تحديث الرامات

[Aemad]

السلام عليكم

طبعاً مع الألعاب الحديثة الواحد نحتاج رامت لا تقل عن 8 جيجا علشان نعرف نلعبها

حالياً الواحد يمتلك رامات 2*2 جيجا تردد 1333 ماركة كينك ستون وبروسيسور i3 وبوردة p55

المشكلة هي اثناء البحث وجدت الأتي :

1- معدش فيه رامات باص 1333 واقل رامات 1600
2- البروسيسور لا يدعم رامات 1600, أقصي حاجة ليه هي 1333 ودا اللينك الخاص بيه https://ark.intel.com/products/46473/Intel-Core-i3-540-Processor-4M-Cache-3_06-GHz
3- البوردة لا تدعم باص 1600 مع العلم أنها بتدعم ما هو أعلي منها كرامات باص 2400 ودي محيراني جداً, أزاي تكون بتدعم رام باص 2400 ومش بتدعم رام باص 1600 ودا اللينك الخاص بالبوردة https://www.gigabyte.com/products/product-page.aspx?pid=3441

وحاليا الميزانية لا تسمح سوي بشراء رامة 4 جيجا باص 1600
فعندي سؤال : لو جبت الرامه دي هتشتغل معايا ولا هيحصل مشاكل بالتعارض مع الباص 1333 الحالي
طيب لو بعت الرامات الـ 4 جيجا وكملت وجبت واحدة رامه 8 جيجا هتتشتغل مع البوردة والبروسيور زي ما انا موضح فوق ؟

[phenomenon]

وعليكم السلام ورحمه الله وبركاته
كل شىء مسموح باذن الله ولكن بيترتب عليه نتائج محدده

يعنى انت هتشترى رامه 1600mhz ولطن التردد دا هينزل لتردد 1333mhz لسببين
الاول ان اختها اللى جمبها ترددها 1333mhz وفى الحاله دى فى صعوبه فى توازن العمل
ولذلك اللوحه دورها هنا توازن الاداء وتثبت الاتنين على 1333 لان اكيد التردد القليل المصنعى عمره مايقدر يوصل للتردد الاعلى

اذن نلخص اللى فات فى جمله واحده " اقل تردد رامه على المنصه سيكون التردد الاساسى لكامل رامات المنصه " وفى حالتك 1333

السبب التانى هو ان المعالج داعم اقصى تردد 1333
فى الحاله دى لو رامات المنصه كامله كانت 1600 هتبدا تكسر سرعه المعالج عشان تقدر ترفع من راتيو الرامه
اما لو مكسرتش السرعه هتفضل سرعه الرامه ثابته على 1333 بدون مشاكل

اذن فى النهايه يمكنك شراء رامه 1600 بدون اى مشاكل
لكن حاول قدر المستطاع انك تتاكد من توافق موديل الرامه من صفحه اللوحه الام وغالبا هتكون مدعومه ان شاء الله

[Aemad]

اذن فى النهايه يمكنك شراء رامه 1600 بدون اى مشاكل
لكن حاول قدر المستطاع انك تتاكد من توافق موديل الرامه من صفحه اللوحه الام وغالبا هتكون مدعومه ان شاء الله



أولاً شكراً Phenomenon علي الملعومة دي, لأني كنت فاكر أن الجهاز مش هيقبل الرامة أصلاً لأني حصلي مشكلة مع رامات من نوع k.tec هشرحها في ثالثاُ

ثانياً دا موديل الرامة اللي ناوي أشتريها Kingston HyperX FURY Blue 4GB DDR3 1600MHz CL10 1.5v ودا لينك اللوحة الأم https://www.gigabyte.com/products/product-page.aspx?pid=3441#sp
ودي حاليا الرامات اللي موجوده علي الجهاز
https://imageshack.com/a/img908/8601/HVSTKd.png

فكدا تشتغل عادي بدون مشاكل ؟

ثالثاً ودي مشكلة حصلتي من حوالي شهر ونص تقريباً
زي ما قولتلك أني دورت علي رامات باص 1333 لكن ملقتش أي ماركة معروفة وفي النهاية لقيت رامه باص 1333 من شركة k.tec وللأسف أشتريت رامتين 2*2 لشان أرفع الرامات لـ 8 جيجا
في البداية اتبهدلت في فك وتركيب الرامات القديمة والجديدة من البوردة وتغيير أماكنهم علشان الجهاز يشتغل ... فمرة الجهاز يطلع صفارة أول ما أشغلة ومرة يدخل علي الويندوز وبعدها يطلع مباشرة ومرة يشتغل حلو ومفيش مشاكل في التشغيل ومرة واحدة الشاشة الزرقاء تطلع
أنا قولت جايز العيب من نوع الرامة لأنها ماركة مش معروفة ومختلفة عن رامات الكينك ستون اللي مركبها وواحد صاحبي قالي أن الماركة صيني وغلط لما أشتريتها
بس صاحب المحل قالي أن بالرغم من أن البوردة تشيل 4 رامات لكن كل دا كلام علشان البيع

فدا ممكن يحصل لو أشريت الرامة الجديده اللي قولتلك عليها دي وبكدا يبقا مجموع الرامات علي البوردة 3 رامات

[شلشاوي]

الافضل انك تشتري رام الثانية من نفس الشركة ونفس الموديل للرام الاولى لتجنب المشاكل

