المساعد الشخصي الرقمي

مشاهدة النسخة كاملة : Unboxing طويل للوحة الأم المذهبة ASRock Fatal1ty بشريحة P67


الصفحات : [1] 2
kikokika2010
13-07-2011, 21:04
بسم الله الرحمن الرحيم

نحن اليوم بصدد رؤية اللوحة الأم المذهبة من الشركة التى بدأ نجمها يرتفع فى سماء السوق المصرية ASRock والتى حصلت عليها بالصدفة دون تخطيط بل إنى سخرت من الذين يشترونها يوما ما :ah32:
حيث كنت قد خططت أن أشترى ASRock Z68 Extreme4 بعدما اذهلتنى
ثم دخلت للبائع وقد كنت اتفقت معه فسألنى أستاذ كريم؟ قولتله أيوة قالى بالحرف: الأزروك z68 خلصت
كدة بلا سلام بلا كلام:( كاد أن يغمى علىَ فى المحل ثم أحضر لى آخر لوحة Fatal1ty عنده فدخلت دماغى واشترتها(رغم أنى لما رأيتها على الأنترنت لم تعجبتى بتاتاً ولكن رؤيتها على الحقيقة وهم :D)

دة اول موضوع ليا فى المنتدى رغم انى عضو قديم ذى مانتوا شايفين ودة غالبا راجع للكسل والثانوية العامية

اتمنى ان التصوير يعجبكم اكتر من الموبو مع العلم ان تم تخفيض الدقة للربع مع ضغط الصور لتقليل حجم التحميل وإذا اراد احدكم يمكننى رفع الصور ذات الدقة الكاملة للجميع

نبدأ بسم الله
من أول نظرة على علبة اللوحة تحس بالفخامة وتحس أنك تمسك لوحة أحترافية بالفعل أنطلاقا من حجمها و جودة مادتها
تزين العلبة شعار Tom's hardware APPROVED وال XFast USB وال B3 وامضاء الحاج Fatal1ty


https://img20.imageshack.us/img20/9720/p1120866x.jpg



عندما تقلب العلبة تجد صورة للوحة بها بعض الـ Features
ونجد على اليمين Specs بعدة لغات العربية ليست منهم
ثم فى الأسفل استعراض لأبرز الميزات وهى:-
1- الـ UEFI بديل البيوس والآخذ فى الأنتشار
2- F-Stream وهو البرنامج المدمج لقياس الحرارة والتردد والOverClocking واعتقد أنه رائع
3- LAN ثنائى يدعم خاصية الـ Teaming وهو ان يعمل الأتصالان كأتصال واحد مما يضاعف ال Bandwidth ويتغلب على الأعطال فى حال انقطاع اتصال احدهما فينتقل الضغط على الآخر
4- مجموعة من البرامج الأضافية وهى THX TrueStudio PRO و SmartView و AIWI



https://img809.imageshack.us/img809/4979/p1120869.jpg



نترقب بشدة أول لقاء من اللوحة ولمزيد من التشويق نكتفى بفتح الغلاف (إن جازت التسمية) فيبهرك منظرها
ننظر إلى الجانب الأبسر فنجد قصة الحاج Fatal1ty التى قرأت منها عدة أسطر فقط ثم اندفعت كالمجنون للوحة نفسها
ثم نجد صور مقربة من اللوحة نفسها زيادة فى الأبهار


https://img190.imageshack.us/img190/20/p1120868d.jpg


تفتح العلبة وتخرج اللوحة أملا فى مسكها فتجدها داخل صندوق آخر أمعانا فى التعذيب وينطق كل ركن بجود الصنع فتشعر انك انفقت نقودك على لوحة احترافية فعلا فتقل حرقتك عليها :D



https://img829.imageshack.us/img829/4886/p1120872l.jpg


عندما نفتح الصندوق نجد صندوقين آخريين (يا للملل) وزيادة فى التشويق خلينا فى الصندوق الذى لا يحمل اللوحة


https://img135.imageshack.us/img135/5562/p1120879f.jpg

نفتح العلبة يا ترى ما بها ؟

https://img27.imageshack.us/img27/2207/p1120880.jpg



نفرط الحاجات ونبدأ المعاينة
نجد (من اليمين) ستة كابلات ساتا 3 كبلين تحويل من من مولكس إلى ساتا كبل IDE حجرى للهارد وآخر للفلوبى الBackPanel و Quick Installation Quide (قريته كله ما هى الموبو غالية :D) وبعض الأوراق الآخرى
فتحتى USB3 أضافيتان واسطوانة التعريفات والبرامج والمفاجأة كبل SLI ودة شى غريب أنه يجى مع الموبو
https://img828.imageshack.us/img828/9186/p1120885.jpg


