الأسم بتاعي في شهادة مايكروسوفت عايز اغيره

[Avionics]

السلام عليكم ورحمة الله وبركاته

أنا امتحنت أول امتحان في المايكروسوفت بس الأسم الأخير كان فيه غلطة بسبب اللي عمله قالي خلاص كده أنا مش هقدر اغيره غير لما تجيلك الشهادة و مش عارف ممكن تغير في الأسم

أعمل ايه دلوقتي؟؟؟؟

وهل لما هأغير الأسم الأمتحانات الجديدة هتتطلع بالأسم الجديد وهل ديه فيها مشكلة

وافرض امتحنت الأمتحانات كلها بنفس الأسم ... هل ممكن اغير الأسم وهو يبعتلي الشهادة بالأسم الجديد ....


حد يرد عليا ضروري

[m_gemi10]

وعليكم السلام ورحمة الله وبركاته:
بص ياباشا اللى هتعمله إنك تاخد الreport اللى خاته بعد الإمتحان هو والبطاقة الشخصية والpassport أو رخصة قيادة وتعمله scanner وتبعت لبروميترك رسالة فيها طلب تغير إسمك(باللغة الإنجليزية طبعاً) مع الحاجات اللى أخدتها scanner وبكده إسمك هيتغير في بروميترك واى امتحان تمتحنه هيجيلك بالإسم الجديد ان شاء الله في الشهادة.
وإبعت الطلب بتاعك علي الميل ده pro.globalcandidateservices@prometric.com
وخلي باللك طويل عشان بيقعدوا كتيير شوية لحد ماينفذوا حاجة بعنى 4 ايام مثلاً.وبالتوفيق ليك إن شاء الله

[m_gemi10]

علي فكرة عشااان مش أتوهك ده بالنسبة لتغير إسمك في بروميترك عشاان الشهادة بتجيلك بنفس الإسم اللى إنت كاتبه علي بروميترك تمااام فأعمل الخطوة الأولي اللى قولتلك عليها اولاً اوك، بعد كده بقي عشااان تغير الإسم اللى موجود علي الشهادة اللى معاك دلوقتى فإتفضل اللينك ده https://support.microsoft.com/contactus/emailcontact.aspx?scid=sw;ar-me;1519&ws=partner_tc%29 وده بالعربي
ولو بالإنجليزى https://support.microsoft.com/contactus/emailcontact.aspx?scid=sw;en;1519&ws=partner_tc
واللينك ده تملاه أهم حاجة صح وتكتب طلبك اللى إنت عاوزه في الأخر سواء بالعربي أو بالإنجليزى اللينكين معاااك وإختار منهم اللى يريحك وأفضل طبعااا العربي عشااان اللى هتبعتلهم مصريين زيك فهيفهموك بسرعة وطلبك هيتم في السريع إن شاء الله.وأهم حاجة مش تنسانى من الدعوة بالله عليك وربنا معاااك ويوفقك

[M_1ST]

خلص امتحاناتك خالص وبعد لما تخلصها تعمل ريكوست تغير الاسم مره واحده لانك كل لما هتمتحن امتحان الشهاده بتاعته هتطلع بالاسم القديم - بعدين فى الاخر قبل متطلب الشهادات تروح لاى سنتر يكون جولد بارتنر وتطلب منهم ده وهما هيعملهولك بدون مقابل- زى سنتر اى تى شير مثلا
MCT
MOHAMED ALI

[Avionics]

ألف شكر يارجالة علي الردود السريعة وربنا يوفقكم دايماً ان شاء الله يارب ... بجد شكراً

@m_gemi10 (https://arabhardware.net/forum/member.php?u=11123958) ===>>>>> شكراً ياباشا وربنا يوفقك ان شاء الله

@M_1ST (https://arabhardware.net/forum/member.php?u=11208890) =====> شكرا علي ردك واهتمامك ..... وأنا ها‘مل زي ما أنت قولت بخصوص لما أخلص الأمتحانات الأول ...صح؟؟؟؟؟؟

[Avionics]

معلش أنا عند سؤال هام ..... ايه اللي يضمن أن الشهادة ديه ملكي.. أنا اأأقصد أن ممكن أي واحد يجيب الشهادة الكترونياً بتاعة أي شخص ويغير اسمه بالفوتوشوب

سؤال أخر
أنا مش فاهم " بعدين فى الاخر قبل متطلب الشهادات تروح لاى سنتر يكون جولد بارتنر " مش الشهادة بتيجي خلال 48 ساعة

...... أنا أأقصد أن أنا ممكن اثيت أن اللي أنا امتحنت بالريبورت اللي بيجيلي لما بأخلص الأمتحان علطول .. وطبعاً الريبورت ده مكتوب فيه اسمي اللي عايز اعدله ...... اعمل ابه ؟؟؟؟؟؟؟؟؟

