برجاء المساعده من الخبراء

[mido 10]

السلام عليكم ورحمه الله وبركاته

- أقصى ميزانية محددة: 5000ج
- استخدامك للجهاز: للالعاب وشغل سيرفر vmware

- حجم الشاشة و الدقة (Resolution) التي تستخدمها:19 بوصه 1366 *768
- القطع التي تنوي شراءها:processor & Graphics (https://www.nvidia.com/object/geforce_family.html)& Ram& motherboard

- القطع التي ستعيد استخدامها من الجهاز القديم: hard disk
- ميعاد شراء الجهاز: اسبوعيين
- مكان الشراء:الاسكندرية
- محل سكنك: الاسكندرية
محتاج اجمع جهاز كمبيوتر pc بامكانيات عاليه ولكن انا غير متابع جيد للتكنولجيا الحواسيب حاليا فاذا سمحتم برجاء مساعدتى فى الامكانيات التاليه ومرفق بها الاسعار فى مصر
اولا processorاما i5 او i7 بس يكون اما سداسى النواه او ثمانى النواه والكاش بتاعه 6 او اكثر
ثانيا Graphics (https://www.nvidia.com/object/geforce_family.html)تكون قويه 4G DDR5 بس للاسف مش فاهم فى الموديلات انا عايزها للجيمز وبمعنى اصح علاشان مش كل شويه اشترى واحده يعنى انساها كده 5 سنيين او اكتر

ثالثا Ram انا سمعت ان DDR4 نزلت بس غاليه انصحونى لانى مش متابع المهم الرمات ياريت متقلش عن 8 وياريت تكون 16G
رابعا motherboard لا افقه فيها شئ نهائى ولكن طبعا عايز مازر بورد قويه تستحمل كل الامكانيات اللى فوق دى وميحصلش فيها عنق زجاجه وياريت اذا بتقبل فى المستقبل DDR4 وتكون حاليا شغاله على DDR3
بالنسبه للهردات لا علاشان عندى
سؤال اخير معلش فى ناس بتقول ان الباور صبلاى مهم جدا هل فعلا هو مهم كده ولا اى بور والسلام خصوصا انها غاليه وبرضه مش اوريجنال
برجاء الافاده و تكون الاسعار موجوده
الف شكر ليكم

[Walid DX01]

يجب الإلتزام بهذا النموذج حرفياً فى أى طلب من طلبات تجميع الاجهزة، أى موضوع لم يلتزم بهذا النموذج سيتم حذفه مباشرة!


- أقصى ميزانية محددة:
- استخدامك للجهاز:
- حجم الشاشة و الدقة (Resolution) التي تستخدمها:
- القطع التي تنوي شراءها:
- القطع التي ستعيد استخدامها من الجهاز القديم:
- ميعاد شراء الجهاز:
- مكان الشراء:
- محل سكنك: ( يكفى إسم البلد او المحافظه و لا يشترط العنوان بالتفصيل )

[mido 10]

يجب الإلتزام بهذا النموذج حرفياً فى أى طلب من طلبات تجميع الاجهزة، أى موضوع لم يلتزم بهذا النموذج سيتم حذفه مباشرة!


- أقصى ميزانية محددة:
- استخدامك للجهاز:
- حجم الشاشة و الدقة (Resolution) التي تستخدمها:
- القطع التي تنوي شراءها:
- القطع التي ستعيد استخدامها من الجهاز القديم:
- ميعاد شراء الجهاز:
- مكان الشراء:
- محل سكنك: ( يكفى إسم البلد او المحافظه و لا يشترط العنوان بالتفصيل )

صح كده معلش او مشاركه ليا فى المنتدى:ah35:

[Walid DX01]

تمام
الجيل السادس هو اللي بيدعم ذاكره DDR4 وده هيكلفك اغلي شويه حاليا
لان البورده الداعمه له وصل منها الغالي في مصر واللوحات الاقتصاديه
لسه موصلتش
والجيل الرابع بيدعم ذاكره DDR3

ياريت اعرف ايه هي الالعاب اللي هتلعبها ؟
وهل تقدر تزود الميزانيه ؟

[mido 10]

