بنسبه لمنتجات ocz وتوكيلها [الأرشيف]

مشاهدة النسخة كاملة : بنسبه لمنتجات ocz وتوكيلها

MenDo

17-01-2011, 20:15

بسم الله الرحمن الرحيم

انا كان عندي رامات ocz platinum 6gb 1600 cl7 جايبها ب 1150ج من اقل من سنه المهم واحده منهم بقت تشتغل بمزاجها يعني مره الجهاز يشتغل وفيه 6جيجا و 50 مره يشتغل 4 جيجا بس , المهم اخر ما زهقت رحت بيها لماكسيمم هاردوير وودوها الوكيل اللي هو QDS وقعدت 3 اسابيع ( منهم اسبوع كان في جرد عند الوكيل ) المهم كان الرد ان الرامات اتسعرت بمبلغ 850ج وممكن ازود انا واجيب اي منتج انا عاوزه , فهل من حق الوكيل انه يخسرنى 300ج من تمنها وادفع تاني 300ج عشان اجيب ( يعنى خساره 600ج ) عشان اجيب نفس مواصفات الميموري بتاعتى تاني ؟؟؟؟؟؟

النقطه التانيه في الباور هو من ساعه ماجبته وهو مجنني :
1- الزرار اللي بيفصل الباور نفسه بيعلق
2-بيفصل لوحده
3-لو طفيت الجهاز وجيت افتحه تاني مبيرضاش يشتغل فلازم اشيل فيشه الكهربا واحطها تاني واجرب وانا وحظي لغايه لما يشتغل
4-احيانا لما بشغل الجهاز لمض المراوح في الكيسه الانتك 900 بتنور وتطفى والجهاز مش بيقوم فلازم افصل الكهربا لحسن حاجه في الجهاز تتحرق وانا شاكك ان المراوح بتاعت الكيسه محروقه بسببه
5- العلبه عليها (-B) في الاخر واللزقه مكانها متشال فعلا وهو زي ما باين في الصور عندكم

https://img690.imageshack.us/img690/9532/imag0010nl.jpg https://img842.imageshack.us/img842/8037/imag0014m.jpg

https://img690.imageshack.us/img690/9532/imag0010nl.jpg https://img842.imageshack.us/img842/8037/imag0014m.jpg

انا اتصلت بماكسيمم هاردوير فقلى انه ممكن يبعته الضمان يبدله او يقيمه برضه (وفي الحاله ده تمنه هينزل جامد) وازود انا واجيب اللي انا عاوزه

انا من امبارح كتبت على وول الجروب المشكله بتاعتى
https://www.facebook.com/pages/QDS-Egypt/120843407932753
ولكن محدش عبرنى ولا رد عليا رغم انهم ردوا على مشاركات تانيه عندهم فالجروب, بس انا شايف انه من حقى انى اخد فلوسي اللي انا دفعتها فيه 630ج - لانى مبقتش اثق في منتجات ocz

MenDo

17-01-2011, 20:20

رابط الصور

https://img690.imageshack.us/img690/9532/imag0010nl.jpg

https://img842.imageshack.us/img842/8037/imag0014m.jpg
وواضح فيها ان مكان اللزق متشال وتربت كمان

hamedstar

17-01-2011, 22:30

حضرتك اذهب الى الوكيل مباشرة واعرض عليهم مشكلتك طالما حضرتك فى فتره الضمان

لان الشركة وعدت بانها سوف تغير اى باور يشتكى من العميل او يسترد قيمته وفى موضوع فى المنتدى يشهد بالكلام ده

