السلام عليكم ورحمة الله وبركات عاوز اعمل شبكة وايرلس فممكن المساعدة؟؟

[karimkapo]

السلام عليكم ورحمة الله وبركات عاوز اعمل شبكة وايرلس ؟

معايا من الف لاتنين بأذن الله وفى حاجة تانية الشبكة هتتحط على عمارة سبع ادوار وفى ابراج كتير حوالية فده مشكلة ولا عادي بأذن الله وجزاكم الله كل خير

[midomix4]

مزيد من التوضيح اخى العزيز, هتعمل الشبكه ليه ؟ لتوزيع انترنت , ولا داتا ولا ايه ؟ اللى حوليك اماكنهم فين من العماره دى ؟ وهل عاوز الانترنت الاسلكى يبقى بداخل المنازل ولا هيتقبلوه باكسيس بوينت تتركب اعلى اسطح منازلهم ؟ ابعد شخص منك قد ايه بالمتر او الكيلو ؟

[karimkapo]

لتوزيع الانترنت ان شاء الله اماكنهم بعيده حوالي اكتر من 200 متر بس عاوز اماكنيات لكيلو او اتنين والمشكلة اللي الناس اللى هتخد مني هتكون فى حواري ضايقة شوية ودور تاني وتالت وكده ام موضع يبقى بداخل المنازل ولا هيتقبلوه باكسيس بوينت تتركب اعلى اسطح منازلهم معرفش الموضوع ده والله بس اللي انت شايفة احسن طبعا ومعلش ممكن سؤال ايه موضوع الداتا ده؟ من باب المعرفه بالشئ بارك الله فيك:)

[midomix4]

اقصد بالداتا هى نقل بيانات داخليا داخل الشبكه بدون انترنت , بمعنى لو كان الهدف انشاء شبكه لشركه او ماشابه , ولتوزيع الانترنت لا لزمك استخدام اكسيس بوينت ذا Data Rate عالى ,يعنى اكسيس بوينت تشتغل بتكنولوجيا B/G ولا يشترط ان تكون بتكنولوجيا N الحديثه .
لذلك يكفيك اكسيس بوينت Airlive المشهوره وتشترى معاها انتينا خارجيه 12dbi ولو 15dbi هترمى اكتر من كيلو ولكن موضوع الحواجز والجدران اكثر شئ يعوق موجات الراديو "الويرليس" لذلك من الصعب التوزيع داخل المنازل بدون وضع اكسيس بوينت فى كل مكان , لذلك ستذطر الى شراء اكسيس بوينت ووضعها فوق سطح كل منزل وتاخد منها سلك وتوصله للشخص ده , هل دا السيناريو المطلوب؟؟ فهو مكلف بعض الشئ للزبون لانك بجبره يشترى اكسيس اقلها 150 ج , فاذا كانت المسافات قليله اشتغل بسلوك عادى , اما بالنسبه للمسافات البعيده لابد من اتباع نظام اكسيس بوينت اعلى اسطح المنازل

[karimkapo]

طيب حضرتك الاكسيس بوينت ده ممكن يجي فوق سطح زبون ويتوزع منه لاكتر من واحد ولا لازم كل زبون يكون عنده اكسيس بوينت

[midomix4]

لو كلهم فى عماره واحده على سبيل المثال مكن تحط اكسيس بوينت واحده فوق العماره وتخرج منها سلك وتدخله على سويتش وتوزع من السويتش لكل الناس فى العماره , بس لازم تكون الاكسيس بوينت اللى فوق دى الData Rate فيها عالى , يعنى تكون محترمه علشان تقدر تلبى طلبات اكتر من واحد فى نفس الوقت , وهنا احنا انتقلنا لموضوع نقل الداتا , بمعنى انك دالوقتى كانك هتنقل داتا بكميات كبيره لان لو مثلا انت شبكت ل 10 عملاء واستخدموا النت فى نفس الوقت هيبقى فيه بطئ غير عادى , ولذلك تبقى الاكسيس دى بتكنولوجيا N الحديثه وده هيجبرك انك تستخدم اكسيس بوينت من نوع n برده فى عمليه الارسال لان تكنولوجيا b/g ليست متوافقه مع تكنولوجيا n , بمعنى لو انت استخدمت اكسيس ترسل من نوع b/g , واستخدمت واحده تستقبل فوق سطح المبنى من نوع n مش هيشتغلوا مع بعض

[karimkapo]

طيب والعمل؟؟

[midomix4]

