محتاج مساعدة فى تحديث الجهاز

[mohamed9004]

السلام عليكم ورحمه الله ..
انا فى الاول كان عندى جهاز ولا يزال عندى فكنت بفكر احدث فيه وحقولكم مواصفات جهازى
Motherboard: As Rock A780 Full Hd
Processor :AMD Phenom X4 955
Ram (https://www.amazon.com/s/ref=nb_sb_noss?url=search-alias%3Daps&field-keywords=ram) :2x2GB kingstone DDR2 بس الحمد لله واحدة من ال 2 جيجا اتحرقت من شهر كده والجهاز بقى نفخ اوى ولسه امبارح ال2 جيجا التانية محروقة
وشغال ناو على واحدة 2جيجا لينوفو كده تعبانة الجهاز بيهنج كتير
Vga: AMD Radeon HD 5570 انا عارف اللى هيا مش اد كده بس انا مش مركز الايام ديه على الالعاب اوى ان شاء الله بعد كده حبقى اغيرها
المهم انا فكرت طبعا بعد ما الرامة اتحرقت انى اغير المازرد بورد واجيب واحدة جديدة يمشى عليها البروسيسور اللى عندى و رامات DDR3 لان ال DDR2 بقت منقرضة ناو وغالية ال 2 جيجا كينج ستون ب260 جنيه فكنت محتار بين انى اكمل على البروسيسور ده ولا اجيب انتل فالمهم كنت عامل موضوع تانى وناس كتير قالتلى انتل وانا برده كنت ناوى اجيب لابتوب لينوفو z5070 I5 والفيجا 4 جيجا اكيد كلكوا عارفينه بس كنت عاوز اخلص من التهنيج اللى فى الجهاز ده بقى حاجة نفخ المهم احد الاصدقاء نصحنى انى استنى شوية ومجبش اللاب ناو لحد ما الجيل الخامس ينزل وانا اقتنعت وقولت اجيب جهاز حلو مش غالى اوى ومش رخيص اوى واسيب الكيسة القديمة زى ما هيا فكنت عاوز اسئلكوا كام حاجة
وعلى فكرة الحاجة الوحيدة اللى انا اشترتها من اسبوعين كده هيا كيسة جامبو ب 165 جنيه قولت اجيبها الاول وبعد كده اجيب بقيت الحاجة
انا بقى محتار بين كام حاجة يا ريت تدونى رايكوا فيها
الاول نويت اجيب رام
RAM :CORSAIR Vengeance Low Profile 4GB (1 X 4GB) DDR3 1600 CL9 1.5V (https://www.********.com/en/product/corsair-vengeance-low-profile-4gb-1-x-4gb-ddr3-1600-cl9-1-5v-desktop-memory-el-nekhely-technology) 320 L.E
Hard Disk : Blue 1TB 400L.E
Motherboard: محتار بقى بين دول
M.B GIGABYTE Intel B85-HD3 820L.E
M.B GIGABYTE Intel H97-D3H 935L.E
ولا اجيب واحدة عادية
M.B GIGABYTE Intel H81M-S2PH 525L.E
انا عارف ان ال h97 احسن واحدة طبعا وبتدعم الجيل الخامس وبتدعم 3 اماكن كارت شاشة بس هل مستهلة ادفع فيها كده ولا بلاش انتو ايه رأيكوا
Processor: برده محتار شوية انا فى الاول كنت حجيب I3 بس احد الاخوة نصحنى وقالى خليك احسن فى ال I5 وهات بوردة h81 احسن ما تجيب بوردة H97 وتجيب بروسيسور i3 كده بترمى فلوسك وانا اقتنعت بس بعد كده قعدت افكر قولت ما اجيب مازر اعلى وانا ناوى مغيرش الجهاز ده لمدة 5 سنين على الاقل
المهم انتوا شايفين انهى احسن
core i5 4460 1425L.E
core i5 4570 1490L.E.
انا عارف برده ان ال 4570 احسن فى حاجات بسيطة بس انتوا رايكوا ايه
وناس كتير قالتلى بلاش الكيسة الجامبو ديه بس انا حاسس ان الجهاز حيفتح كده جامد معايا المهم هل كيسة
ZALMAN Z3 Plus Mid Tower Case
انا عارف ان مفهاش باور وفيها 4 مراوح واحدة ورا وواحدة قدام و2 فوق ينفع اجبها بعد كده ولا حيكون غلط على حرارة الجهاز ولو جيتها ناو مثلا ينفع احط فيها الباور بتاع الكيسة الجامبو
وناوى اجيب شاشة طبعا عادية
الشاشة السامسونج ال 19 عاملة 600 جنيه
والشاشة الBenQ عاملة 575 جنيه انهى افضل السامسونج عارف انهى ماركة كبيرة بس سمعت ان الBenq بتحاول تطور من نفسها
الجهاز كده حيعمل توتال كام انا عارف فى حدود 3800 ايه رايكوا انا عارف ان معظم الناس حتزهق من كتر الكلام اللى انا كاتبه ده وحيقولك ده بارد اللى كاتب الموضوع ده بس انا اسف جدا على الازعاج
وشكرا مقدما ليكوا وفى انتظار نصائحكم ايضا عن اللاب توب
شكرا جزيلا