هيا بنا يا رجااال كما قال الراحل علاء ولى الدين مع أول لقاء مع الموبو
نجدها داخل علبتها الأخيرة (لسة مالمستهاش هتجنن يا ناس)


https://img263.imageshack.us/img263/9830/p1120878y.jpg


لكم أن تتخيلوا انى من لهفتى نسيت اصور الموبو بعد ما خرجتها من علبتها :confused::confused: واكتفيت بعمل صور ماكرو فسامحونى
صورة من الموقع ليست من تصويرى

https://www.asrock.com/mb/photo/Angle/Fatal1ty P67 Professional(m).jpg


لذلك فكرت أنى ممكن اضع صورة من تصويرى بعد تركيب الجهاز بالكامل وأكرر اسفى

https://img847.imageshack.us/img847/4599/p1120988.jpg
https://img339.imageshack.us/img339/4599/p1120988.jpg


وبالمناسبة يا شباب لو تأخذوا بالكم الشركة أختارت أسوء مكان ممكن لوضع مقبس 8Pin الخاص بالمعالج (أحد عيوب اللوحة)
وكان هذا يهدد بفشل الكيبل مانجمينت بالكامل لولا وضعته بالشكل المبين ولكنى أحس بضغط كبير على السلك فهل هذا خطر



نبدأ بالجزء الجميل فحص اللوحة حتة حتة
أحب أن أبدأ بالركن الأيمن السفلى نجد زرين Power , Reset
كما نجد الشاشة العبقرية (والتى انتشرت الآن فى معظم اللوحات الأحترافية) والتى يسمونها هنا Dr.Debug والتى تعرض أكواد منها أكواد الخطأ لتسهيل أكتشاف الأعطال


https://img849.imageshack.us/img849/9241/p1120886.jpg


https://img30.imageshack.us/img30/9915/p1120891.jpg


وصورة لهم فى الظلام أثناء العمل بالمناسبة (A9 = Start of Setup)

https://img96.imageshack.us/img96/2764/p1120997.jpg


ننتقل لأعلى فنجد علامة البرق وحرف الـ F فى آن واحد ترقد تحتهما شريحة P67

https://img11.imageshack.us/img11/108/p1120892x.jpg


نتحرك إلى اليسار فنجد المشتت الضخم لحاجة أنا مش فاكرها تربطه انبوبة حرارية بمشتت الPhase Power
تلمع عليها جملة Fatal1ty Gaming Gear والتى تكفى لأسالة لعابك


https://img155.imageshack.us/img155/9866/p1120893.jpg


نتحرك إلى منطقة المعالج فنجد مشتت الPhase Power وهو جدير بالأحترام حيث أنه V16+2 والتى تضمن لك مستوى خرافى من الأوفر كلوك
ونجد أمضاء الحاج Fatal1ty والذى بدأت أكرهه
وكلمة Professional Series


https://img24.imageshack.us/img24/8239/p1120896.jpg


https://img96.imageshack.us/img96/851/p1120897r.jpg


لمن لا يعلم فالمكثفات التى تعلو هذا السطر مباشرة ذهب أى نعم أنت قرأتها صح إنها ذهب ولذلك استحقت اللوحة لقب المذهبة بجدارة

جانب آخر للمشتت والمكثفات الذهب (ايوة بكررها :D) ويظهر البروسيسور كاب


https://img834.imageshack.us/img834/4072/p1120898.jpg


نترك هذة المنطقة "اللبش" ونذهب لمنطقة هادئة عند مقابس كابلات الساتا فنجد 4 SATA2 ثم 6 SATA3 ينقسموا إلى 2 مدمجين على الشريحة P67 و4 على متحكم مارفيل يدعم البووت ولكنه غير مفضل

https://img846.imageshack.us/img846/4166/p1120903.jpg



ثم صورة ماهاش أى تلاتة لازمة بس عاجبانى لجزء من حرف F على مشتت P67

https://img192.imageshack.us/img192/723/p1120906.jpg



صورة مقربة لأسفل اللوحة
نرى فيها وصلة باللون الأحمر للـ Front Panel IEEE 1394
أسفلها لليمين نجد أماكن لمروحتين Chassis Fan (كما نجد وصلة أخرى لمروحة أعلى اللوحة على اليمين ) وعلى أقصى اليمين نجد زر الباور وأسفله System Panel Header
ونلمح المكثفات الذهبية (نعم مرة أخرى :D:D:D)


