تبع مدرسة مش هدخل اصلا امتحان الكمبيوتر.

شكراً لرد حضرتك.

[semsem7777]

ادفع فلوس التعليم في المدرسة وما تحضرش الا حصة لو انت كويس في السواقة هما حيساعدوك في امتحان الكمبيوتر وامتحان السواقة بيبقى خفيف عن العادي وبكده تضمن وان لاقدر الله موفقتش بتعيد خلال اسبوعين مش 3 شهور زي العادي بس نقي المدرسة اللي تبع ادارة المرور مش مدرسة خاصة اللي بتنزل اعلانها في الوسيط وبالتوفيق

[Mr.pOPo]

خلاص انا هشوف المدراس اللى تبع ادارة المرور دى نظامها ايه.

شكراً لرد حضرتك..