ورد علينا وقولنا ايه اللى حصل معااااااااااااااااك

وده الموضوع اللى تعهد فيه الوكيل بتغيير الباور او رد قيمته كاملة

https://www.arabhardware.net/forum/showthread.php?t=174847

محمد الجوهري

17-01-2011, 22:45

TheInfernal

17-01-2011, 23:03

النقطه التانيه في الباور هو من ساعه ماجبته وهو مجنني :
1- الزرار اللي بيفصل الباور نفسه بيعلق
2-بيفصل لوحده
3-لو طفيت الجهاز وجيت افتحه تاني مبيرضاش يشتغل فلازم اشيل فيشه الكهربا واحطها تاني واجرب وانا وحظي لغايه لما يشتغل
4-احيانا لما بشغل الجهاز لمض المراوح في الكيسه الانتك 900 بتنور وتطفى والجهاز مش بيقوم فلازم افصل الكهربا لحسن حاجه في الجهاز تتحرق وانا شاكك ان المراوح بتاعت الكيسه محروقه بسببه
5- العلبه عليها (-B) في الاخر واللزقه مكانها متشال فعلا وهو زي ما باين في الصور عندكم
انا اتصلت بماكسيمم هاردوير فقلى انه ممكن يبعته الضمان يبدله او يقيمه برضه (وفي الحاله ده تمنه هينزل جامد) وازود انا واجيب اللي انا عاوزهالOCZ GameXstream 700W تياره مش ثابت على الأحمال العالية و أنا نوهت على النقطة دي أول ما نزل و إتعرضت بسببها لهجوم بشع.
https://www.jonnyguru.com/modules.php?name=NDReviews&op=Story2&reid=24

الأعراض اللي حضرتك قلتها بتدل على إن فيه مشكلة أكبر من مجرد عدم ثبات التيار. أنا معرفش حضرتك هتوصل لإيه مع الضمان بس لو هتغيره أنصحك تجيب حاجة غير OCZ.

محمد الجوهري

17-01-2011, 23:14

^
^
^

أهلاً يا دكتور :) .. منوّر المكان :)

هل من مقترحات بشأن ما يتوجب عليه شراؤه, ما رأيك في الكولر ماستر ؟ Coolermaster GX750
أو ربما HEC COUGAR 700 S ?

MenDo

17-01-2011, 23:57

ربنا معاك أخي الكريم فيما حدث لمنتجاتك.

شوف ... لو راجعت شروط الضمان الموجودة على ظهر أي فاتورة لأي شركة ستجد أنه هناك بند ينص على:

في حال تلف احد القطع يتم إصلاحها أو تبديلها في حال تعذر الإصلاح, و لو لم تتوفر نفس القطعة يتم إعادة مبلغ القطعة للعميل
مخصوماً منه قيمة .... % من ثمنها الأصلي عن كل شهر إستخدام.

مكان النقط فيه نسبة, في غالبية الشركات بتبقى 4% و دة الحد الأدنى, و فيه ناس بيزودوا النسبة المخصومة.
لو إعتبرنا أنها 4% زي ما قلت لحضرتك هتبقى النسبة كالتالي:

1150×(4/100) = 46 جنيهاً
حضرتك بتقول إستعمال أقل من سنة, هنفترض إن أقل من سنة معناه 9 شهور مثلاً ؟
46×9 = 414 جنيهاً

إذن المفروض أن يتم خصم 414 جنيها من قيمة الرامات
1150-414 = 736 جنيهاً
و أنت قلت أن الوكيل عرض مبلغ 850 ؟!

المفروض أن تعطي لك الشركة مبلغ 736 جنيهاً ... و لك حرية التصرف فيهم كيفما شئت, سواء بشراء رامات جديدة من نفس النوع
أو من نوع آخر ... أنت حر.

* بالنسبة للباور, هذا الباور للأسف هو أحد الباورات معادة التهيئة التي حدثت بسببها ضجة كبيرة في المنتدى هنا منذ فترة طويلة
و الباور الذي معك يمكنك بكل سهولة إرساله للوكيل و سيقوم بعمل نفس الحسابات التي طرحتها بالأعلى. و بعدها يمكنك شراء
باور آخر من التشكيلة الرائعة الموجودة بالسوق.

أنصحك بشراء: Coolermaster GX750 ... أو 650 واط و إن شاء الله سيكون كافِ لمكونات جهازك و التي أرى منها بطاقة ال 5850.

مشكلتك هذه ليست مشكلة في شركة QDS و منتجاتها فحسب, الأمر عادي جدا و من الممكن أن يحدث لأيِ منا, فلا تحزن و إن
شاء الله ربنا يعوضك بكل خير.