[phenomenon]

وعليكم السلام ورحمه الله وبركاته .. انت مجاوب كل اسئلتك بنفسك اخى محمود .. الامر يعود للاختيار فقط

اليك اقتراحى باختصار شديد .. هل فى ميزانيه لشريحه H97 ؟ .. هل هتستفاد بالتلات منافذ وطبعا الامر ليه حدود فى اختيار الكروت على المنافذ ؟
هل هتشترى هارد SSD M.2 Support ؟ كده عاوزين 1 2 3 اجابات

بخصوص المعالج امره سهل جدا
I5 - 4570 ومعالج I5-4460 ترددهم الاساسى 3200MHz بينما الاخ الصغير يصل التربو وقت الضغط 3400MHz والاخ الكبير 3600MHz
يعنى الفرق 200MHz ولتسهيل وتبسيط الامر = جيب المعالج اللى سعره يناسبك فقط = اللى سعره يناسبك فقط لان جميعهم واحد
هل فرق السعر بينهم بسيط ومش هياثر عليك ؟ يبقى هات الاعلى فى التردد بل هات I5-4590 او I5-4670 اما لو فى نظره للسعر وفرق السعر مش فى صالحك
يبقى ليه تشغل بالك وتزنق نفسك فى متطلبات اخرى

اصل احنا لو بصينا ليه ( بغض النظر ان مراجعاتهم معروفه ان كلهم واحد حتى مع معالجات الجيل السابق واللى قبله ) لكن لو نظرنا لفرق مثلا 70 جنيه او 100 جنيه
على انه شىء بسيط عشان خاطر 200MHz يبقى ممكن نقول وقتها طب الفرق بقى اقرب 50 جنيه كمان او اقل على معالج فرق 300 او 400MHz
وبما ان الجنيه المصرى مالوش لازمه يبقى اكيد فرق التوفير مش هيخلينى اجيب كارت اعلى يبقى امر اختياره شخصى لكن ممكن فرق 100-200 جنيه يفرقوا
بشكل ملحوظ فى حاجات تانيه = كيسه اعلى - باور افضل - مروحه او مروحتين زياده - شاشه افضل - طقم صوت اعلى - ماوس وكيبورد العاب
ممكن تجيب كارت شاشع مكسور اعلى وتبريده افضل ) فكل الحكايه بالنسبالك انا شايف انت اللى محتاج تستقر على شىء معين وتشوف ازاى متاثرشى على متطلباتك الاساسيه

