اللي في مصر يدخل

[ابو العريف]

السلام عليكم ورحمة الله و بركاته
انا قدمت علي ADSL من شركة TE DATA وكانت الامور ماشية كويس بس فوجئت ان الشركة اتصلت و قالت مينفعش بسبب خط التليفون مش نحاس فضروري يكون نحاس علشان الADSL يركب
فيريت تمدوني بالمعلومات الكافية و الشاملة عن ADSL وليه خط التليفون يكون نحاس مع ان ADSL لا يرتبط بالتليفون

ارجو الرد سريعاpls:

[NaAZoOR]

عليك وعالسنترال .... ممكن خطك يكون هوائي ... او فيه اي عائق آخر ... الحل في ايد السنترال اللي انت تابع ليه

[adam black ice]

اها غالبا الحل فى السنترال واظن ان شركه TEDATA لديهم وحده هناك
وممكن يكون وصله خط تليفونك قديمه

[BESHR]

ممكن يكون ليه علاقه بمقاومه السلك

[ابو العريف]

الخط يا nazoor ارضي

مشكورين علي ردكم

[ماهر]

ج فكرتنى والله بالذى مضى
أنا بعد ما إنتظرت 3 أشهر مع هذه الشركه ورايح جاى ما بين السنترال والشركه وفى آخر لحظه بعد طبعا ما قرفوا منى ومن رزالتى وإصرارى على تركيب الخط فوجئت بأخيننا اللى تبعهم فى السنترال بيقولى الخط هوائى وما ينفعش يركب عليه adsl
أه ياولاد الــــــــــــــ !!!!ا
المهم اخوك ما سكتش
وطبعا إنت عارف إن اخوك صعيدى مجفل بسبعه تجفال من أم 6 تكات
ورحت طايح فيهم شمال ويمين وشرق وغرب
إزاى يا ولاد الــــــــــ ما تعرفوش ان الخط هوائى من 3 شهور وإزاى أساسا اخذتوا الموافجه قصدى الموافقه من المصريه للإتصالات على تركيب الخدمه
قلتلهم انا ماليش دعوه الخط طلع هوائى فضائى مش مشكلتى انتوا واخدين فلوس ولازم تتصرفوا
وحلفت بشنب جدى الكبير الفجعاوى باشا إن ما ركبش الخط لأكون نازل دلوقتى من السنترال ( لان إجتماع القمه الثلاثى بينى وبين المدير وفنى الشركه كان فى الفسحه بتاعة السنترال ) وجايب 3 عربيات نقل متحمله صعايده من اللى بياكلو الدود أبو مش واكون جايب عاليها واطيها !!!!!!!!!!!!!!!!!
المهم بعد ما هديت طبعا والموضوع ده إتكلف حوالى 70 كوباية ليمون على 120 حاجه ساقعه
ما تستغربش أصل اخوك شديد شويه ومش أى حاجه تهديه
المهم عرفت من إبن الــــــــــــــ بتاع الشركه ان الموضوع كله فى إيد الواد بتاع الكابينه بتاع المنطقه
المهم جبته وظبطته شاى ماشى حاجه ساقعه ما فيش مانع قهوه عادى يعنى الراجل هيخدمنا
المشكله إنه كان عايز يتعشى
الله يخرب بيت النت وسنين النت اللى خلانا نشوف الأشكال ديه
المهم الخط إتحول أرضى وخلاص كله بقى فى التمام ورحت لأخينا بتاع شركة عذاب داتا علشان يركب adsl طلعلى بعد 3 ساعات وانا قاعد مستنى سيادته فى البرد لأن الكلام ده كان فى الشتا يقولى الخط عليه عزل أرضى كبير ومش ينفع التركيب
آه يا إبن الــــــــــــــــ
المهم إصطدت الخديوى أبو عجله علشان يشوف الموضوع ده وطبعا الموضوع كان عايز عشا لتانى مره
شفتم خراب البيوت
المهم خليته يركب الخط على port جديد خالص زى الفل
وخلص على كده الموضوع بس بعد ما شفت الويل

المهم بعد كده ومن خلال معاملتى مع الشركه أن شغلهم نضيف جدا والسرعه ممتازه أيا ما كنت مشترك على 512 كانت بتوصل من 55-60 ودلوقتى انا على 256 والسرعه برضه حلوه بتوصل لغاية 30 واحيانا بتنط فجأه كده لأرقام غريبه يعنى 100 ، 120 بس فى السريع يعنى

يلا بقى باى لأحسن انا صدعتكوا
وإنتظرونى فى الحجايه الجايه إنشاء الله من حكايات عمو ماهر والنت
وما تنسوش تدعوا قبل ما تناموا عاللى إخترع النت وتقولوا
منه لله البعيد !!!!!!!!!!!!!!!!!!