https://img853.imageshack.us/img853/6956/p1120913.jpg





ثم أخيرا نصل إلى الBack Panel
وهى بالتفصيل من اليمين
مخارج الصوت Channel 7.1 و 2 USB3 يعلوهما فتحة LAN ثم البرج الأحمر وهو من الأسفل eSATA3 ثم IEEE1394 ثم USB2 ثم USB2 اخرى تعمل ك Fatal1ty Mouse Port
ثم 2 USB2 ثم LAN آخر ثم SPDIF Out Port بنوعيه Coaxial و Optical ثم زر Clear CMOS الشهير ثم الفتحات الأثرية للماوس والكيبورد


https://img839.imageshack.us/img839/1095/p1120912x.jpg



وصورتان فنيتان للمعالج وهو يرقد على عرشه الفخم الملئ بالدبابيس رغم يظهر فى اروع منظر
ارجو أن تعجبكم (خاصة أن المكثفات ..... يووووه عرفنا يا عم)


https://img855.imageshack.us/img855/971/p1120929.jpg


https://img856.imageshack.us/img856/2092/p1120930u.jpg


وأخيرا وليس آخرا المنظر النهائى بعد تركيب رامات الأنتقام Vengeance ووضع المشتت الحقير إلى أن أشترى مشتت يوجع جيبى

https://img804.imageshack.us/img804/2569/p1120945b.jpg



كلمة النهاية:
أعلم أن كثير من الناس يضع ماركة ASRock من ماركات الصف الثانى (اول مرة اسمع عنها كانت من 45 يوم بالضبط) لكنى فوجئت بمدى جودة الصنع فعمتنى عن أقاويل الناس التى لا تنتهى
حتى اسبوعان كنت أظن أن شرا P67 يعد غباء :eek::eek: ولكن بعدما صدمت بأن Gigabyte قد قررت التخلى عن المعالج الرسومى المدمج iGPU فى لوحاتها الأحترافية وجدت أن لا مبرر من شراء z86 اللهم إلا إذا كانت ASUS أو ASRock
إنى أجد هذة اللوحة عبقرية من حيث السعر مقابل القيمة الأداء
حيث أن اللوحة البالغ سعرها 1600 جنية تعادل 2500 أو يزيد من Gigabyte واستشعر جودة أكبر فى الصنع فى الASRock
أكبر عيب بالنسبة لى كما سبق أن ذكرت هو مكان وصلة المعالج 12V الذى يتسم بالغباء خاصة وأن أغلب الكيسات الأحترافية تضع الPSU بالأسفل وأفيدونى رجاء إذا كان الوضع الحالى خطر
كما أن أسطوانة التعريف عند أستخدام خاصية Install All تثبت اختصار لأحد مواقع الألعاب فى Quick Launch ويعود كلما مسحته
كما أن كثرة امضاءات الحاج Fatal1ty وصورته التى تقفز كلما فتحت الجهاز أو الـ UEFI كرهتنى فيه :D
سيتم أضافة أى عيوب أصل إليها أثناء الأستخدام

أنا لا أعلم كيف يمكن عمل Review لبوردة لذلك إذا تفضل أحد أعضاء الفريق الرسمى بالشرح سأكون مسرور لعمل review ل i5 2500K on Fatal1ty ونشوف هنوصل لكام فى كسر السرعة

أرجو أن أكون قد وفقت فى الموضوع وأتقبل النقد لأحسن الموضوع
ويمنع النقل أثق فى امانة كل شخص ولقد رفضت وضع حقوق على الصور لثقتى فى امانتكم
MERCURY 77
14-07-2011, 03:16
أولا الف مبروك عزيزي ( من كثر فرحتك باللوحه افرحتنا معك )

نقاط سريعه:

- Asrock شركه مميزه تستمد خبراتها من الام asus حتى اصبحت تهددها مؤخرا ولي تجربه قديمه معها

- مكان مغذي المعالج موفق جدا حتى تمد السلك مباشره الى الاعلى من خلف الكيس (الكيبل منجمت تعتمد ايضا على طول كيبلات البور سبلاي )

- Fatal1ty تصنف كـ راس الحربه للشركه فتمنيت ان يزودوها بأشياء كماليه كـ واير لس مدمج + بلو توث ....

قلبي داعيلك
yassermsire
14-07-2011, 03:31
الف مبروك علي اللوحة و اعجبني asrock fatalty seris و تصوير اكثر من رائع
Inconnu
14-07-2011, 08:04
ألف مبروك , اللوحة شكلها يتصف بالفخامة .
وأنا مع تجربتي معها لوحاتها ممتازة ذات كفائة .
وهي مستعدة للتنافس مع الشركات الاخرى.
والتصوير كان ممتاز , سلمت عليه.
:)
Asad_AL_net
14-07-2011, 12:01
صرااااحة لوووحة قمة في الفخااامة واهنيء شركة ASRock عليها وعلى ماقدمته من مميزات لم يسبق لي ان اراها في لوحاتها :rolleyes:
shanks
14-07-2011, 13:19
ماشاءالله .. الله يعطيك خيرها ويكفيك شرها وتتهنى بها لآخر قطرة.