تمام
الجيل السادس هو اللي بيدعم ذاكره DDR4 وده هيكلفك اغلي شويه حاليا
لان البورده الداعمه له وصل منها الغالي في مصر واللوحات الاقتصاديه
لسه موصلتش
والجيل الرابع بيدعم ذاكره DDR3

ياريت اعرف ايه هي الالعاب اللي هتلعبها ؟
وهل تقدر تزود الميزانيه ؟

والله يابشمهنس هو الجيل السادس ده فارق اوي ولا ممكن اجيب حاجه غاليه في الجيل الخامس يكون ادائه احسن من حاجه متوسطه في الجيل السادس

[Walid DX01]

الفرق مش مستاهل اطلاقا والفرق في الاداء غير ملحوظ
الجيل الرابع مازال يحافظ علي مكانته بين المعالجات

Intel Core I5-4460 3.2GHz =1500
Gigabyte GA-B85-HD3 LGA 1150 =850
Kingston HyperX Blue DDR3 8GB 1600 CL10 1.5v =470
Kingston HyperX Blue DDR3 8GB 1600 CL10 1.5v =470
Gigabyte GTX 750 Ti Windforce 2GB =1200
Cooler Master Force 500 Mid Tower + 500W PSU =630


Total : 5120

كده الرامات 16 جيجا 2x8
وكارت الشاشه مناسب لدقه شاشه 720p في الالعاب
مش هتحتاج باور سبلاي قوي .. الباور الموجود في الكيسه
كافي لتغذيه الكارت وباقي الهاردوير بالطاقه بدون مشاكل

[mido 10]

الف شكر ليك يابشمهندس بس سؤال معلش ايه هو الكولر ده Cooler Master Force 500 Mid Tower + 500W PSU
وكارته الشاشه مينفعش تكون 4 Gb يكون افضل كلاشان مغيرهاش
انا حيكون عندى 2 هارد ديسك فهل البور سبلاى مناسب
بوالنسبه للماذر بور مش حتعمل عنق زجاجه كده
وبالنسبه للشاشه دى مواصفاتها
https://compareindia.ibnlive.com/specification/monitors/samsung-b1930n/73662
معلش انا عندى كيسه عاديه وباور سبلاى عادى ب 75ج ينفع ولا الكيسه لازم
الف شكر يابشمهندس

[Walid DX01]

الله يخليك بس انا مش مهندس ولا حاجه :)
كارت GTX 750 ti فيه منه نسختين 2 جيجا و نسخه تانيه 4 جيجا
طب هل الاداء مختلف بين الكارتين وايه فائده ال 4 جيجا في الكارت ؟
وهل فرق الاداء مستاهل انك تدفع 200 جنيه زياده ؟

الاداء واحد في الكارتين والاختلاف لصالح نسخه 4 جيجا
بزياده 3 فريم او اقل فقط
نسخه 4 جيجا وجدت من أجل تعدد الشاشات
ومهمه لو كان ريزلوشن الشاشه كبير ومحتاج ذاكره اكبر
مع وجود دقه 1440p \ 4K هنا هيكون الـ 4 جيجا ليهم فائده
نفس الأمر ينطبق ايضا علي الكروت الأخري
اللي نزل منها نسخ 2 جيجا و 4 جيجا
زي GTX 960 و R7 370
فرق السعر بين نسخه 2 و 4 جيجا لا يستحق التضحيه
والحاله الوحيده اللي ممكن تستحق التضحيه
اذا كنت مهتم جدا بلعبه زي GTA V
لانها بتسحب من رامات الكارت اكتر من 2 جيجا في الدقات العاليه فقط

طيب دلوقتي شاشتك 720p
جميع الالعاب في ريزلوشن شاشتك هتستهلك فقط من الكارت
1 جيجا مش اكتر من كده وممكن توصل لـ 1.5 جيجا