[NaAZoOR]

يا راجل ... هو من غيره كنت عرفت الناس اللي زي الفل دول؟؟؟

ربنا يعمر بيته

مشاكل التركيب عادية والكل عانى منها ...المهم انك تكون بعد الإشتراك والتجربة ... تكون مبسوط وشايف انك واخد حقك

[ماهر]

بصراحه انا واخد حقى وزياده
انا لغاية دلوقتى بتاريخ 10-7 ما دفعتش الإشتراك اصل المحصل جه وملقانيش وسابلى العقد بتاع الشهر فى باب البيت وأخوك بقى بقى مديها طناش بقالى أسبوع من ساعة المحصل ما جه ولسه ما قطعوش الكونيكشن
مش عارف العالم ده نايمه على نفسها ولا إيه أصل ميعاد التجديد يوم 27 من كل شهر يعنى 13 يوم تاخير
ولا يمكن صابرين على صبر الوحش على الجحش
أروح أدفع بكره يا عم فى الشركه ليقطعوا عنى مياه ونور
بلا باى علشان عايز انام
هااااااااااااااااااااااااااااااااااااااااااااااااا ااااااوم

[ماهر]

بالمناسبه يا نازوووووووووووووووور
عايزك تشوف لاخوك الفرق بين الأسعار ديه
https://www.tedata.net/ADSL_pricing.htm
والأسعار ديه
https://www.tedata.net/ADSL_Pricing2.htm
أو بمعنى أصح ايه الفرق بين adsl 1:4 وadsl 1:2
انا كنت عارف أن نزول الأسعار وراه لعبه كبيره

[NaAZoOR]

الموضوع لا يوجد به لعبة كبيرة ولا اي حاجة ..... والسرعات 1:4 و 1:2 موجودين من ايام الأسعار القديمة والفكرة كلها في نسبة ال Upstream مقابل ال Downstream في حالة 1:4 يكون ال Upstream 256Kbps مقابل 64kbps لل Upstream

بينما في ال 1:2 يكون 256 لل Downstream مقابل 128 لل upstream

[ماهر]

شكرا على التوضيح يا صاحبى
مش عارف من غيرك كنت عملت إيه

[SISOSISO]

السلام عليكم
طبعا اللي انت مريت بيه ده انا شوفت اكتر منه والله دة خراب بيوت انا غيرت سلك التليفون مرتين طبعا غير اول نوع كان راكب وطبعا الروتر شئ اكيد اتغير مرتين والاسبليتر بقي اسبوعيا بيتغير
والناس اللي معايا علي الشبكة زهقم مني والله حتي بتوع الشركة زهقم مني كمان وفي الاخر يقولك النت عندك بطئ علشان انت التيست اللي جاي من السنترال مش قد كداا مع العلم انا جمبي سيبر واخد من نفس التسيت وشغال زي الفل
دول ياعم عاوزيين يطلعوا الحجة في اي حاجة وخلاص مش فيهم يعني
انا كنت هفصل خلاص بس اللي شجعني استمر تخفيض الاسعارWink:
المهم الحمد لله شغار اهو بس اكتر حاجة ادون عليها هيا 30 وسعات تنزل 10 او اقل
المهم احسن من مفيش وخلاص دة انا كنت في عذاب
علي فكرة انا واخد من لينك دوت نيتCon:

[ماهر]

طب يا سيسو ما قلتلناش انت سرعتك كام وانت دلوقتى بدون على 30 إوعى تقولى 256 لأحسن أقولك حرام عليك يا راجل 30 ديه أعلى سرعه ل 256
بطلوا افترا بقى ( طبعا الكلام ده هتسمعوا منى لو كانت سرعتك 256)
اما لو كانت 512 فهتسمع كلام تانى خالص
مثال 1: يا عينى يا حبيبى قلبى معاك
مثال2: يا ضنايا يا بنى يا جدر البطاطا

وعلى فكره بقى( بينى وبينى ما تقولش لحد ) فى كلام كتير بيتردد من تحت لتحت ان الشركات لما بيكون عليها ضغط بتوصل ناس تانيه معاك على نفس البورت بتاعك يعنى بيشاركوك سرعتك

الله يسامحنى بقى لو كنت بجيب فى سيرة الناس بالوحش
يالا بقى بقى
والى اللقاء فى الحلقه القادمه من حلقات المسلسل الشهير ( خراب البيوت المستعجل )

[SISOSISO]