لوحة في قمة الروعة والفخامة.
EL-MARIACHY
14-07-2011, 14:02
رائعه رائعه بكل المقايسس ألف الف مبروك يا اخى و تتهنى بيها ان شاء الله

هل كسرت المعالج أم لسه ؟
kikokika2010
14-07-2011, 14:06
أولا الف مبروك عزيزي ( من كثر فرحتك باللوحه افرحتنا معك )

نقاط سريعه:

- Asrock شركه مميزه تستمد خبراتها من الام asus حتى اصبحت تهددها مؤخرا ولي تجربه قديمه معها

- مكان مغذي المعالج موفق جدا حتى تمد السلك مباشره الى الاعلى من خلف الكيس (الكيبل منجمت تعتمد ايضا على طول كيبلات البور سبلاي )

- Fatal1ty تصنف كـ راس الحربه للشركه فتمنيت ان يزودوها بأشياء كماليه كـ واير لس مدمج + بلو توث ....

قلبي داعيلك

شكرا على الرد اللذيذ
مع حق خاصة فى البلوتوث خاصة أنه غير مكلف (تتعوض إن شاء الله :D:D)
لكن هل رأيت السلك وهل تظن أن الوضع الحالى خطر



الف مبروك علي اللوحة و اعجبني asrock fatalty seris و تصوير اكثر من رائع




ألف مبروك , اللوحة شكلها يتصف بالفخامة .
وأنا مع تجربتي معها لوحاتها ممتازة ذات كفائة .
وهي مستعدة للتنافس مع الشركات الاخرى.
والتصوير كان ممتاز , سلمت عليه.
:)

شكرا أخجلتم تواضعى :o


ماشاءالله .. الله يعطيك خيرها ويكفيك شرها وتتهنى بها لآخر قطرة.

لوحة في قمة الروعة والفخامة.




صرااااحة لوووحة قمة في الفخااامة واهنيء شركة ASRock عليها وعلى ماقدمته من مميزات لم يسبق لي ان اراها في لوحاتها :rolleyes:

شكرا وأرجو أن يكون الموضوع أعجبكم
kikokika2010
14-07-2011, 14:12
رائعه رائعه بكل المقايسس ألف الف مبروك يا اخى و تتهنى بيها ان شاء الله

هل كسرت المعالج أم لسه ؟

ل4.0 فقط بخطوة واحدة وكان ثابت بس درجة الحرارة عالية بسبب استخدام مشتت انتل الأفتراضى
bits&bytes
14-07-2011, 19:52
ما شاء الله. طيب أنا عندي لك سؤالين.

1- إنت إشتريتها من سوق الكمبيوتر ولا من سوق الذهب؟

2- أكيد وزنتها قبل الشراء :D لانه المعدن إياه غالي اليومين دول

وكمان سؤال أخير.... هي اللوحة سعرها ينزل ويرتفع مع سعر الذهب ولا إيه نظامها يعني؟
kikokika2010
14-07-2011, 20:16
ما شاء الله. طيب أنا عندي لك سؤالين.

1- إنت إشتريتها من سوق الكمبيوتر ولا من سوق الذهب؟

2- أكيد وزنتها قبل الشراء :D لانه المعدن إياه غالي اليومين دول

وكمان سؤال أخير.... هي اللوحة سعرها ينزل ويرتفع مع سعر الذهب ولا إيه نظامها يعني؟

صباحو فل يا معلم
أنا ملاحظ أنى من ساعة ما جبت الكمبوتر دة إن مستوى التهييس عندى بدأ يقل لدرجة أنى مش عارف أرد دلوقتى
عامة نورت الموضوع :D
EL-MARIACHY
14-07-2011, 21:21
أهى البورده تنفع برده وقت الجواز و الخطوبه ، انت عارف اسعار الذهب دلوقتى قد إيه !!

لما تتزنق تلفها لها و تقول لها أدى الشبكه و المهر و قسط الشقه :D
mouhammed963
14-07-2011, 23:12
ألف مبروك
لو AsRock قامت بوضع ملايين للترويج لهذه البورد لما قامت بهذه المراجعة الرائعة :cool:
انت خليتني أفكر أشتري بورد مثلها :D
kikokika2010
15-07-2011, 11:55
أهى البورده تنفع برده وقت الجواز و الخطوبه ، انت عارف اسعار الذهب دلوقتى قد إيه !!