[phenomenon]

والله يا اخ احمد مش عاوز اقولك ضرورى لكن يفضل جدا تكون الرامات على اللوحه عباره عن كيت واحد جايه فى علبه واحده

احيانا تروح تشترى رامه FuryX 4G DDR3 1600MHz CL10 1.5v زى المنوى عليها ولما تيجى تعلى الرامات مش تلاقيها
فالحل الوحيد هو البحث عن نوع اخر من شركه تانيه A-data او Crucial او Corsair او غيرهم
او حتى موديل مختلف لنفس الشركه لكن بنفس الخصائص وليكن Kingstone Savage 1600MHz CL10 1.5v

بالشكل ده مفيش Dual Channel نشط .. حتى لو برنامج CPUz قال انه متفعل لان حتى مع تشابهه المواصفات الواحده لموديليين الرامات
الا ان هناك فارق هيكون واضح فى خصائص عمل كل رامه فى سرعه القرائه والكتابه وعمليه النقل ...... ولكن .. هل هذه مشكله ؟

اطلاقا .. ليست مشكله .. السؤال الوحيد اللى ممكن نساله ؟ هل فى توافق بين الاتنين على اللوحه الام ولا فى مشاكل ؟
فاذا كانت الاجابه فرضا " انا ركبت الرامتين والجهاز بوت ودخل على الويندوز وبقالى اربع ساعات بلعب "
اذن مفيش اى مشكله من الاختلاف ....... طيب ماذا عن الاداء ؟

عمليه الاداء عمليه متفاوته تماما ولا يمكن الحكم فيها ....
من فتره طويله احد المواقع المشهوره عمل مراجعه على اختلاف انواع الرامات على المنصه الواحده وتم ملاحظه امور غريبه جدا -
احيانا الانواع المختلفه لديها القدره على هزيمه كيت رامات يعمل فى نظام Dual Channel بفرق %1 واحيانا العكس صحيح ايضا

اكيد الشركات بتنبهنا على افضليه تفعيل Dual Channel اللى بتزيد من كفائه الرامه 2%~%1 ولكن المراجعه اثبتت عكس ذلك
لكن معناها الافضل " ان كيت الرامات الواحد على المنصه فرصته افضل فى تجنب المشاكل والحصول على استقرار الاداء بمجرد شرائها "
يمكن مع المعماريات الجديده من DDR4 وفرصه تفعيل Quad Channel يكون ليها افضليه واضحه فى توافق الكيت والله اعلم

لكن مراجعه DDR3 اثبتت انك مره هتخسر اطار واحد فى لعبه لكيت مختلف ومره هتحقق نصف اطار زياده فى لعبه اخرى على كيت مختلف
ومره تحقق اطارين فرق من نوع اخر لكيت متوافق ومره تحقق اطارين زياده فى لعبه تانيه لكيت مختلف تماما حتى وان كانوا موديلين مختلفين
لذلك العمليه متفاوته تماما واختلاف نتائج Benchmarking الرامات سواء بالزياده او بالنقصان بعد شرائها لا تعنى شىء فى الحياه العمليه للرامه

الماركه الصينى بطبيعه الحال ليست جيده والمفروض انك بمجرد ماتلاحظ شاشه زرقاء او صفاره او عدم المقدره على التبوييت او ايه مشاكل
تعرف فورا ان فى مشاكل فى التوافق بين مختلف انواع الرامات او بين الرامات واللوحه الام دا فى حاله انك متاكد من تركيبها ومن سلامه السوكيتات

والماركات الاوريجنال افضل زى Dell او خلافها
لكن بالتاكيد ليست فى كفائه رامات زى Kingstone او A-data وهم شركات متخصصه فى صناعه الـ Memory Chip
اكيد اداء افضل ودرجات حراره واستهلاك طاقه اقل وفتره عمر اطول وتوافق اكبر مع معالجات ومنصات ال end users

الرامه اللى راكبه فى slot#1 حجمها 2GB وترددها 1333MHz وتواقيتها CL9 فولتيه 1.5v وهنفترض ان القطعه الاخرى مشابهه

وانت هتشترى 4GB 1600MHz 1.5v CL10 ومع هبوطها القهرى الى 1333MHz ربما تقدر تضبط تواقيتها على CL9
عشان تقربهم من بعض نظريا فى نظام العمل قدر الامكان وان لم تستطع او لم تحصل على استقرار مش موضوع مهم

المهم فى الموضوع كله ان الرامه تتركب والجهاز بعدى مرحله الاقلاع بدون مشاكل واضحه وبعدها تبدا تختير الجهاز
مش شرط برامج اختبارات محدده وممكن Passmark performance test كفيل بالحكم ولكن بوجهه عام
المراحل المختلفه من التحميل ومن ثم العوده الى الخمول مع ملاحظه ثبات استقرار الاداء كافيه للاطمئنان ان كل شىء يعمل كما ينبغى
اعتقد ان ده تقريبا كل شىء نظريا والله اعلم

[Aemad]

شكراً
Phenomenon (https://arabhardware.com/forum/member.php?u=11301600) بجد انت انسان مثقف محترم عايز تفهم اللي قدامك مش مجرد الأجابة علي سؤال والسلام



الافضل انك تشتري رام الثانية من نفس الشركة ونفس الموديل للرام الاولى لتجنب المشاكل

شكراً شلشاوي