طب يا سيسو ما قلتلناش انت سرعتك كام وانت دلوقتى بدون على 30 إوعى تقولى 256 لأحسن أقولك حرام عليك يا راجل 30 ديه أعلى سرعه ل 256
بطلوا افترا بقى ( طبعا الكلام ده هتسمعوا منى لو كانت سرعتك 256)
اما لو كانت 512 فهتسمع كلام تانى خالص
مثال 1: يا عينى يا حبيبى قلبى معاك
مثال2: يا ضنايا يا بنى يا جدر البطاطا

وعلى فكره بقى( بينى وبينى ما تقولش لحد ) فى كلام كتير بيتردد من تحت لتحت ان الشركات لما بيكون عليها ضغط بتوصل ناس تانيه معاك على نفس البورت بتاعك يعنى بيشاركوك سرعتك

الله يسامحنى بقى لو كنت بجيب فى سيرة الناس بالوحش
يالا بقى بقى
والى اللقاء فى الحلقه القادمه من حلقات المسلسل الشهير ( خراب البيوت المستعجل )







السلام عليكم
اسف علي التأخير في الرد
المهم فعلا انا 256:up:
بس والله اتبهدلت علي ما النت بقي كويس عندي
وآخر خبر عندي ان الروتر عاوز يتغير علشان بقي بيخرف ممكن الاربع لمض يبقو شغلين والنت مش شغال او مثلا اشيل كبل الايزرنت يقوم النت شغال تاني
حورات والله هتخلي الواحد يتجننLooL

[aly_alex]

السلام عليكم
نقول tedata ولا نقول link والله كل شركة وليها عيوب
tedata دلوقتي تبقى انت متعاقد على 512 والنت يشتغل والسرعة كويسة يعني بداون ب 55 او 60 كده تمام ... واذ فجأة تلاقي النت وحش جداً والداون ب 30 فشكيت ولما دخلت على السوفتويير بناع الراوتر لقيت اني شغال 256 مش 512 وشغال بقالي فتره كمان الله اعلم اد ايه ولما كلمتهم طبعا مفيش حد هايعبرك على مدار 24 ساعه....ولما روحت واتخانقت معاهم رجعوا السرعه تاني .... وعلى فكره الموضوع ده مش صدفة او غلطة لأن انا عندي 4 شبكات من tedata والموضوع ده اتكرر في كل الشبكات الي عندي
معنى كده انهم بيقللوا السرعة عن عمد لأن الضغط عليهم كبير والباندويدث مش مكفي الناس خصوصاً بعد ما الاشتراك سعره قل وانا باكتب الكلام ده هاروح للشركة تاني عشان اتخانق معاهم تاني لنفس السبب منتهى قلة الادب والاستخفاف بالتاس ... انا عشان فاهم قدرت اعرف السرعة الحقيقية لكن في ناس كتير مش حاسه بحاجه...
اما بالنسبى للينك اعتقد ان نفس الموضوع بيحصل بس لما تدخل على السوفت وير بتاع الروتر مش هاتقدر تحدد السرعة الي وصلالك لأنهم مدخلين ارقام غريبة...
حسبي الله ونعم الوكيل

[kimoco]

عزيزي علي :

الشركتين أسوأ من بعض . أنا كنت مشترك فى لينك: قالوا تى داتا أحسن ... بعد ما حولت تي داتا بصعوبة بالغة أكتشفت ان لينك أفضل . ولكن المحصلة انهم أسوأ مقدم خدمة الانترنت على مستوى مصر .

[pipito_4_ever]

فعلا بس ده معناه امك انت غالبا تعيش في قرية لأن أغلب تليفونات القري في مصر لن تقبل asdl

[NaAZoOR]

عزيزي علي :

الشركتين أسوأ من بعض . أنا كنت مشترك فى لينك: قالوا تى داتا أحسن ... بعد ما حولت تي داتا بصعوبة بالغة أكتشفت ان لينك أفضل . ولكن المحصلة انهم أسوأ مقدم خدمة الانترنت على مستوى مصر .