لما تتزنق تلفها لها و تقول لها أدى الشبكه و المهر و قسط الشقه :D


بإذن الله ربنا لا يجيب زنقة وقتها وسعتها ممكن العروسة تقولى ""يععع مافيهاش PCIe 3.0"" :ah26::ah26:



ألف مبروك
لو AsRock قامت بوضع ملايين للترويج لهذه البورد لما قامت بهذه المراجعة الرائعة :cool:
انت خليتني أفكر أشتري بورد مثلها :D

الله يبارك فيك
من بعض ما عندكم ولو هتشتيريها ألحق عشان قربت تبقى Out Of Stock
DoCToR.TaHeR
15-07-2011, 14:53
لوحة اكثر من ممتازه صراحه .. ابدعت فيها ASROCK ..

تصوير ممتاز بالمناسبة ,, ربنا يباركلك فيها ويديك خيرها ويكفيك شرها :)

ولكن لي ملاحظه خارج المراجعه : أن اكثر من 90% من موديلات اللوحات ال ASROCK التي دخلت مصر ,, سعرها مبالغ فيه بطريقه ملحوظه جدا :(
kikokika2010
15-07-2011, 17:20
لوحة اكثر من ممتازه صراحه .. ابدعت فيها ASROCK ..

تصوير ممتاز بالمناسبة ,, ربنا يباركلك فيها ويديك خيرها ويكفيك شرها :)

ولكن لي ملاحظه خارج المراجعه : أن اكثر من 90% من موديلات اللوحات ال ASROCK التي دخلت مصر ,, سعرها مبالغ فيه بطريقه ملحوظه جدا :(

ربنا يخليك
وعتدك حق 100% فى موضوع الأسعار وقلت الكلام دة لكريم فى هاى ايند لكن التسعير من الوكيل ويبدو أن التسعير المبالغ فيه عشان مفيش منافسين يقدموا نفس الجودة فى نفس الفئة السعرية لأن جيجابايت بتهرج
ونورت الموضوع
| OMA |
15-07-2011, 17:42
أن اكثر من 90% من موديلات اللوحات ال ASROCK التي دخلت مصر ,, سعرها مبالغ فيه بطريقه ملحوظه جدا

+1

--------------------------
مراجعه متميزه - تصوير ممتاز

مبروك عليك
كان ودي
15-07-2011, 18:48
الف مبروك تستاهل كل خير
:ah4:
kikokika2010
15-07-2011, 22:05
+1

--------------------------
مراجعه متميزه - تصوير ممتاز

مبروك عليك


الف مبروك تستاهل كل خير
:ah4:

شكرا لمروركم وعقبالكم إن شاء الله :D
White Ghost
17-07-2011, 19:10
مبروك عليك , جودة الصور ممتازة !
ZEX
17-07-2011, 19:28
البورده , ماشاء الله و سعرها ممتاز بالنسبه لمصر
و التقرير جميل بارك الله فيك
تم;)
محمد الجوهري
17-07-2011, 19:47
الحقيقة أنا شغال على إنترنت بسرعة 64 كيلو في الساعة :D، و على الرغم من كدة صبرت حتى تحميل معظم الصور و رؤيتها بالتفصيل.

و لا يوجد أي تعليق إلا أنك "فنــــــــان" أو "أستـــــــاذ" :)

ربنا إن شاء الله هيرزقك و هتشتري مشتت احترافي تكمل بيه المجموعة الخاصة بك :)