المقارنه بالكروت عمرها ماكانت بالذاكره
فيه كروت 2 جيجا افضل من كروت 4 جيجا
المهم قوه معالج الجرافيك الموجود بالكارت
يعني انت لو عايز كارت اقوي من GTX 750 Ti
يبقي ارشحلك كارت GTX 950 2GB ب 1650
معالج الجرافيك هنا اقوي واداءه افضل بالالعاب

لكن كارت GTX 750 Ti يقضي الغرض معاك حاليا
وهتقدر تشغل كل الالعاب وتستمع باداء الكارت
واكيد كل ما يكون كارت الشاشه افضل
هيكون في فرصه افضل لاداء احسن واستمرار الكارت معاك لفتره أطول
لكن اذا كان مفيش ميزانيه اكبر للكارت مفيش مشكله خالص دلوقتي

كارت الشاشه ممكن يشتغل 5 سنين عادي
لكن كل يوم بيحصل تطور والعاب جديده بتنزل
ومواصفات احدث بتبقي مطلوبه باستمرار
وكل ده في علم الغيب مقدرش اقولك
ان الكارت هيشغل الالعاب اللي لسه هتنزل لمده 5 سنين
سواء كان GTX 750 ti او حتي اي كارت تاني أعلي منه

بالنسبه للباور كافي للهاردات وباقي الهاردوير
Cooler Master Force 500 Mid Tower + 500W PSU

دي كيسه كولر ماستر معاها باور سبلاي 500w
الباور الموجود في الكيسه لا ينصح بيه في الكروت العاليه
لكن كارت GTX 750 ti من الفئه المتوسطه ومش بيستهلك طاقه كتير

الامر كله مرتبط بالتوفير يعني لو فكرت تجيب باور خارجي تمام
قول مثلا ب 450 جنيه وهتجيب كمان كيسه فاضيه ب 400 جنيه
وانت مش محتاج كل ده الا لو فكرت في كارت شاشه أعلي

عنق الزجاجه بيكون بين البروسيسور وكارت الشاشه
وانت هنا بعيد عنه خالص لان معالج i5 قادر علي استخراج
كامل قوه اي كارت شاشه موجود حاليا زي GTX 980

في النهايه لو انت مش محتاج رامات ال 16 جيجا
الا لو كانت مطلوبه في شغل السيرفر
الالعاب مش بتطلب رامات اكتر من 8 جيجا حاليا
يبقي كفايه رامات 8 جيجا دلوقتي
والمبلغ الباقي زوده في كارت الشاشه أعلي لو مهتم بالألعاب

[mido 10]

الف شكر لحضرتك ولذوقك والله ربنا يكرمك
اسف للاطاله وملعش اذا استقريت على كارته الشاشه GIGABYTE 2G OC 950 GTX DDR5 حبقى محتاج ليها بور سبلاى عير اللى حضرتك قولت عليه وهل حيكون فارق اوى عن الكارت الاول Gigabyte GTX 750
https://www.game-debate.com/gpu/index.php?gid=2455&gid2=2191&compare=geforce-gtx-950-2gb-vs-geforce-gtx-750-ti-gigabyte-windforce-2x-oc-2gb-edition
بالنسبه للمازر بورد فى 3 انواع مش عارف الفرق بينهم
· GIGABYTE GA-P85 GAMMING
· GIGABYTE G1SNIPER-Z97 1150
Gigabyte GA-B85-HD3 LGA 1150
وهل حيفرقوا معايا فى حاجه
الف مليون شكر واسف على الاطاله

[Walid DX01]

مدام عندك كيسه قديمه يبقي تمام
هتجيب باور جديد 450w او 400w ويفضل يكون براند زي XFX
ويكون معاه شهاده 80plus bronze certified
وللاسف هتلاقي مشكله في شراء باور نضيف في اسكندريه
لكن ان شاء الله تلاقي بسهوله

كارت افضل GTX 950 من GTX 750 ti
هنا فرق الاداء يستحق التضحيه أكيد

بالنسبه للوحه الام
G1 Z97 انت مش محتاجها خالص لانها موجهه للمعالجات
القابله لكسر السرعه وفيها امكانيه تعدد الكروت من انفيديا و اي ام دي
وطبعا اللوحه أغلي بالضعف من B85