و بالطبع في إنتظار رد الوكيل عليك, و رجاءاً أطلعنا بآخر المستجدات :)

اول حاجه شكرا ليك على الرد الوافي والجميل ده
بالنسبه للرامات انت وضحتلى الطريقه بتكون ازاي لاني كنت محتار من السبب
بس حضرتك بالنسبه للباور انا بختلف معاك لاني شاري الباور معاد تصنيعه و بالعكس انا اللي ليا حق عنده وياريت فعلا الوكيل يرد عليا في حكايه الباور

انا بقالى 3 اسابيع شغال على بنتيوم 4 وتعبت من بطئه معلش يا جماعه انتوا اكيد عارفين احساس الواحد لما يدفع 10.000ج في جهاز وبعد كده يلاقي بيبوظ كل شويه:mad:

الOCZ GameXstream 700W تياره مش ثابت على الأحمال العالية و أنا نوهت على النقطة دي أول ما نزل و إتعرضت بسببها لهجوم بشع.
https://www.jonnyguru.com/modules.php?name=NDReviews&op=Story2&reid=24

الأعراض اللي حضرتك قلتها بتدل على إن فيه مشكلة أكبر من مجرد عدم ثبات التيار. أنا معرفش حضرتك هتوصل لإيه مع الضمان بس لو هتغيره أنصحك تجيب حاجة غير OCZ.

شكرا على ردك وانا فعلا كنت متايع المنتدى الفتره ده وفعلا حضرتك حذرت من الباور ده تحديدا بس الناس وانا منهم مكنتش مديه للموضوع اهميته بسبب ان البرودكت كان اول مره ينزل مصر فكان ليه برستيجه
بس انا فعلا اتقرصت من الباور ده وايقنت ان كلام حضرتك كان مظبوط من الاول وفعلا الواحد يبعد عن ocz

انا بفكر في :
seasonic X-760W : الوكيل قايل انه هيجى في اقل من شهر بس طبعا لو سعره عده الـ950ج مش هجيبه وهيبفى استنيت عالفاضي
Cooler master GAMING PSU GX 750W : تمنه 725 - 80% plus
Thermaltake Toughpower XT 775W : تمنه 800 -80% bronze
Hec Cougar 700w :شكله مش عاطفي خالص
هم دول تقريبا اللي شايف انهم كو يسين

hany103

18-01-2011, 04:00

M_HaFeZ

18-01-2011, 17:31

الحقيقه الموضوع بتاع الباورات مش مرتاح له الى يومنا هذا
مشاكل كتير بنسمع عنها فى الباورات ....

وصديق لى بيستشيرنى فى امور الهاردوير دائما .... بس فى مره الباور اللى عنده باظ (نوعه kmex ) نزل اشترى باور فاشترى من منتجات OCZ ... قاللى... طبعا اتضايقت وقولتله كنت تسألنى قبلها

صديقى احتاج لباور اعلى فباعه بعد فتره بسيطه الى صديق لنا .... ومفيش اسبوعين وحصلت معاه مشاكل ونفس القصه وطلع معاد تصنيعه ورجعه فى التوكيل ....

بصراحه مش قادر اتغاضى عن الموضوع ده لحد دلوقتى ابدا ....

انصحك زى الاخوه بHEC COUGAR 700 S او Coolermaster GX750 والاول سعره اكتر من ممتاز تقريبا 560 جنيه وكفائته رائعه

Milestone

19-01-2011, 17:40

^
^
^

أهلاً يا دكتور :) .. منوّر المكان :)

هل من مقترحات بشأن ما يتوجب عليه شراؤه, ما رأيك في الكولر ماستر ؟ Coolermaster GX750
أو ربما HEC COUGAR 700 S ?

لا انصح احد بشراء ال GX series من Coolermaster ال سلسلة دة من ال PSU تعتبر FAIL

والمقال ده هايثبت كلام الناس الى عارفة انه فاشل

https://www.hardocp.com/article/2010/11/22/cooler_master_gx_650w_power_supply_review/1

TheInfernal

19-01-2011, 18:24

انصحك بال Thermaltake Toughpower XT 775, جيد جدا و Single Rail.

ال Cooler Master GX 750 W به نفس المشكلة التي ذكرها TheInfernal في البور الOCZ, وهي الNoise & Ripple.

https://img228.imageshack.us/img228/927/gx750.jpg (https://img228.imageshack.us/i/gx750.jpg/)
أنا مع الرأي ده.