مراجعات اللوحات الأم مُعقدة بعض الشيء لعدة أسباب منها أن أداء اللوحات -غالباً- يكون متقارب للغاية, و لا توجد سُبُل للمفاضلة بين لوحة و الأخرى إلا بالمزايا التي تقدمها كل لوحة. و ربما تستبعد لوحة ما بسبب عيب معروف فيها, و ربما تشتري
لوحة بسبب ميزة رهيبة فيها (في لوحات X58 مثلاً يعتبر كثيرون أن اللوحة القادرة على الوصول لأعلى BCLK هي الأفضل من غيرها). لعمل تقرير جيد عن اللوحة يمكنك:
1. ضرورة شرح خصائص اللوحة بشكل عام, و خاصة المزايا الحصرية في اللوحة.
2. تشريح اللوحة قطعة قطعة, يجب شرح كل متحكم و كل شريحة على اللوحة قدر المستطاع.
3. التركيز على كل منطقة على حدى, فمثلاً ابدأ بمنطقة المعالج و اشرح تصميمات دوائر تنظيم الطاقة, ثم انتقل لمنطقة الذاكرة و اشرح خصائص الذاكرة, ثم انتقل لشرح منطقة كيبلات sata.
4. من أهم المناطق منطقة شقوق PCI-E و بيان تنظيمها و كيفية عملها سوياً و السرعة.
5. اللوحة الخلفية من المناطق التي تهم المستخدم أيضاً.
6. قم بعمل بعض الاختبارات التي نجريها عند اختبار اللوحات الأم, يمكنك الإضافة إليها و يمكنك التخلي عن بعضها, الأمر عائد إليك.
7. قم بعمل Unboxing للوحة, شخصياً أعتبر أن ما فعلته اليوم رائع, لكن حبذا لو تتحدث عن كل قطعة على حدى, الأمر قد يبدو ممل, لكن صدقني أنا زمان كنت أتمنى أرى موضوع مثل موضوعك لكي أقرأه على مداير يومين.
8. أي شيء غريب يقابلك قم بالتعليق عليه, يعني مثلاً كيبل SLI ملفوف في كيس أسود, تحس إنه كيس خميرة من بتاعة العيش :D :D
9. كسر السرعة تجربة هامة جداً, و تهم كثيرين. لوحتك بها خاصية تطبيق إعدادات كسر السرعة بشكل تلقائيّ حتى سرعة 4.8 جيجاهرتز. شخصياً لا أرى المستخدم يحتاج شيء بعد 4.8 جيجاهرتز.
10. تعليقك الختامي حول ما ستلاحظه على اللوحة خلال فترة التشغيل.
11. أرجو ألا تعتبر هذا تدخلاً في خصوصياتك أو رأيك, لكن حبذا لو تضع شعار الموقع على الصور, و هذا أمر عائد إليك و لا دخل لي فيه.
12. نسيت, مش عارف ليه إحنا العرب بنحب نصور كل حاجة داخل بيوتنا, إيه المانع لو أخدت البوردة فوق السطوح و صورتها, أو في حديقة عامة, أو على قهوة في الشارع, أنا مش بهزر على فكرة
من الجيد إنك تصور قطع الهاردوير في البيئة الطبيعية, لأن بصراحة الصور الضلمة بتجيب لي إكتئاب. أنا مش بعيب في تصويرك الذي أراه أكثر من ممتاز.
13 حاجة كمان, إيه المانع لو كل واحد فينا اشترى قطعة هاردوير أخدها راح صورها في استوديون و دفع له 10 جنيه؟ أنا عملت كدة مع مراجعة سماعات الرأس بتاعتي الله يرحمها (المراجعة مش السماعة :D) و النتيجة كانت جيدة جداً.
14. الحس الفكاهيّ في مراجعتك له نكهة ممتازة للغاية :)

خارج الموضوع: ما شاء الله الشباب مبهورين بجودة التصوير, لماذا لم أرى تعليقكم على مستوى الصور في مراجعاتنا الرسمية؟ :)

هذه الأمور تحضرني الآن, و اعذرني لعدم تقديم النصح الكافي, لدينا أول نسخة نزلت على أرض مصر من هذه اللوحة, و لم نستطع نشر المراجعة حتى الآن بسبب كثرة المراجعات, لكنني أعدكم أن الأسبوعين القادمين سيكون بهما مجموعة
من المقالات الهامة و المراجعات التي ستعجبكم إن شاء الله.
محمد الجوهري
17-07-2011, 19:48
صحيح: عملت إيه في الثانوية العامة؟ :)
أنا من إمبارح شغال بيبسي 24 ساعة :D :D
omaar97
17-07-2011, 20:18
خارج الموضوع: ما شاء الله الشباب مبهورين بجودة التصوير, لماذا لم أرى تعليقكم على مستوى الصور في مراجعاتنا الرسمية؟ :)

طبيعي يا أستاذ محمد أن يحدث هذا لأن المراجعة مقدمة من شخص واحد

أما معمل المراجعات فمن المؤكد أنه يوجد استوديو خاص أو ما شابه للتصوير فهذه مراجعة يمكن أن يراها كل من في العالم ولهذا من الأولويات التصوير الاحترافي بينما مثل هذه المراجعة ترى الكثير مثلها والتصوير يكون سيء
yassermsire
17-07-2011, 20:28
[QUOTE=omaar97;1937749]طبيعي يا أستاذ محمد أن يحدث هذا لأن المراجعة مقدمة من شخص واحد


طبيعي ان يكون تصوير مراجعات العرب هاردوير الرسمية ان يكون ممتاز و اعتقد ان العرب هاردوير سوف يكون مصدر المرجعات الاول في العالم بعد مرور وقت قليل

و كيف حالك اخي محمد امتي سوف تذهب للجيش :D:D:D
kikokika2010
18-07-2011, 00:16
الحقيقة أنا شغال على إنترنت بسرعة 64 كيلو في الساعة :D، و على الرغم من كدة صبرت حتى تحميل معظم الصور و رؤيتها بالتفصيل.