B85 فيها مخرج VGA تقدر تشغل الجهاز عن طريق المعالج الرسومي
المدمج بالمعالج في حال عدم وجود كارت شاشه خارجي
في حاله انك مثلا بعت الكارت وهتشتري كارت تاني
هتقدر تشغل الجهاز والدنيا معاك مش هتوقف

P85 مفيهاش مخرج VGA ولازم تشتري كارت شاشه
علشان الجهاز يشتغل

وفي العموم اي لوحه يطلق عليها اسم جيمنج من شريحه B85
بيبقي فيه ميزه كارت صوت قوي
وشكلها احسن لكن هي نفس مميزات اللوحه العاديه

ولو متاح قدامك لوحه اسوس Asus B85 كويسه جدا
ومتفرقش في حاجه عن الجيجابايت

[mido 10]

يعنى كده اخلينى فى Gigabyte GA-B85-HD3 LGA 1150 او Asus (https://rd.bizrate.com/r/6097214225?af_assettype_id=12&af_placement_id=1635526&af_creative_id=2932&rf=af1&af_id=26865) B85
الاتنين دو واحد واحسن بالنسبالى
واذا ممكن ترشحلى حد مضمون اشترى منه وسعره كويس وا اذا الموقع ينفع اشترى منه
والبنسبه للكيه والباور سبلاى
اشترى الكيسه بالبور بتعاها افضل ولا اشتى الباور سبلاى اللى حضرتك قولت عليه
والف شكر

[Walid DX01]

مدام هتشتري كارت GTX 950 .. وكمان عندك كيسه قديمه
يبقي هات باور نضيف 400w او 450w .

افضل شركه في اسكندريه في الاسعار Up to date
في سموحه في شارع سوق الكمبيوتر
بس مش هتلاقي عنده الباور .. اسئل عليه في اماكن تانيه

وعندك كمان جوه الديب مول رشدي هناك في كام شركه كويسه
بس شوف الاسعار كلها الأول
وهتلاقي كل حاجه هناك
المكان اللي تستريح معاه توكل علي الله
بس متروحش ماكسميم خالص علشان اسعارهم غاليه

[mido 10]

تعابك معايا معلش ممكن اعرف الفرق بين الفيجات دى
وايهما افضل وايهما يحتاج الى تضحيه ده بخلاف ان كل موديل من دول فى حاجه اسمها gaming فهل الجامنج اعلى ولا مش مستله


GIGABYTE 2G OC 970 GTX DDR5=




GIGABYTE 2G OC 960 GTX DDR5=1650


GIGABYTE 2G OC 950 GTX DDR5






GIGABYTE 2G 960GTX DDR5 GAMMING=2000

https://www.game-debate.com/gpu/index.php?gid=3346&gid2=2455&compare=geforce-gtx-950-gigabyte-xtreme-gaming-2gb-edition-vs-geforce-gtx-950-2gb
انا مش فاهم الفرق كامه بيين الكروت كلها بس المقارنه دى لنفس الموديب بس واحده oc والتانيه gaming

وفيه فرق سعر فى الماذر بورد
ال

Gigabyte GA-B85-HD3 LGA 1150 =780
Asus B85= 710
فرق السعر ده فى ايه بالظبط هل هو سعر سوق ام فى الامكانيات


وجزاكم الله خيرا

[Walid DX01]

يا غالي كارت GTX 970 هيكون over للشاشه بتاعتك ده غير ان تمنه 3200 جنيه
هو طبعا الأعلي اداء لكنك مش في حاجه له.

كارت GTX 950 مناسب للشاشه بتاعتك في الجيمنج
كارت GTX 960 مناسب كمان للشاشه بتاعتك واداءه اعلي قليلا من GTX 950
وفرق السعر كمان بسيط بينهم ...