الكيسه الجامبو : تصميم الكيس بياخد ابعاد ATX وتصميم الباور ATX12v وتصميم اللوحه ATX وهناك استثناءات بسيطه تبدا مع بعض اللوحات وبعض الباورات
بعض اللوحات Extended ATX لانها بتكون عريضه ودى منصات Extreme فقط وبعض الباورات Long ATX وبتبدا عند 1000-1200 وات بالرغم ان فى باورات 1200 واط
تقدر تركبها عادى فى الكيس بتاعك
لكن المشكله كلها فى الكيس ان مروحه الباور هتكون لتحت بتحدف كل الهواء المطرود من الباور على باقى الكيس ( معالج وكارت ) وبالتالى الحراره هتكون عاليه
فى الوقت دا هقولك سيب الباب مفتوح ...
لكن على كل حال طالما متكلمتش على كارت الشاشه يبقى الامور معاك تمام واكيد كيسه زالمان افضل من كيسه جامبو
لكن بما انك اشتريتها خلاص يبقى شوف الامور معاك ماشيه ازاى الاول
لكن اذا فكرت تشترى كارت شاشه عالى انا واثق انك هترمى الكيسه دى من البلكونه لانها مش هتنفع للكروت الطويله
عشان مكدبشى عليك فى احد المرات اتضطريت اشغل كومبيوتر وانا حاطه فى درج مكتب لانه قدر يشيل المتطلبات ( كارت ومشتت ) وكيسه جامبو مقدرتش
بردو ممكن شنطه سامسونايت تكون افضل من جامبو :) ( صراحه اخى كيسه جامبو مش تستاهل سعرها هى وماتركيس والارف ده )
اشترى كيسه زالمان وريح دماغك

بخصوص الشاشه الاتنين كويسين وهختار Benq لو كنت مكانك

[mohamed9004]

السلام عليكم ورحمه الله .. انا عارف انى عملتلك ازعاج كبير اوى بس كل مرة كلام حضرتم بيأثر فيا عاوز راى حضرتك بقى اجيب انهى مازر رايك انت وحمشى عليه وانا اسف على الازعاج
GIGABYTE Intel H81M-S2PH
GIGABYTE Intel B85-HD3
GIGABYTE Intel H97-D3H
اللى حتبقى احسن بالنسبة لتجمعيه الجهاز ديه الرام 4 كروزر والهارد تيرا ازرق والبروسيسور I5 4460
والكيسة حخلينى ف الجامبو لحد اما ابقى اجيب بعد كده واحدة تانية وكنت عاوز اعرف هيا الكيسة ال zalman
ديه مفهاش دراعات تتشال منها من فوق زى الجامبو عشان لو لقدر الله حصلها حاجة حشيلها ازاى ديه

[phenomenon]

مفيش مشكله اخى الكريم ... اذن انت مشوش تماما والامر يتوقف انك محتاج تشجيع على هذا او ذاك
وبما ان الكلام ممكن يطول لكن انت محتاج الوصول للصحيح دون حيره وفى الوقت دا هسالك سؤال واضح ومحتاج اجابه واضحه
اقصى ميزانيه هى كام ( وايه القطع اللى ناوى على شرائها ) متقولشى انا اقدر ازود لو دى او ده الافضل .. لو قولت كده هقولك زود طبعا
لكن الامور لها موازين دقيقه اخى وبيتم النظر فيها اولا لتحقيق شيئان اساسيان ( الوصول الى اداء 100%100 ) + ( النظر للميزانيه )
ضيق ميزانيتك ومتقلقشى من الاختيار باذن الله
بخصوص الكيس : مفيش حوامل اخى فى اغلب الكيسات الاحترافيه اللى انت تقصدها ( اساسا حوامل الكيسات التجاريه معرضه للخطر احيانا )
فى كيسات ليها حامل علوى من اللى انت تقصده ولكن الهاند بتاعته مش زى مانت متخيل بردو

[mohamed9004]

السلام عليكم ورحمه الله .. شكرا لك يا اخى انا عارف انى تعبتك اوى معايا بس انا خلاص حددت حجيب انهى مازر بس سؤال اخير ان شاء الله عشان ناوى اجيب الجهاز بكرة وخلاص جهزت الفلوس اللى انا ناوى اجيبه ناو
Motherboard: GIGABYTE Intel (https://www.amazon.com/s/ref=nb_sb_ss_c_0_5?url=search-alias%3Daps&field-keywords=intel&rh=i%3Aaps%2Ck%3Aintel) H81M-S2PH 530 L.E
Ram: Corsair Vengeance LP 8GB (1 X 8GB) DDR3 1600 CL9 V1.5 Dual Channel Memory Kit 620 L.E
هيا الكروزر احلى ولا الجى سكيل
processor : core I5 4460 3.2 6 MB cache 1425 L.E
لقيت ان الاى 5 الفرق بين كل واحد فيهم بسيط قولت اجيب الوسط اللى فيهم زى ما حضرتك نصحتنى
Hard Disk: 1 TB Blue 405L.E
حاسس انه مفيش فرق بينه وبين الباربل فقررت اجيب الازرق
Monitor : BenQ 19.5 LED 585 L.E
والكيسة طبعا الجامبو اللى عندى لحد ما يبقا معايا فلوس احتمال اجيب ال zalman z3 plus
زى ما حضرتك نصحتنى ان البن كيو افضل
ايه راى حضرتك فى اللى انا استقريت عليه الان ورأيك فى الرامات وشكرا مقدما واسف على الازعاج انا فعلا عملتلك ازعاج كبير