تعديل: عشان محدش يفهمني غلط, أنا على حد علمي الToughpower هو تقريبا الخط الوحيد المحترم اللي بتعمله Thermaltake. الTR2 مثلا سيئة جدا.
اللي مضايقني في الTR2 إن الOEM بتاعها أو الشركة اللي بتصنعها الأول قبل ما تتباع بإسم Thermaltake هي HEC. محدش يفهمني غلط تاني. أنا مش بقول كل منتجات HEC سيئة. الHEC Cougar مثلا ممتازة حسب شهادة JonnyGuru, بس الTR2 هتخليني أشك بدرجة كبيرة في جودة المنتجات الأرخص اللي بتعملها HEC. أنا كده أضمن لي أشتري Cooler Master extreme power 400W رغم إني عارف إنه ميقدرش يدي تيار ثابت على حمل أكتر من 200W.

كمان أنا فاكر إني قريت قبل كده على الHEC Orion 485W و لقيت تعليق مش ظريف عليها من JonnyGuru

No amount of efficiencty can compensate for basic electronic theory.

That PSU looks like a Powmax inside.

No choke coil on the AC side to act as any kind of AVR or PFC. A pair of 470uF caps, which is only acceptable if the PSU has active PFC.

The lack of transformers and rectifiers and reduced number of transistors tells me that all of the rails are on the same plane.

Where can I buy one of these so I can blow it up at 200W?
معلش أنا حاسس إني خرجت بره الموضوع.

تعديل تاني: أنا حبيت أشوف آراء المستخدمين على الOCZ Gamexstream 700W على موقع Newegg و تقريبا كل الريفيوهات الأخيرة بتشتكي من إنه إتحرق أو باظ: https://www.newegg.com/Product/Product.aspx?Item=N82E16817341002

و نفس الكلام على ال600W اللي لسا بيتباع لحد دلوقتي: https://www.newegg.com/Product/Product.aspx?Item=N82E16817341001

MenDo

19-01-2011, 20:15

انا الحمد لله رحت ماكسيمم هاردوير وجبت رامات corsair 6gb cl7 ودفعت فرق 350ج في نفس مواصفات الرام القديمه , رغم ان ocz عندها مودبلات بنفس مواصفات الرام القديمه كان ممكن الوكيل يبدل بيها او يخلى في فرق فلوس بس تخلى الواحد يقتنى الocz تاني , هي مجرد فكره كنت اتمنى ان الواحد يشوفها هنا في مصر

انا وديت لماكسيمم الباور ووريته انه هو ازاي متشال من عليه التكت والتراب لزق مكان اللزق اللي متشال , وصراحه الناس في ماكسيمم في قمه الاحترام , ولما سالته عن الوضع عن الباور هيكون ازاي قالي معرفش هوديه التوكيل وهنشوف ردهم , قلتله يعني محصلتش قبل كده فقالى لا

معقوله محدش رجع حاجه من الباورات المعاد تصنيعها ده !!!!!!!!!!!!!

انا منتظر رد استاذ شريف على الموضوع خصوصا انه عرض عدد من الحلول في الموضوع ده
https://www.arabhardware.net/forum/showthread.php?t=174847
وانا يناسبنى انه انا استرد فلوسي , ومنتظر رد ا/شريف وياربت الواحد ميخسرش ثقته في كلام حضرتك وفي التوكيل

اسناذ/Milestone ,استاذ /hany103 , دكتور /TheInfernal انا بصراحه احيي حضراتكم ومحدش مخرجتش بره الموضوع ولا حاجه بالعكس ده الواحد بدا ياخد باله من انه الموضوع مش سهل والواحد لازم ياخد باله من الموضوع ده

hany103

19-01-2011, 21:20

موضوع اللزقه المخلوعه ده تعمد من الوكيل عشان كان بيبقى مكتوب عليها Recertified

وكان في عضو اخر في المنتدى عنده نفس المشكلة وراجعه لشركة Maximum Hardware, مش عارف إزاي قالولك لأ, وهذا هو الموضوع https://www.arabhardware.net/forum/showthread.php?t=173001

amrmovie

22-01-2011, 22:57

طب من الاخر انا عايز اشترى باور 600 او 650 وات بالكتيير تنصحونى بأيه ؟

dr.ahmed shahin

23-01-2011, 00:12

بجد نصيحة هات الباور الهيك ال 700 انا معايا الباور ده بجد باور تحفة جاى معاه كمية وصلات كتير اوى وكمان ينفع تشيل الوصلات اللى مش هتحتاجها منه زائد ان سعره قليل اوى عليه