Gigabyte GTX 960 2GB WINDFORCE 2X = 1820
ZOTAC GTX 960 2GB = 1850
Gigabyte GTX 950 2GB WINDFORCE 2X = 1625

الأفضل اداء بالترتيب
اذا ناويت علي اول كارت هاته من Micro labs في الديب مول لأنه ارخص سعر
وفي اي مكان تاني هتلاقيه ب 1900

لو ناويت علي نسخه الزوتاك الكارت التاني هاته من اب تو ديت بسموحه
ونفس الموضوع للكارت التالت لانه ارخص سعر في اسكندريه

سعر اللوحه الام طبيعي
وهات الاسوس لانها ارخص ومفيش اي فرق في الامكانيات

[mido 10]

الفرق بين 950 &960 حوالى 200ج فهل ححس بالفرق ولا بلاش منها وايه هو الاصدار الجيمنج ده

[Walid DX01]

متضغطش علي نفسك لو معاك تمن ال gtx 960 هاته
مينفعش خلاص يبقي هات gtx 950
الكارتين كويسين وفرق الاداء بينهم مش كبير

سيبك من اصدار الجيمنج في GTX 960
لانه نفس اداء كارت ال WINDFORCE وب 2100 دلوقتي
مش مستاهل خالص الزياده دي ..

[mido 10]

الف شكر لذوقك وافاتك وربنا يباركلك فى اللى بتعمله جزاك الله كل خير

[mido 10]

معلش يا هندسه
https://www.game-debate.com/gpu/index.php?gid=3241&gid2=883&compare=geforce-gtx-950-gigabyte-windforce-2x-oc-2gb-edition-vs-geforce-gtx-750-ti
اخر كلام بس بالله عليك
انا مش فاهم حاجه من المقارنه دى
ثانيا ختفرق معايا فى الشاشه اللى عندى ولا مش فارقه
ثالثا اى منها عادى الكيسه اللى قولت عليها بالبور بتعاها ولا ايه بالظبط
شكررررررررررررررررررااااااااااااااااااااااااا

[Walid DX01]

موقع game-debate لا يعتبر مصدر ثقه في مقارنات كروت الشاشه
لانه لا يعبر عن اداء الكارت الحقيقي بالالعاب

شوف مراجعه عرب هاردوير افضل من هنا (https://arabhardware.net/2015/09/02/%D9%85%D8%B1%D8%A7%D8%AC%D8%B9%D8%A9-%D8%A8%D8%B7%D8%A7%D9%82%D8%A9-gigabyte-gtx-950/)

الكيسه اللي كانت بالباور تمشي مع GTX 750 ti
انما لو هتجيب GTX 950 استعمل الكيسه القديمه
وهات الباور منفصل علشان متغيرش الباور تاني بالمستقبل ..

[mido 10]

الكيسه اللي كانت بالباور تمشي مع GTX 750 ti
انما لو هتجيب GTX 950 استعمل الكيسه القديمه
وهات الباور منفصل علشان متغيرش الباور تاني بالمستقبل

الباور ده مناسب لل GTX 950

Power Supply Jumbo 350W HEC Gamma

[Walid DX01]

اي باور من دول يمشي معاك
XFX TS Series 430W 80 Plus Bronze = 450
Corsair VS Series VS450M 450w = 450
Thermaltake Smart SE 530w = 470
Cooler Master Elite V2 500W = 400

[mido 10]

فى الغالب حجيب
GTX 750 ti لانى بصراحه مش حاسس بفرق كبير وكمان التكلفه وحجبلها باور سبلاى فقط اجيب انهى نوع
انا عمال اظبط علاشان اوفر فى الميزانيه

[Walid DX01]

بصراحه منصحكش تجيب باور ارخص من كده اولا لانك مش هتلاقي
وثانيا ان تمنه هيبقي قريب من 400 جنيه وجودته سيئه جدا
ومعرض في اي وقت للتلف
شوف الباور ده كمان مع الباورات اللي فوق
سواء هتجيب كارت GTX 750 ti او GTX 950
ودول انسب باورات للكروت اللي بتسحب من 100 لـ 150w


HEC Rapter II Power 500w = 430

[mido 10]