أنا مش عارف لغاية دلوقتي أيه الأفضل... هل امتحن الأمتحانات كلها الأول ولا اغير من دلوقتي أنا خايق يحصل أن شهادات تطلع باسم و شهادات اخري تطلع باسم أخر....... افيدوني؟؟؟؟؟

[m_gemi10]

بص ياباشا بالنسبة لتغير إسمك في الشهادة ديه مفهااش مشكلة سواء عاوز تغيره دلوقتى أو لما تخلص خالص مفيش مشكلة إاللي يريحك ومش تقلق لإنى أنا مغيره حوالي 3 مرات وبقي زى ما انا عاوز ومش هتفرق لما بعد ما تخلص أو من دلوقتى والشهادة هتجيلك بالإسم اللى يريحك.
أما بالنسبة بقي إيه اللى يضمن إنى الشهادة ديه ملكك.بص إنت لما بتمتحن وبتنجح في أول إمتحان بيبعتولك رسالة علي الميل فيها الMC ID بتاعك والtemporary access code شوفهم كده هتلاقيهم علي الميل وهما دول يعتبر دليلك هتقولي إزاى ؟؟؟ هقولك إنت لما بتمتحن وتنجح الشهادة بتجيلك إالكترونية زى ما انت قولت كده تماااام. لكن تيجى تتقدم بقي لوظيفة هتقول للراجل أنا معايا شهادات كذا كذا طب إيه اللى يضمن صحة كلامك ماهو ممكن تكون الشهادات ديه عاملها فوتشوب زى مابتقول وتصورها وجايبها وتقوله الشهادات أهيه .لالالالالا دلوقتى مش هو ده الضمان إنك بتملك الشهادات ديه. الضمان بقي حاجتين الأولي:إما تجيب الشهادات الأصلية معاك وديه هتشتريها من ميكروسوفت عن طريق أنك بتدفع بالفيزا مش عارف كده بكام دولار حولي 100 جنيه مصرى علي ما أعتقد بس الثمن ده مش علي الشهادة الواحدة لأ ده علي مجموعة الشهادات كلها إالي حصلت عليها بحوالي ال100 جنيه (مش متأكد من السعر)
الضمان الثانى:اللى هوا بقي الTranscript ID وال access code ودول بتجبهم عن طريق الtemporary access codeوالMC ID اللي قولتك عليهم في البداية،بتدخل عادى علي الأكونت بتاعك لميكروفت(mcp) بالميل والباسورد بعد كده هتلاقي فيه كام قايمة علي اليمين روح علي قايمة الTranscript وإختار منها Share your transcript (https://mcp.microsoft.com/mcp/tools/MCPDirectoryPreferences.aspx) منها بتكتب ال access code بتاعك ومش بيتكتب كله ع فكره بتكتب أول 8 بس اللي قبل أول شرطة يعنى ،وبعد كده تدوس أوك هيظهرلك الTranscript ID تحفظه عندك. وبقي كده الaccess code بتاعك اللي هوا اول 8 ارقام وحروف اللي هوا جاللك علي الميل وال Transcript ID اللي هوا كام رقم إاللي إنت جبته وحفظته عندك.
الراجل بيشوف شهاداتك إزاى بقي؟؟؟عن طريق اللينك ده https://mcp.microsoft.com/authenticate/validatemcp.aspx يدخل عليه ويكتب ال Transcript ID وال access code بتاعك اللى إنت بتقوله عليه وبكده تظهرله جميع شهاداتك اللى حصلت عليها وبتاريخها ورقم الشهادة وكل التفاصيل يعنى أخر جماااااال بدل بقي ما تروح الinterview شايل ورق قد كده شهادةتقع منك كده أو كده وإنت ماشي وتبقي مرتبك وشايل هم الورق في إيديك لأ دلوقتى بقت شهاداتك علي النت ويقدر يشوفها عن طريق اللينك اللى قولتلك عليه.وأى تفاصيل أنا في الخدمة

[Avionics]

يا باشا شكراً علي ردك الأكثر من وافي.... أصلي أنا كنت قلقان من الحكاية ديه...شكراً اللي أنت ريحتني...شكراً

[Avionics]

معلش هو ازاي اشكر شخص في موقع عرب هاردوير؟؟؟ علشان عايز ابعت شكر بس مش لأقيها؟؟؟؟

[afathypc]

اضغط على كلمة شكرا وهي موجودة اسفل كل مشاركة على الجانب الأيمن

[__.RaMy.__]

ربنا يبارك للبشمهندس اللى سأل السؤال
وربنا يبارك للبشمهندس اللى جاوب علي السؤال
شكرا ليكم بجد