و لا يوجد أي تعليق إلا أنك "فنــــــــان" أو "أستـــــــاذ" :)

ربنا إن شاء الله هيرزقك و هتشتري مشتت احترافي تكمل بيه المجموعة الخاصة بك :)

مراجعات اللوحات الأم مُعقدة بعض الشيء لعدة أسباب منها أن أداء اللوحات -غالباً- يكون متقارب للغاية, و لا توجد سُبُل للمفاضلة بين لوحة و الأخرى إلا بالمزايا التي تقدمها كل لوحة. و ربما تستبعد لوحة ما بسبب عيب معروف فيها, و ربما تشتري
لوحة بسبب ميزة رهيبة فيها (في لوحات X58 مثلاً يعتبر كثيرون أن اللوحة القادرة على الوصول لأعلى BCLK هي الأفضل من غيرها). لعمل تقرير جيد عن اللوحة يمكنك:
1. ضرورة شرح خصائص اللوحة بشكل عام, و خاصة المزايا الحصرية في اللوحة.
2. تشريح اللوحة قطعة قطعة, يجب شرح كل متحكم و كل شريحة على اللوحة قدر المستطاع.
3. التركيز على كل منطقة على حدى, فمثلاً ابدأ بمنطقة المعالج و اشرح تصميمات دوائر تنظيم الطاقة, ثم انتقل لمنطقة الذاكرة و اشرح خصائص الذاكرة, ثم انتقل لشرح منطقة كيبلات sata.
4. من أهم المناطق منطقة شقوق PCI-E و بيان تنظيمها و كيفية عملها سوياً و السرعة.
5. اللوحة الخلفية من المناطق التي تهم المستخدم أيضاً.
6. قم بعمل بعض الاختبارات التي نجريها عند اختبار اللوحات الأم, يمكنك الإضافة إليها و يمكنك التخلي عن بعضها, الأمر عائد إليك.
7. قم بعمل Unboxing للوحة, شخصياً أعتبر أن ما فعلته اليوم رائع, لكن حبذا لو تتحدث عن كل قطعة على حدى, الأمر قد يبدو ممل, لكن صدقني أنا زمان كنت أتمنى أرى موضوع مثل موضوعك لكي أقرأه على مداير يومين.
8. أي شيء غريب يقابلك قم بالتعليق عليه, يعني مثلاً كيبل SLI ملفوف في كيس أسود, تحس إنه كيس خميرة من بتاعة العيش :D :D
9. كسر السرعة تجربة هامة جداً, و تهم كثيرين. لوحتك بها خاصية تطبيق إعدادات كسر السرعة بشكل تلقائيّ حتى سرعة 4.8 جيجاهرتز. شخصياً لا أرى المستخدم يحتاج شيء بعد 4.8 جيجاهرتز.
10. تعليقك الختامي حول ما ستلاحظه على اللوحة خلال فترة التشغيل.
11. أرجو ألا تعتبر هذا تدخلاً في خصوصياتك أو رأيك, لكن حبذا لو تضع شعار الموقع على الصور, و هذا أمر عائد إليك و لا دخل لي فيه.
12. نسيت, مش عارف ليه إحنا العرب بنحب نصور كل حاجة داخل بيوتنا, إيه المانع لو أخدت البوردة فوق السطوح و صورتها, أو في حديقة عامة, أو على قهوة في الشارع, أنا مش بهزر على فكرة
من الجيد إنك تصور قطع الهاردوير في البيئة الطبيعية, لأن بصراحة الصور الضلمة بتجيب لي إكتئاب. أنا مش بعيب في تصويرك الذي أراه أكثر من ممتاز.
13 حاجة كمان, إيه المانع لو كل واحد فينا اشترى قطعة هاردوير أخدها راح صورها في استوديون و دفع له 10 جنيه؟ أنا عملت كدة مع مراجعة سماعات الرأس بتاعتي الله يرحمها (المراجعة مش السماعة :D) و النتيجة كانت جيدة جداً.
14. الحس الفكاهيّ في مراجعتك له نكهة ممتازة للغاية :)

خارج الموضوع: ما شاء الله الشباب مبهورين بجودة التصوير, لماذا لم أرى تعليقكم على مستوى الصور في مراجعاتنا الرسمية؟ :)

هذه الأمور تحضرني الآن, و اعذرني لعدم تقديم النصح الكافي, لدينا أول نسخة نزلت على أرض مصر من هذه اللوحة, و لم نستطع نشر المراجعة حتى الآن بسبب كثرة المراجعات, لكنني أعدكم أن الأسبوعين القادمين سيكون بهما مجموعة
من المقالات الهامة و المراجعات التي ستعجبكم إن شاء الله.