السلام عليكم ياهندسه
فى بعض الاشخاص عرضوا عليا طالما كده كده حدفع فى حدود 4500 الى 5000ج اجيب جهاز ورك استيشن مستعمل حوالى ب3000ج :ah46: وامكانيا جباره فى البروسيسور وكاش عالى جدا اعلى من I7 الصراحه هل البوسيسور ده كويس مع شغل السيرفر والالعاب بوجه خاص
وبالنسبه للفيجا بتاعته هل هى مخصصه للاعاب ولو مش مخصصه للاعاب ممكن احط كارته فيجا من اللى حضرتك قلت عليه سواء 750 او 950 ويشتغل بكفاءه
اذا كان كده فانا حكون وفرت فلوس جامد وامكانيات جباره وجهاز مكنتش احلم بيه
بس بصراحه شاكك جدا فى الموضوع لانى ازاى جهاز بالامكانيات دى بالسعر ده حتى لو استعمال
ثانيا ميين فى اسكندريه ثقه بيبع الجهاز ده بدون كارته فيجا علاشان ينزل فى سعره وامين
اذا حضرتك قلتلى الجهاز ده مينسبنيش فهل من اللمكن يكون فى موديل pc اوريجنال وارد الخارج نفس الامكانيا اللى حضرتك كتبتها من نوع البروسيسور والمازر والباور يكون بيتباع استعمال وانا اجبله كارته شاشه يبقى انصحنى فى الله
معلش انا تعبك معايا ياهندسه بس والله الامر محير ده حاجه ثانيا الميزانيه حصل فيها خلل للاسف والله:ah42:

[phenomenon]

طيب متقولنا الاول على اسم المعالج والموديل بتاعه كامل
لان انت ممكن تجيب معاالج Xeon E5000 عباره عن 12 نواه وكاش 24 ميجا فعلا وادائه ممتاز
لكن ممكن تجيب معالج I7-4700 اربعه كور وكاش 8 ميجا ويكون ادائه اعلى منه وبطبيعه الحال اصبح اغلى منه بسبب التقدم الهندسى الجديد فى تطوير معماريته الحديثه
الامر الاخر اغلب الاجهزه المستورده لها حدود كثيره واحيانا لا يمكنك ترقيه بعض الخصائص عليها
فانت لازم تتاكد من مواصفاتها وتشوفها بنفسك عشان تعرف هل هتقدر تحدث عليها فى كل شىء ام لا

[mido 10]

والله انا معنديش ادني فكره
انا بسال ينفع ولا لا واذا ينفع اجيب ايه

[phenomenon]

مشكله كبيره يبقى ازاى متاكد انه اقوى من I7
شوف اخى الكريم .. بطبيعه الحال جهاز اعمال باتنين Xeon فى حدود 3000 جنيه اكيد سيرفر كويس نسبيا
ولكن نقطتين مهمين : الاولى انت جيت هنا تعمل موضوع عشان متغلطشى غلطه تندم عليها بعد سنه ولا اتنين
والوجهه الاخر للمشكله هو ان عندنا فى بعض التجار فقط اللى يوهمك ان معالج Xeon اقوى من I7 ويسيبهالك عايمه

لا قالك موديل المعالج Xeon بتاعه ولا قالك موديل I7 المقصود
بالرغم اننا الان لدينا تقريبا 6 اجيال مختلفه من معالج I7 فقط وجميعهم مختلفين عن بعض فى كل شىء
وبغض النظر ان هناك 6 معالجات اخرى I7 - Extreme

فهو مبدايا لما يجيبلك معالج Xeon 12 Cores 12mb Cahse على سبيل المثال من عام 2007 ويقولك اقوى من I7 كلام مش صحيح
هل يقصد I7-3700K or I7-2600K or I7-4700K وفى جميع الاحوال لا مش هيكون اقوى حتى وان كان المعالج 30Cores
لان سنه انتاج المعالج مهمه جدا لانها بتعرفنا نوع المعماريه بتاعته اللى بتثبت لينا فى النهايه بعد معرفه خصائصه كامله من صفحته الرسميه
هل هو لم يعد يصلح للتطبيقات الحديثه والالعاب ام لم يعد يصلح الاعتماد على هذه المعماريه ويجب النظر للمعماريات الاحدث