MenDo

23-01-2011, 06:37

السلام عليكم طبعا انا قريت ومتابع المشاركات الخاصه بيك من اول قصة الرمات

فى الواضح انك نت تطالب بى اكثر من حقك فى ضمان الرمات واثارت جدلا كبيرا

لانك كنت تريد الحصول على قيمه اعلى فى النقود من قيمتها الحاليه رغم اننا تعاملنا معاك بى احترام

بعد ذلك اعتقد انك اردت تطوير مزود الطاقه الخاص بك بعد استعمال سنه فى مزود الطاقه فهل هذا يعقل

سيدى الفاضل ليس لديك من الشركه غير الضمان وليس استرداد النقود فنحن نطمن لك ضمان البور

والعمل بكفاءه انصحك الا تصال مباشرة بى الدعم الفنى بى الشركه ستجد كل تعاون لك

شريف عبد العظيم

اولا يا سيدي الفاضل ايه اللي يخلي الواحد يشتري مميوري ocz وميشتريش اي نوع ارخص منه مع انه فيه منهم بيكون بضمان برده

ثانيا ثمن السلعه بيكون مضاف اليها خدمه مابعد البيع , يعنى ده شئ انا دافع تمنه ضمن فلوس الميموري مش تكرما من الشركه

ولا حاجه ده حقى

ثالثا حقي انه في عدم توافر المنتج ان يوفر لي الوكيل سلعه بديله بنفس المواصفات , وكل موديلات ocz نفس المواصفات حتى لو

كان في فرق فلوس كنت هكون سعيد وانا بجيبها لان مش كل ما الواحد تبوظ منه حاجه يروح الضمان عشان تتمن مكنت جبت اي نوع تجاري وخلاص

رابعا هل مطلوب مني ان اسمع الكلام وخلاص , يعنى لما سالت الناس هل معنى كده اني اطالب اكتر من حقى ؟؟؟؟؟؟!!!!!!

يا استاذ انا عارف الضمان يعنى ايه , يمكن موضوع الرامات اثار الجدل زي ما حضرتك ما بتقول بس انا مش شايف كده خالص لانه مش ده الضمان اللي انا كنت فاكره ده كده بيخسرني فلوس وبيخسرني المنتج اللي الواحد اشتراه

بالنسبه للرام انا جبت جبت رامات كورسير وبنفس مواصفات الرام القديمه واعتقد موضوع الرامات انتهى

موضوع الباور اسف مينفعش تقولي الكلام ده لانه غير منطقى بالمره
انا جايب 700 واط هجيب ايه تاني بعد كده ولا هجدده ليه؟؟؟؟؟؟؟؟؟؟
هجيب باور بيشغل الجهاز لوحده ولا باور بيتكلم ولا بيلعب جيمز وقت فراغه!!!!!!
ده كده اسمه رمي الناس بالباطل واستفزاز
انا قبل اي حاجه دكتور صيدلي فمينفعش تقولي اني جاي انصب عليك كده
عندك الباور ممكن تتاكد من ان المشاكل ده كلها موجوده فيه

قلي حضرتك هل يعقل ان الباور تمنه بره
https://gear.ocztechnology.com/products/description/OCZ_GameXStream_700W_Power_Supply-Recertified_/index.html

مايوازي 377ج يتباع هنا ب670ج؟؟؟؟؟

https://bensbargains.net/deal/135736

مايوازي 230ج يتباع هنا 670؟؟؟؟؟

هل يعقل ان التكت اللي على الباور Recertified\Refurbished كون متشال عمدا وده اسمه غش تجاري؟؟؟؟؟؟؟؟؟