صحيح: عملت إيه في الثانوية العامة؟ :)
أنا من إمبارح شغال بيبسي 24 ساعة :D :D


مش هأقدر أقول غير أنى مصدوم من الرد
عمرى ما تخيلت أنك ممكن تقعد تكتب كل دة عشان أنا مجرد سألت المراجعة بتتعمل أزاى :D
أنا فرحان مش قادر أقول أكتر من كدة
أسمحلى أقولك ومش منافقة كلام بصراحة شديدة
-- أنا بكره المنتديات لأنها بتستهلك وقت فلكى طب ممكن تسأل لية عملت الموضوع دة
-- هرد أن هذا الموضوع مجرد رد للجميل لأنى أنقطعت عن الهاردوير لمدة سنتين كاملتين وعندما قررت العودة أحسست أنى Alien << معلومة على الماشى: قبل هذا الأنقطاع كنت أعمل فى فترة الصيف فى شركة برمجيات كبيرة فى إدارة الMIS وكنت بستعين بالمنتدى برضة
-- فقرأت كثيرا لعتاولة المنتدى حتى عدت للفورمة مرة أخرى وهو ما ساعدنى كثيرا حتى وصلت للتجميعة الحالية التى كنت لا أحلم بها :D
-- معمل عرب هاردوير بصراحة مفيد أكتر من Tom's Hardware يعيبه فقط قلة الأنتاج وهو ما سوف ينحل بمرور الوقت
-- واستايل التصوير اقتبسته نصا (بصراحة) من معملكم عن طريق وضع الصور على خلفية بيضاء فتبدو وكأنها تطفو وصور الماكرو التى أعشقها شخصيا
-- بالمناسبة لا تتخيل فرحتى لعودة هاى ايند خصوصا بعد ما قبلت كريم شخصيا هناك رغم أنه كان ناوى يضربنى :ah26: :D
-- ملاحظة كوميدية: اول ما شفت مرجعة الZ68X-UD7 اللى هى تقريبا كانت 47 صفحة :eek: قولت بالنص: هم بيستهبلوا طب يشوفوا مين اللى هيقعد يقرا 47 صفحة بس المشكلة أنى قعدت قرتهم كلهم :o:o
-- ومن المرة الجاية شعار الموقع هيلالى كدة بإذن الله

-- وبالنسبة لموضوع التصوير خارج البيت صحيح 100% ودة اللى بعمله دايما بس كانت الساعة 3 AM
-- بالنسبة للسؤال بتاع ثانوية الكئيبة الحمد لله تمام جدا انا هصغر النتيجة عشان تبقى مش واضحة خالص :D:D 99.3% رياضة
-- بشكرك جامد على ردك المشجع الجميل المفيد وأخجلتنى بذوقك وأنتظر منى أن شاء الله قريبا مراجعات (ولو المعمل مش هيراجع الموبو دى أنا فى الخدمة :ah4:)\


[QUOTE=omaar97;1937749]طبيعي يا أستاذ محمد أن يحدث هذا لأن المراجعة مقدمة من شخص واحد


طبيعي ان يكون تصوير مراجعات العرب هاردوير الرسمية ان يكون ممتاز و اعتقد ان العرب هاردوير سوف يكون مصدر المرجعات الاول في العالم بعد مرور وقت قليل

بإذن الله ويستمر على نفس المستوى المبهر
وشكرا لكل من مر على الموضوع أو تمنى لى حظ طيب

سؤال خارج الموضوع: هو أية حوار التقييم دة والشرط الخضرة اللى بقت تحت أسمى دة دة كدة بقيت صول :D
mohammed_kamal
18-07-2011, 00:31
لوحتى القادمه ان شاء الله
كنت افكر فى شرائها فى وقتها لكنى تحولت ل amd ارجو ان تبدع ل amd
اسلوبك فى الشرح والعرض على فكره شدنى بدرجه غريبه اكثر ممتاز
ولك احلى تقييم
kikokika2010
18-07-2011, 00:40
لوحتى القادمه ان شاء الله
كنت افكر فى شرائها فى وقتها لكنى تحولت ل amd ارجو ان تبدع ل amd
اسلوبك فى الشرح والعرض على فكره شدنى بدرجه غريبه اكثر ممتاز
ولك احلى تقييم

شكرا جزيلا والحمد لله نعمة وبإذن الله لن تندم على هذة اللوحة الإبداع

بس أنا لسة معرفتش أية حوار التقييم :D
ehab7bob
18-07-2011, 10:02
10076
10077

حضرتك الصور ديه متخدا ازاي ؟ انا حاسس ان مفيش خلفية ؟
kikokika2010
18-07-2011, 11:40
10076
10077

حضرتك الصور ديه متخدا ازاي ؟ انا حاسس ان مفيش خلفية ؟

فوتوشفيق :D