الآراء حول NetGear DGN1000

[Goldsmith]

إزيكم يا شباب :)
أنا غايب بقالي فترة عن المنتدى ومكنتش أحب أرجع بموضوع زي ده بس الظروف حكمت

عايز أشتري راوتر جديد - الميزانية آخرها 300 جنيه
المطلوب راوتر يشتغل 24 ساعة بدون تهنيج أو تقطيع ويكون فيه وايرلس حتى لو G عشان بحتاج أدخل من الموبايل أحيانا
التغطية لو هيغطي البيت كله 3 أدوار مساحة حوالي 150 متر يبقى كويس أوي لو هيغطي شقة واحدة أو شقتين مش مشكلة

بعد البحث لقيت راوتر NetGear DGN 1000 تمنه 300 جنيه بالتمام والكمال
شوفت آراء المستخدمين على newegg والراوتر عليه فييد باك وحش جدا بنسبة 60%
وإللي مخوفني إن في أكتر من موضوع على المنتدى هنا وفي منتديات تانية عروض بيع للراوتر ده وسبحان الله الناس كلها بتبقى لسة شارياه جديد وبيقولوا إنه زي الفل وشغال 100% ومع ذلك عاوزين يبيعوه لسبب غير مفهوم

ياريت آراء الناس إللي عندها الراوتر ده بالفعل عن تجربة وأكون شاكر جدا (وهديله تقييم :P كنوع من الرشوة)
وآراء إللي يعرف إيه الموجود في السوق في حدود الميزانية المذكورة ويكون واثق من إللي بيقوله
وأرجوكم مش عاوز واحد يدخل يقوللي أحسن حاجة 3com بدون ذكر موديل محدد وأدور عليه ما ألاقيش 3com في السوق أساسا
أو يكتب موديل ويطلع غالي لو تكرمتم ولو في معلومات عن أماكن الشراء مش هتخسر
أنا عموما هنزل أجيبه من السخاوي

[minamkina]

بالنسبة للواتر الى حضرتك بتتكلم علية اعتقد ان حضرتك غلطان فى السعر لانة على موقع كمبيو مى عامل 700 جنية
اما بالنسبة للرواتر فهو مش حلو اوى انا كنت اشتريتة من واحد مستعمل بس مع الاسف اول مرة شغلتة هنج منى وخلانى اشد فى شعرى عقبال ما عملتة كونفجريشين
وبردة كل ما توصلة على الكمبيوتر ساعات كدة بيستهبل وما تلاقيهوش بيدخل على الصفحة بتاعة الراوتر بس ما اعرفش اذا كان هو الراوتر اصلا كدة ولا الى انا كنت مشترية كان فية العيب دة من الاستخدام بس الى انا اشتريتة منة قالى انة شغال معاة زى الفل والصراحة الكلام طلع عكس ما هو قال خالص

انصح حضرتك لو عايز تشترى راوتر هاتلك LINKSYS فى راوتر منهم عامل فى حدود 300 جنية بس مش متذكر الموديل بالظبط دة بصراحة تحفة بمعنى الكلمة
ولو حضرتك عاوز تعرف الموديل انا ممكن ادور لحضرتك علية وابعتهولك

[Goldsmith]

أولا متشكر على ردك

ثانيا مفيش داعي لكلمة حضرتك

ثالثا أنا هتجنن ناس تقول لينكسس وناس تقول نت جير، وكلاهما يدعي أنه لا يوجد وجه للمقارنة أساسا
عشان كدة في تقديري الشخصي لا يمكن تعميم حكم واحد على كل شركة، وإنما الوضع يختلف من موديل لآخر.

رابعا، أنا متأكد من السعر وهو موجود في محل في سوق العصر
جايز يكون recertified والله أعلم هبقى أتأكد من رقم الموديل والسيريال
والراوتر غير موجود على compume الموجود DGN2000

خامسا معلش هتعبك لو تجيبلي الموديل بتاع الـlinksys
مع إني أشك إنه يكون في linksys بالسعر ده
أقل حاجة على compume بـ370 جنيه وده خارج الميزانية
ورغم إنه فارق بسيط والحمد لله الفلوس موجودة بس أنا مش مستعد أدفع 400 جنيه في راوتر.

[minamkina]

هو الراوتر ابو 370 على كمبيومى ممكن تشترية من اى مول باقل من كدة ممكن بكون حوالى 320
هو تقريبا الموديل wag54g