هل يعقل اني اشتري باور مغشوش وتقلي ضمان.اذا كان ابسط حقوقى هو اني عرف كل المعلومات عن المنتج اللي هشتريه واللي ضاعت عن طريق التعمد في اخفاء ان السلعه معيبه من الاساس؟؟؟؟؟؟؟
حقى اني اعرف اذا كانت السلعه جديده ولا مستعمله ؟؟؟؟؟
كلام حضرتك كان هيكون مظبوط لو كانت السلعه جديده مش مغشوشه
اقل حق ليا هي اني استرد فلوسي اللي دفعتها في الباور وده الحل اللي انت عرضته مش انا

https://www.arabhardware.net/forum/showpost.php?p=1397587&postcount=44

وانا هجيب اي باور تاني بس مش هجيب الماركه ده تاني

الناس هنا مش صغيره عشان يتم الاستخفاف بالعقول بالشكل ده والمنتجات ده مش بناخدها هدايا احنا بنشتريها وحضرتك متابع الموضوع من الاول بس طبعا مفيش رد لانه حضرتك عارف اني على حق واكبر دليل هو الرد الباهت اللي نشرته في صفحتك الشخصيه ومتكتبش هنا

اعتقد ان ده هو حال الضمان في الشركه ده وانصح حضرتك لو في حل للموضوع تطرحه هنا اما سياسه ملكش غير الضمان واخبط راسك في الحيط مش هتنفع

MenDo

24-01-2011, 02:34

حقيقه انا مستغرب جدا من التجاهل سواء من الوكيل , المشرفين , الاعضاء

حسبي الله ونعم الوكيل في الظالم

mansoul303

24-01-2011, 07:54

Mubarak

24-01-2011, 10:46

حقيقه انا مستغرب جدا من التجاهل سواء من الوكيل , المشرفين , الاعضاء

حسبي الله ونعم الوكيل في الظالم

نحن لمن نتجاهلك، الآن فقط رأيت الموضوع، تم إغلاق الموضوع للبحث فيه.

Mubarak

24-01-2011, 10:47

التجاهل هذا متوقع لأن بعض من المشرفين والأعضاء النشطاء لهم علاقة بالوكيل بطريقة مباشرة أو غير مباشرة, شاي بالياسمين, ولو عضو اتكلم على الوكيل بكلمة ممكن يتمسح عضويته زي محصل قبل كده بحجة ان الوكيل عرض استرجاع كامل المبلغ المدفوع في البورات المغشوشة, وها هو الوكيل يرفض هذا ويتهمك باسلوب مستفز.

سيتم البحث في موضوع العلاقة هذا، وستتحمل تبعات هذا التهجم.

ارجو عدم إيقاف هذا الشخص حتى نبحث في مدى ما يزعمه من علاقة المشرفين بالشركة.

Mubarak

24-01-2011, 13:27

سيتم دعوة الأخ شريف عبدالعظيم للرد عليك.
أرجو أن لا تتجاوز في ردودك حتى نبقى في وصف الموضوع.
أي شخص يتكلم سو الشركة والزبون فهو متطفل يعرض نفسه لحرج شديد، من لديه ملاحظة عليه بالتواصل بالخاص، ما عدى ذلك فهو مرفوض.

الآن أرسل للأخ شريف عبدالعظيم للرد على استفساراتك.

sazim99

24-01-2011, 15:22

السيد المحترم مبارك المهيرى

اولا - العميل حاصل على البور سبلاى من حوالى 9 شهور الى سنه

ثانيا- العميل تم رد الرمات الخاصه به فى الضمان بى خصم القيمه الاستعمال وهى متعارف عليهااا

ثالثا- العميل استخدم اسلوب التشهير

4- العميل يرفض استرداد قيمة البور سبلاى بخصم الاستعمال وهى 9 شهور الى سنه ويريد حقه كاملا

انا لن اعلق على قاله او تكلم بيه فى اسلوب خارج عن الاحترام والادب فى معامله الغير وهى التعليق على رسالتى

والصدق فى سوء النيه انه ارسل لى على الخاص وطلب منى الرد عليه على الخاص ثم وضعه على العام

ووصف تعليقى بى وصف انا لا اقبله

وشكرا

شري ف عبد العظيم

QDS Egypt Support

24-01-2011, 16:08

السلام عليكم و رحمه الله و بركاته

هذا نص الحوار الذي جري بيني و بين ا/خالد علي جروب الفيس بوك الخاص بنا

https://img407.imageshack.us/img407/61/35518517.jpg (https://img407.imageshack.us/i/35518517.jpg/)

https://img508.imageshack.us/img508/1271/26540113.jpg (https://img508.imageshack.us/i/26540113.jpg/)

https://img233.imageshack.us/img233/756/35149856.jpg (https://img233.imageshack.us/i/35149856.jpg/)

https://www.facebook.com/pages/QDS-Egypt/120843407932753

فنحن لم نتوانا عن اهدار حق العميل , علي العكس ...
تم حساب تخصيم الرامات علي اقل اقل نسبه تخصيم ممكنه