[phenomenon]

وعليكم السلام ورحمه الله وبركاته ... طيب تمام انك استقريت بالنهايه والحمدلله .. واختياراتك كلها منتظمه جدا وقدرت تحقق اداء جيد ( حسب مراجعتك معايا السابقه )
بنفس الوقت هتجيب باقى متطلباتك التانيه وفى فرصه انك تجيبها كويسه .. بخصوص الرام : الاتنين من افضل واشهر الماركات الاولى فى الخامه والجوده شيل الارخص
والهارد الباربل هو الازرق بس رسمه جديده ومصنف لنفس الاستخدامات
بصراحه انا شايف ان Benq اخدت وزنها فى الفتره الاخيره بسبب نقاء صورتها وخصائصها وعدد كبير من المشتريين راضى جدا عنها بعكس شاشات سامسنوج حاليا بنفس رنج السعر

انا شايف انك حققت اخيرا 100%100 اداء بالشكل ده واستقريت بشكل صحيح جدا لا يجوز التعديل عليه خلاص
لكن انا مش مضايقنى فى التجميعه كلها غير كيسه جامبو لان اكيد الباور هيكون فيها فوق وهيحدف كل الحراره الناتجه عنه على باقى الكيس ودى هتاثر على حراره القطع كلها
بالاضافه طبعا انها مفيهاش مراوح احترافيه وان لقينا فيها مروححه بالباب هتكون زى قلتها
فاولا عاوزين نشوف هل هتقدر تركب فيها مراوح قدام او بالخلف
بردو هنصحك انك تفتح بابها على ما الصيف يعدى باذن الله عشان حراره المعالج والبورده تفضل فى رنج اعتيادى ليها مياثرشى عليها بالمستقبل

حتى الان منعرفشى كارت الشاشه هيكون زى ايه عشان نعرف الباور اللى هيجى مع الكيسه ظروفو ايه

خلينى اقولك اخى ان باور جامبو عباره عن قنبله فى الكيسه ( لا امان ولا استقرار ولا قوه تحمل ولا حراره جيده ولا اى شىء جيد غير انه ينفض طاقه وخلاص بدون مايفهم هو بيعمل ايه )
ياريت لو تجيب باور ماركه جيده ينفع للمستقبل مع الكروت المحترمه ويكون امان وقت اخطاء الكهرباء انه يحافظ على الهاردوير بتاعك ويحمى نفسه ايضا
قدر الامكان ابحث عن باور 500W من الماركات الجيده

[mohamed9004]

السلام عليكم ورحمه الله .. طيب ايه هيا الباورات اللى حضرتك تقترحها عليا اصل انا لو جبت كيسة zalman دلوقتى حتحتاج باور برده صح حيدخل فى حوالى 700 جنيه زيادة قولى رأى حضرتك فى حكاية الكيسة والباور ممكن اغير عادى
اشكرك جدا على تعبك ومجهودك

[phenomenon]

وعليكم السلام ورحمه الله وبركاته ... انا رايى انك تبيع الكيسه اللى معاك او تفتح بابها طول الوقت .. بردو جو الغرفه بتاعك ليه عامل ضرورى
اعتقد ان اول كيسه احترافيه NZXT وسعرها 300 جنيه لكن بعض الناس قالت ان سعرها اقل عشان فى فيرجن 1 مروحه 300 جنيه وفيرجن 3 او 4 ب 400 جنيه
انما كيسه زالمان ضامنين موضوع ان فيها 4 مراوح وهتبرد الهاردوير بشكل كويس
( لو مصمم على الجمبو خلاص لكن لو لاحظت ارتفاع حراره المعالج بدون داعى هتلاقى نفسك فى حاجه للتغير = درجه اقل بالحراره بتساعد على الراحه النفسيه وراحه الهاردوير )

اى باور : بردو مش هعرف اقولك باور ايه الا لما تقول كارت الشاشه هيكون زى ايه عشان الوات
عموما ماركه Seasonic او XFX او EVGA مضمونين فى كل الخصائص المطلوب ايجادها فى الباور.