ام كان يقصد I7-860 مثلا ؟ اذا كان هذا هو المقصد على سبيل المثال ( فهو تشبيهه خاسر ويؤكد على ضعف الجيلين حاليا )

بغض النظر ان معالجات I7 موجهه للالعاب تحديدا ولكن هذا الامر غير دقيق لانه يمكنك الاعتماد على Xeon ايضا فى الالعاب
ولكن فى الحقيقه وعلى ارض الواقع سترى اختلافات رهيبه حين تجربه الالعاب الحاليه على المعالجات السابقه متعدده الانويه

تخيل ان معالج I7-4700 صاحب اربعه انويه معالجه لا يقدم اداء اكثر من I5-4600 بالرغم انه اكبر منه فى خصائص كثيره
سواء اربعه خطوط معالجه زياده او كاش ميجا اكبر او تقنيه HT اللى بتقسم مسارات الانويه من 4 الى 8 وبالتالى بتسرع من انهاء انجاز العمليات والاوامر

هذه الخصائص التى تجعل من معالج I7 اعلى تقريبا $100 دولار عن معالج I5 وتخيل انها لا تفيدك بالالعاب
ولكن ربما تفيدك فى نظام الخوادم وتفيدك جدا مع برامج التصميم والسبب الرئيسى انها بتفيدك لان مطورين البرمجيات نفسها
اللى بتشتغل على المعالج - اما بتكون موجهه للاستفاده بتعدد الانويه ومصادر المعالجه او ليست موجهه للاستفاده الكامله بها

فتاتى الالعاب على سبيل المثال اقل المستفيدين من تعدد خصائص المعالجه فى المعالجه ولا يتمكن معالج تمنه 100$ زياده
ان يحقق نتيجه اكبر عن معالج I5 ولا حتى اطارين او تلاته وهذا هو الغالب
صدق او لا تصدق معالجات اتنين نواه من المعماريات الحديثه زى Pentium + I3 تحقق نفس نتائج I7 + I5 فى غالبيه الالعاب حين شراء كارت شاشه متوسط الجهد


فما بالك اننا نتكلم عن الالعاب وعن معالجات 12 نواه وعن اتنين معالج على المنصه
تخيل ان بيانات اللعبه تسير مبرمجه على انها قطار سريع وتخيل ان النواه هى شريط السكه الحديديه
ثم انا جيت اقولك ايه رايك لما اعملك فى الدوله دى 12 شريط سكه حديد جمب بعض
هتقولى بكل بساطه " اعمل بيهم ايه وانا معنديش فى الدوله غير قطار واحد سريع "
يبقى انا بكل بسيطه بقدملك مشروع فاشل مرهق للميزانيه وغير كفؤ فى نتائجه وبالتالى هتتجنبه
لكن هتبدا تفكر فى شراء شريط سكه حديده واحد للقطار بتاعك من افضل انواع السكك الحديديه الموجهه لتحمل القطار التقيل بتاعك

ولهذا الالعاب لا تحتاج سوى اقرب واقل عدد من السكك الحديديه فى غالبيه الاحوال
ولكن عندما تعطى لها نواه قويه وحديثه فى نظام برمجتها ونظام الهندسه البرمجيه نفسها ودمج تعليمات التحليل بطرق اكثر خبره ليها
تقدر تخلى القطار بتاعك يسير بسرعات كبيره جدا

فى النهايه تجد الالعاب تحقق نفس نتائج معالج الجيل الواحد لكل من زيون و I7 + I5
لكن عندما تاتى بمعالج زيون جيل قديم 12 نواه فكون متاكد انك لن تستطيع ان تكون بكفائه معالجات I7 + I5 + I3 من المعماريات الحديثه

وهنا الامر يفرق بين شخص عارف وشخص مش عارف وانت هنا عشان تعرف اى شىء ناقصك قبل ماتشترى
لما يقولك عندى جهاز باتنين زيون هيبقى جامد جدا للالعاب
دور فى دماغك فورا " حتى دون ان تناقشه " ان المعالج التانى على المنصه ميت تماما اثناء تشغيل الالعاب
فلا يوجد لعبه واحده حتى الان تم تطويرها للاستفاده بهذا الكم الرهيب من مصادر المعالجه