و هذا يعني اننا لم نظهر اي تقصير من جهتنا
بل علي العكس ,,
قد اعطيت رقم هاتفي للعميل لكنه لم يقم بالاتصال او حتي الاستفسار لما سوف يتم معه

MenDo

24-01-2011, 20:01

اولا انا اشكر الاخ مبارك على موقفه ووفقه الله لما فيه الخير

ثانيا بما يخص موضوع الرامات ,فاعتقد انه انتهى لاني طرحت السؤال للمعرفه وليس للاتهام واعتقد انه من حقى ذلك ولم اطالب باي شئ

ثالثا انا لم استخدم اسلوب التشهير ولم اتكلم باسلوب خارج عن الادب باي لفظ يدل على ذلك ولم اذكر ان الموضوع يعتبر غشا تجاريا او غيرها من التعبيرات حتى اتهمنى بانني اقوم بالنصب

حتى اطور مزود الطاقه الخاص بي وهذا لا اقبله وهو مجرد تبريرك لانكار حقي

رابعا انا لم ارفض استرداد قيمه الباور سبلاي كما قلت لانك لم تعرض ذلك اصلا بل كانت جملتك واضحه

"سيدى الفاضل ليس لديك من الشركه غير الضمان وليس استرداد النقود فنحن نطمن لك ضمان البور"

فالجمله واضحه انه سيتم تبديل الباور فقط لاغير

وانا لا اريد باورا اخر من ocz
لان تجربتى معه كانت اكثر من سيئه , خصوصا اني لا استبعد انه كان السبب في اتلاف كروت الذاكره بسبب عدم استقرار الطاقه الكهربائيه به

اعتقد ان المنتدى هدفه الاكبير ان يكون حلقه وصل بين البائع والمشتري , حيث انى دعوتك لمنافشه مشكلتى عن طريق العام في الموضوع ولكنه لم يحدث , اعتقدت بانك لم

تلاحظ الموضوع فقمت بارسال اللنك لك على الخاص ولكنى تفاجات من الرد

"السلام عليكم طبعا انا قريت ومتابع المشاركات الخاصه بيك من اول قصة الرمات"

وانا لم اصف تعليقك بسوء حيث انه كان واضحا ولا يحتاج الى تفسير

اعتقد ان كلامك كان واضح بما يخص موضوع الباور المشار له في هذا الموضوع

https://www.arabhardware.net/forum/showthread.php?t=174847

وقد تعهدت بذلك , فاذا كنت تبحث عن حقك في خصم الاستعمال وهو الحل الذي طرحته الان فاين حقى في شراء سلعه معيبه معاد تصنيعها بدون ان اعلم واشتريتها بسعر الجديده وهو يوازي ضعفى سعرها ؟؟؟؟
سعر هذه القطع المعاد تهيئتها او تصنيعها ما يوازي 230-370 ج وهو سعر الجمهور بالخارج

فالصحيح انه ليس لك حق في الخصم بسبب انني اشتريت السلعه مضاعفه الثمن من الاصل + ان السلعه معيبه ومعاد تصنيعها + تعهدك بمنهح العميل حق الاسترداد

م-مصطفي كانت ردودك كلها توحي بان شراء باور معاد الاعتماد هو شئ عادي ومباح ولكن الحقيقه انه ليس ذلك حيث ان

https://www.arabhardware.net/forum/showthread.php?t=174847

منذ فترة وانا اقوم بالتحقق عن OCZ PSU الموجودة قي السوق المصري ، لاجل موقف معين حصل معي لا داعي لذكره الان (سأقوم بذكره اذا تطلب الامر) ، وما اذا كانت Recertified او Refurbished او Reconditioned والثلاث حالات لهم نفس المعنى لدى شركة OCZ