[mohamed9004]

السلام عليكم ورحمه الله.. طيب كده انا احتمال اجيب ال zalman ايه رايك في دة الكيسة والباور ولا تقترح حاجة تانية
Zalman z3 plus midvtower case +zalman zm 500 le psu
ب ٧٠٠جنيه
وفيه ايضا كيسة cooler master k281 اللى فيها باور سبلاى 500 وات عامله 630 جنيه حضرتك رايك مين الاحسن

[phenomenon]

اخى الكريم الكلام واضح وضوضح الشمس ... هل فى نيه لكارت شاشه عالى ؟ اذكر مثال عليه عشان نقولك ايه المناسب

[M.AHMED22]

السلام عليكم ورحمه الله.. طيب كده انا احتمال اجيب ال zalman ايه رايك في دة الكيسة والباور ولا تقترح حاجة تانية
Zalman z3 plus midvtower case +zalman zm 500 le psu
ب ٧٠٠جنيه
وفيه ايضا كيسة cooler master k281 اللى فيها باور سبلاى 500 وات عامله 630 جنيه حضرتك رايك مين الاحسن

اليك اخي الكريم zalman z3 plus افضل وزلك لانك تستيع تركيب hyper 212 ولكن باور zalman 500 ليس احترافي الباورات الاحترافية bronze 80 plus احترافي بمعني انها يعطيك الوات المكتوب بثبات وايضا يوفر لك الوات لكل قطع باحترافية وكما قال لك الاخ اشهر الباورات في هذا المجال /xfx /Evga/ Seasonic وسوف تحتاج كرت شاشة لتشغيل الالعاب عند تحديد نوع ومزانية كرت الشاشة عنداذ سوف تحتاج الباور على حسب كرت الشاشة ومن وجهة نظري افضل كرت مع هذة التجميعة gigabyte gtx 960 لكن سعرة مرتفع الان في الاسواق

[M.AHMED22]

ولكن ارى لا داعي لشراء باور اذا كونت لا تنوي شراء كرت شاشة كما قال الاخ

[mohamed9004]

السلام عليكم ورحمه الله .. لا طبعا مفيش اى نية دلوقتى لشراء كارت شاشة مفيش فلوس خالص ممكن بعد 6 شهور ومش عارف حجبها ايه اساسا انا كارت الشاشة اللى حستخدمه هوة بتاع الكيسة القديمة AMD Radeon HD 5570
اجيب انهى كيسة وباور يمشى مع اللى ناوى انى اجيبه طيب لو فرضنا مثلا جبت كيسة zalman اجيب معاها باور انهى موديل بالضبط عشان مليش فى انواع الباور الصراحة الانواع اللى انتوا ذكرنها ديه غريبة اوى بالنسبة ليا
انا اسف جدا والله على الازعاج

[mohamed9004]

السلام عليكم ورحمه الله .. انا اسف مرة اخرى انا عملكوا ازعاج جامد
ممكن رايكوا فيه حاجة من الكيسات ديه حتبقى مناسبة وليا ودرجة حرارتها حلوة
Case Cooler Master (Force 500) 500W 575L.E
Case Cooler Master (K281) 500W 630L.E
Case Cooler Master (K380) 500W 630L.E
ولا الكيسة ال zalman وتكون اللى فيها نوع البروسيسور ال 500 ولا حاجة تانية شكرا لكم واسف على الازعاج انا كنت حجيب مكونات الجهاز امبارح بس رجعت فى كلامى لحد ما اقرر حجيب انهى كيسة وباور بس ان شاء الله يوم الاربعاء قبل رمضان
شكرا مقدما

[M.AHMED22]

اليك اخي اذا كانت تريد كيسة جيدة zalman z3 ولو تريد معها باور يمكن شراء zalman z3+pws 500w سوف تجدها في سعر k380