تخيل ان معالج Xeon E5 2697 v3
تخيل ان ثمنه اكتر من 20.000 الف جنيه مصرى للمعالج الواحد ومش بينزلوا مصر وهم موجهين للسيرفرات
طيب تخيل ان I7-5960X تمنه 7000 جنيه تقريبا وموجود
لكن هل تصدق انهم جميعا لا يستطيعوا ان يقدموا اى نتائج زياده ملحوظه عن I7-4700 او I5-4600 اللى تمنهم 2000 جنيه فقط ؟

طيب انا ليه تحديدا قارنت بين المعالجات السابقه ؟ دا سؤال مهم جدا
الاجابه لان جميعهم من جيل واحد ومعماريه هندسيه واحده Haswell 22nm

ودا لان الالعاب لا تستفيد من تعدد مصادر المعالجه
تروح على مراجعه حديثه على موقع زى Anadtech
تلاقى النتائج متفاوته وقريبه من بعضها جدا على معالجات الجيل الواحد
لكن لما ترجع بالجيل للوراء ويكون الرجوع فتره زمنيه بعيده تبدا تظهر نسبه الضعف الكبيره

تخيل الامر ايضا انك لديك لاعب محترف سنه اصبج 40 سنه ولدك لاعب محترف سنه 20 عام
فما هو الافضل ومين اللى هيقدر يدى فى المباره اكتر من التانى ؟
اكيد الشباب هيكون افضل واسرع ومجهود اكبر وفكر احدث ولذلك فى النهايه

نصل لاهم نقطه تفرق بين اللى عارف ومش عارف = موديل المعالج والمعماريه الهندسيه هى الدليل الوحيد على قوه المعالج ليست فقط مصادر معالجته

اما بخصوص السيرفرات والتصاميم فاغلبها يستفيد بتعدد المعالجات على المنصه ولكن ايضا مره ثانيه المعماريه دليل هام

[mido 10]

بجد جزاك الله كل خير اتقنت وامتعت وتفننت وكله بالدليل
تسلم ايدك يا كبير ومليار شكر ليك

[mido 10]

السلام عليكم ورحمة الله وبركاتة
اسف انى بقالى كتير مردتش ولكن حصلى ليا ظروف منعتنى من شراء الجهاز الفتره اللى فاتت فباذن الله حستقر على التجميعه دى بس طالب منكم اضافه او التعديل عليها اذا فى حاجه افضل ومتنسوش خصوصا الاسعار فى الاسكندريه اشترى منيين وبكام



Intel Core I5-4460 3.2GHz (https://www.ebay.com/sch/i.html?_odkw=intel&_osacat=6028&_from=R40&_trksid=p2045573.m570.l1313.TR12.TRC2.A0.H0.TRS0&_nkw=intel&_sacat=0)=


Asus B85 (https://rd.bizrate.com/r/6097214225?af_assettype_id=12&af_placement_id=1635526&af_creative_id=2932&rf=af1&af_id=26865)=


Kingston HyperX FURY 8GBDDR3 1600 CL10 1.5v=


Kingston HyperX FURY 8GBDDR3 1600 CL10 1.5v=


ZOTAC GeForce GTX 950 AMP! Edition 2GB=


XFX TS Series 430W Bronze=
هل اغير حاجه فى احدث؟
سؤال اخير اذا عايز اشترى كيسة من غير باور علاشان البور اللى فوق
او ترشحولى كيسه بالبور بتاعها بس يشيل الفيجا كويس اوى
واذا تنصحونى بكيبور كويس مخصص للالعاب

dx01 (https://arabhardware.com/forum/member.php?u=11331204) شكرا ليييك
اسف جدا على تعبكم خصوصا العضو

[mido 10]

مفيش فى up to date الفيجا دى او الباور سبلاى xfx بس فى دول واسعارهم ايه
Gtx 950 gigabyte windforce. 1625
Gtx 950 Msi gaming. 1775
Power supply corsair vs 450. 425
ايه رايكم اختار منهم ولا اجيب من حد تانى ولا ايه