كل ما اريده هو استعاده حقى لا اكثر وليس سؤء نيه حيث ان مطالبه الشخص بحقه ليس كذلك
شكرا للاخ مبارك

sazim99

24-01-2011, 21:37

اخى العزيز

هناك نقطه وهى استعمال البور سبلاى لمدة عام سنه او 9 شهور كامله

ولنفترض حسن النيه فى هذا المووضع

اظن من حقناااا ان نفخص البور سبلاى وان نرى الفاتوره الشراء

ولذلك اطلب منك ان تتفضل مشكورا وان تتصل بى المهندس مصطفى وتتفق معاه على موعد نفحص البور سبلاى وان شاء الله كل خير

وذلك وعد منى ان تكون مرضى فهذه سياسة شركتناااا

فنحن لا ناكل حق احدا فى شىء ولكن هناك استفسار ولم ترد عليه هذا البور سبلاى ما هو تاريخ شرائه

ومع ذلك نفترض حسن النيه لدى عملائنااا اتمنى ان تتصل بى المهندس مصطفى وتذهب الى الشركه وليس عن طريق الموزع حتا يتسنى لنا مساعدتك فى مشكلتك

وشكرا

شريف عبد العظيم

محمد الجوهري

24-01-2011, 21:46

بعد إذن الشيخ مبارك سأقوم بالرد تعقيباً حول هذه النقطة:

التجاهل هذا متوقع لأن بعض من المشرفين والأعضاء النشطاء لهم علاقة بالوكيل بطريقة مباشرة أو غير مباشرة, شاي بالياسمين, ولو عضو اتكلم على الوكيل بكلمة ممكن يتمسح عضويته زي محصل قبل كده بحجة ان الوكيل عرض استرجاع كامل المبلغ المدفوع في البورات المغشوشة, وها هو الوكيل يرفض هذا ويتهمك باسلوب مستفز.

ياريت يا أخي تتكرم و تساعدنا و تعرفنا اللي إحنا ما نعرفوش, مين المشرفين دول؟ و ما علاقتهم بالوكيل المذكور ؟
من الأعضاء النشطين, و ما علاقتهم بالتوكيل المذكور ؟

ماذا تقصد بكلمة "شاي بالياسمين" .. انا أعرف لها معنى واحد فقط و هي: رشوة !
هل قامت الشركة برشوة أيّ من المشرفين و الأعضاء النشطاء ؟ و لو حدث هل من الممكن ان تحكي لنا التفاصيل و أعدك أن نقوم باللازم معهم :)

ماذا حدث من قبل, و من حذفت عضويته ؟

أخي الكريم, تم تحويلك لعضوية مزدوجة أنت و الأخ hany103 ... سأرفع الحظر عنكما لكي تحكي لنا يا أخي عما تحدثت عنه :)

محمد الجوهري

24-01-2011, 21:56

حقيقه انا مستغرب جدا من التجاهل سواء من الوكيل , المشرفين , الاعضاء

حسبي الله ونعم الوكيل في الظالم

ثاني رد في الموضوع كان لمشرف, اللي هو انا :)
وضحت لك في ردي إستفسارك عن الرامات بإستفاضة شديدة, و تحدثت معك دون ان أبخل بأي رد. لماذا تقول: "حسبي الله و نعم الوكيل" ؟

ام أنك تريدنا أن نأتي و نقوم بتغيير المزود بأنفسنا, لو ده يرضي حضرتك أنا ما عنديش مانع أسافر لك يوم كامل علشان
بس ما تقولش فينا: "حسبي الله و نعم الوكيل" ... يا دكتور :)

dr.ahmed shahin

24-01-2011, 21:56

اخى خالد الاستاذ شريف عمل اللى عليه قالك هات الباور وهو يشوف اللازم ارسل له الباور وان شاء الله خير

MenDo

25-01-2011, 02:24

ا- شريف

باذن الله لن نختلف وسوف نصل الي حل الموضوع ويكفينى ردك الذي اثلج صدري

الباور قمت بتسليمه لماكسيمم هاردوير الاسبوع الماضي , لذا فبالتاكيد هو في الصيانه

تم شراء الباور 9\2009

ان شاء الله ساتصل بـ م- مصطفى قبل صلاه الظهر وان شاء الله خير

======================================

الى ا- محمد الجوهري
انا والله لم اكن اقصد بها احد ابدا , كل الموضوع لحظه ضيق وليس اكثر