اخى العزيز , شوف انت عاوز ايه وقرر , شبكه الويرليس تستخدم غالبا لتغطيه اماكن صعب الوصول لها سلكيا وبعيده بعض الشئ , لذلك لو كانت الاماكن متقاربه فيمكنك الاعتماد على الاسلاك وكذلك يمكنك بعد ذلك اضافه الويرليس للشبكه عندما يزيد حجمها وتتسع الى اماكن بعيده , لذلك توكل ع الله اولا واعتمد على الاسلاك لان الويرليس مكلف بعض الشئ حتى للزبائن

[karimkapo]

مهو انا عندي السلكية ومعايا حوالي 25 فرض بس فى منطقة جديدة بعيده عني حوالي 200 متر لسه جديدة مفيهاش كابلات تليفونات عشان كده الناس مش عارف تجيب نت فعاوز نت تفتكر افرض 100 متر واحط سويتش وافرض 100 تاني واحط شويتش هتكون ممتازة افضل من ده كله ؟؟؟

[karimkapo]

وغير كده تفتكر انه هبقي الاداء كويس للسرعة الوصلة لاكتر من 200 متر سلك هيكون كويس بعد الشي العلم اني السرعه عندي 4 ميجا ولو فرضت ال200 متر مع السويتشين هتضطر ارفع السرعه 8 ميجا عشان محدش يحس بالممل

[midomix4]

اكبر مسافه للسلك يمشيها من غير سويتش 140 ماكسيمم , وبعدين لازم تحط سويتش ,يعنى سويتش كل 140 متر ودا لو افترضنا انك جايب سلك نوعه ممتاز جدا وغالى .
موضوع الويرليس يعتمد على الزباين برده, هل عندهم استعداد لشراء اكسيس بوينت "كل عميل" فى حدود 150 ج للواحده ؟؟
ولنفترض الويرليس هتحط اكسيس بوينت محترمه عندك وتوزع للناس اللى ع بعد 200 متر دول وكل واحد لازم يجيب اكسيس بوينت ويحطها فى مكان عالى مقابله للاكسيس بتاعتك ويراعى عدم وجود عوائق "خط النظر"
ده الموضوع باختصار , وطبعا قبل كل ده لازم يكون عندك حاجه زى الميكروتك او اى برنامج بيفتح الانترنت بيوزرنيم وباسورد .وانا ارشح لك الشبكه السلكيه فى حاله ال 200 متر لانها مش مستاهله .وهتدى للزباين اشاره وتدفق بيانات اعلى من الويرليس

[karimkapo]

بارك الله فيك طيب متقولي على نوع سلك نظيفة ؟

[midomix4]

"دراكا" وفيه كمان" R&D " وفيه "Linksys" ولكن دا اخر مره جبته من سنييين
فيه حيله بسيطه بيعملها كتير للتفريق بين جوده سلك الانترنت وهو تجيب مغناطيس وتقربه من السلك من بره لو فيه جزب شديد يبقى مش كويس اما لو جذب بسيط يبقى السلك كله نحاس ومحترم , النحاس لا ينجزب للمغناطيس

[karimkapo]

تمام اوووووووووووي كده

[karimkapo]

طيب معلش يا استاذ ميدو ممكن اقولك على حاجة هو انا مش ينفع اخلى الزبائن تجيب اكسيس سويتش وابقى ضربت عصفورين بحجر؟؟

[karimkapo]

لو هو مثلا ب200 جنية اقسمة على الخمسة صح؟؟

[karimkapo]

اصل احنا عندنا ارض جديدة اتبنت وكلها ماشاء الله ابراج فاكيد الزبون مش هستخسر 50 جنية مثلا للجهاز لاني انا هشتري على حسابي وابيعه للمشتركين اكيد فهمني

[midomix4]

تقصد انك تربط ويرليس وتخليهم كلهم يشتركوا فى اكسيس واحده بس للعماره؟ لو العدد 5 على اكسيس واحده ممكن تمشى معاك

[karimkapo]

تقصد انك تربط ويرليس وتخليهم كلهم يشتركوا فى اكسيس واحده بس للعماره؟ لو العدد 5 على اكسيس واحده ممكن تمشى معاك طيب لو ركبت لو خد مخرج من الاكسيس روبوتك اللي هو خمس مخارج وخدت المخرج ده على سويتش تاني هيبقي فىيها مشكلة؟؟؟؟

[midomix4]

عادى ممكن تستخدم كاسيس بوينت كذا مخرج وتوزع منها للناس وممكن تجيب جنبها سويتش وتدخل لك منها سلك وتوزع منه للناس , ولكن تذكر لايفضل يزيدوا عن خمسه

[karimkapo]

ان شاء الله