أنا ارى ان هذا الكلام فيه تجني .. وخاصة على TE DATA

صحيح أحياناً النت تكون بطيئة ولكن TE DATA هي وبالواقع والأرقام وطفرات تكبير الباندويدث هي افضل شركات ال DSL في مصر

لا مكان يخلو من عيوب ... ولكني لا اتخيل ان يقول أحد ان Link أفضل من Tedata لأن الكل يعرف مدى سوء الخدمة لدى Link.Net و Egy net

[أبو جعفر المصري]

موضوع رائع وجميل
فعلا هذا ما كنت أبحث عنه
انا الآن مشترك في Link من الساعة 6 الصبح للساعة 12 الظهر
السرعة 25ك بقيه اليوم 10 - 15 ك
إتصلت بيهم قعدوا أيام يقولوا الغلط من عندي
السيرفر اللي بتحمل منه بطيء
الفيروول بتبطأ النت
برامج التورنت عادة بطيئه
المهم أقنعتهم إن الأمور ما كانتش كده أول شهور إشتركت معاهم
في الآخر قالوا عموما هيا دي تكنولوجيا الdsl السرعة تتراوح ما بين 10ك - 30ك
وفيه ضغط علي السنترال بتاعك. قلت للراجل انا أول شهر إشتركت معاكم كان طول اليوم 30ك مفيش مشكله
قالي بجد؟ يا راجل دا إنتا محظوظ ده مافيش حد بيوصل للسرعه دي!!

وبالنسبه للدعم الفني لشركه Link سيء بمعني الكلمه ممكن تحاول تتصل بيهم 5 ساعات ما يرضوش عادي خالص

المهم انا دلوقتي عاوز أحول لشركة TE Data لسبب واحد بس عشان بيقولوا زودوا الInternational Bandwidth عندهم ل3 جيجا بس برده مش عارف إذا كان موصلين للسنترال عندي أي حاجه من ال3 جيجا دول ولا لاء. لإني إتصلت بيهم وقلت للراجل علي مشكله Link وحكايه تكنولوجيا الDSL قالي آه الكلام ده صح فقلتله هل إنتا تضمنلي إن الدونلود يبقي 30ك طول اليوم ما ردش مباشرة وقالي إحنا لسه مزودين الBandwidth في السنترال عندك.

فمش عارف أعمل ايه الحقيقه.

[علاء]

انا عارف ان الموضوع قديم ولكنة ثري جدا بالمعلومات وسؤالي هنا هل حد يعرف اي شيء عن خدمة مصراوي هل هيا جيدة ام رديئة لاني سمعت ان te data بتعمل سعات حجب علي بعض المواقع (مدونات)فهل هذا الكلام صحيح
وتقبلوا مني التحية

[علاء]

تعديل : اكتشفت ان مصراوي يتبع LINKdotNET فلا داعي للرد!
وتقبلوا وافر التحية

[3m.Ahmed]

موضوع رائع وجميل
فعلا هذا ما كنت أبحث عنه
انا الآن مشترك في Link من الساعة 6 الصبح للساعة 12 الظهر
السرعة 25ك بقيه اليوم 10 - 15 ك
إتصلت بيهم قعدوا أيام يقولوا الغلط من عندي
السيرفر اللي بتحمل منه بطيء
الفيروول بتبطأ النت
برامج التورنت عادة بطيئه
المهم أقنعتهم إن الأمور ما كانتش كده أول شهور إشتركت معاهم
في الآخر قالوا عموما هيا دي تكنولوجيا الdsl السرعة تتراوح ما بين 10ك - 30ك
وفيه ضغط علي السنترال بتاعك. قلت للراجل انا أول شهر إشتركت معاكم كان طول اليوم 30ك مفيش مشكله
قالي بجد؟ يا راجل دا إنتا محظوظ ده مافيش حد بيوصل للسرعه دي!!

وبالنسبه للدعم الفني لشركه Link سيء بمعني الكلمه ممكن تحاول تتصل بيهم 5 ساعات ما يرضوش عادي خالص

المهم انا دلوقتي عاوز أحول لشركة TE Data لسبب واحد بس عشان بيقولوا زودوا الInternational Bandwidth عندهم ل3 جيجا بس برده مش عارف إذا كان موصلين للسنترال عندي أي حاجه من ال3 جيجا دول ولا لاء. لإني إتصلت بيهم وقلت للراجل علي مشكله Link وحكايه تكنولوجيا الDSL قالي آه الكلام ده صح فقلتله هل إنتا تضمنلي إن الدونلود يبقي 30ك طول اليوم ما ردش مباشرة وقالي إحنا لسه مزودين الBandwidth في السنترال عندك.

فمش عارف أعمل ايه الحقيقه.

انا مشترك مع شركة لينك دوت نت من سنتين
الخدمة قبل الساعة 2 قبل الفجر تكون 60% من السرعة الطبيعة
و بعد ذلك و حتي العاشرة صباحا تكون 90%
الشئ الاكيد ان الخدمة سيئة في مصر و مغالي في تسعيرتها في مصر و بالاخص في السعودية و ذلك نتيجة لجشع الشركات و عدم وجود من يحاسبهم حيث ان عدد المشتركين يفوق قدرات الشركات

[mohamedabduon]

انا مشترك مع شركة لينك دوت نت من سنتين
الخدمة قبل الساعة 2 قبل الفجر تكون 60% من السرعة الطبيعة
و بعد ذلك و حتي العاشرة صباحا تكون 90%
الشئ الاكيد ان الخدمة سيئة في مصر و مغالي في تسعيرتها في مصر و بالاخص في السعودية و ذلك نتيجة لجشع الشركات و عدم وجود من يحاسبهم حيث ان عدد المشتركين يفوق قدرات الشركات

طلما يا جماعه عدد المشتركين يفوق قدرات الشبكات ....ماتيجى نفتح شركةlolo: وانا معايا حاولى 300 او 400 جنية وكام كتاب شبكات ينفعونا.rule: ..ومعايا واحد قريبى بيشتغل فى تركيب الشبكات وانتوا ناس خبرة وناخذ قرض وبعد كده نعمل شركة ثم نتحكم فى الناس اللى كانوا بيتحكموا فينا دلوقتى وعاملين اصحاب سيرفر...(z) (z) (z)

[3m.Ahmed]

اهم من ده معاك مايوه ..........
نمد كبل بحري مخصوص لينا علشان محدش يقدر يمسكنا من كبلنا اللي بيوجعنا

[أبو جعفر المصري]

بماذا تنصحون يا إخوه
هل أبقي عند Link أم أشترك بTE Data؟

[khattab832001]

بسم الله الرحمن الرحيم
اخي الغزيز ابو العريف الموضوع الاهم:\
انت ساكن فين ؟
وتابع لاي سنترال ؟
وهل السنترال اللي انت تبعه الي و لا نص الي ؟
وذلك لان ال adsl الموصل علي التليفون بجيب ان يكون تابع للسنترالات الاليه(خطوط الفيبر)
وما تحدث عنه الاخوه من مشاكل ليس له علاقه بمشكلتك.
ولكن هناك حل لمشكلتك ............. لذا ياريت توضح المعلومات دي عشان نحللك مشكلتك ان شاء الله

[khattab832001]

والله يجماعه بالنسبه للشركات الخاصة بتقديم خدمه الانترنت في مصر فهي كتير بس الافضل علي الطلاق عي رايا raya مع اني مشترك مع تي داتا tedata والسرعه ممتازه مع ان سرعتي 256 والدون لود بيوصل 30 و 35 الا انه ساعات السرعه بتنزل فجاه وبدل متكون 256 ال 64 بتبقي 64 ال 64 وبدون سابق انذار وتتصل علي 19777 يطلع عنيك لغايه ناتوصل للدعم الفني ويديلك تكت نمبر وموت يا حمار وفين لما السرعه تنظبط بس الصراحه الخدمه عندي حاليا ممتازه مع انها 256 اما بالنسبه ل link فاحنا لسه في بدايه تعاملنا معاهم لكن الي الان السرعه ممتازه وبعدين كفايه انهم عملين سحب علي اربع عربات جيب شروكي كل شهر وربنا يوعدنا لكن لو حصل اي تطور في موضوع السرعه فا خبار هاتوصلكم ان شاء الله لغايه ما نحدد ايه احسن شركه بالضبط

[المهندس الرائد]

أنا مشترك مع لينك من حوالي 8 شهور .. طبعا عن طريق وكيل لأني ساكن في قرية اسمها المحلة الكبرى !!!

سمعت عن te data بس مارضيتش أحول .. قلت لحسن يكون خطك أحسن و تروح و تتورط .. و عصفور في الايد أحسن من 10 على الشجرة ..

طبعا الكلام اللي قلتوه عنها كله تقريبا مضبوط خصوصا كلام أخونا noble911 ..

و موضوع الراوتر .. فتحته دلوقت لقيت التالي
Downstream Rate: 3543 kbps
Upstream Rate: 1023 kbps

ممكن حد يدينا المعادلة اللي توصل لسرعة 256 ..

و طبعا أنتظر رأيكم .. أحول ل te data و لا لأ ؟ .. و أنا على سنترال جديد زي ما بيقولوا عندنا .. بس ما أعرفش نظام الآلي و نص آلي ده ..

[3m.Ahmed]

و الله اعلم
هما بيرفعوا السرعة علشان يعوضوا الضعف اللي بيحصل نتيجة شبكات التليفون و البعد عن السنترال و في نفس الوقت بيحددوا سرعة الدونلوود
و ده اللي فهمته من الاخ اللي جه ركب عندي
بالنسبة للتحويل يفيدك في الموضوع ده اكتر حد من المنطقة عندكوا يكون جرب الشركتين