الطريقة الصحيحة لكسر سرعة الكارت Sapphire HD 7850 النسخة الـ 2 جيجا ؟؟

[romance11]

بسم الله الرحمن الرحيم

لو سمحتم يا جماعة انا عندى كارت Sapphire HD 7850 2G DDR5 النسخة الـ over clocked
ودى صورة للكارت
https://s25.postimg.org/6nmxi27hr/Sapphire_HD_7850_2_G_DDR5.jpg

ودى صورة للكارت من برنامج GPU Z

https://s25.postimg.org/i19gt9i0f/image.jpg

ودى صورة للكارت من برنامج MSI afterBurner

https://s25.postimg.org/kg1cdoy9b/HD_7850.jpg

طبعا فى الصورة الكارت مكسور السرعة
ولكن انا عاوز اعرف لو فى اكتر من كدا ولا كدا اخر الكارت مع الحفاظ ع استقرار الكارت وعمرة الافتراضى
ودى مواصفات جهازى
البوردة
Gigabyte H61M S2P
البروسيسور
intel® Core™ i5-2400 – up to 3.4GHz
الرامات
team Elite 6GB
كارت الشاشة
Sapphire HD 7850 2G DDR5
الباور
Cooler Master 500W Elite V2
الهارد
64MB Cache WD 1 TB black
الشاشة
19 بوصة

ياريت اعرف تجربتكم الشخصية وطرق كسر السرعة الافضل

شكرا ليكم

[phenomenon]

بلاش فولت وعنيك على الحراره ( هتفضل فى امان تام )

مبدايا متجيش ناحيه الفولت نهائيا والافضل انك تقفل امكانيه التلاعب فيه
استخدام الفولت الاعلى لكارت الشاشه مشابهه تماما لاستخدام الفولت الاعلى للمعالج المركزى ( كلاهما من اجل الحصول على الاستقرار مع كسر الترددات العاليه )
الا ان الامر اكثر خطوره مع كارت الشاشه
( فهى بسهوله يمكن ان تصل الى 80C فى بعض الحالات على فولتياتها المصنعيه )
( بعض المعماريات تعمل على تغزيه المعالجات بالفولت الاعلى تلقائيا ولكنها مخصصه لمعالجات انفيديا بسبب التربو بووست )
( ولكن استخدام فولتيات اعلى يؤدى الى ارتفاع حراره المعالج اكتر وفى نسبه خطوره اذا لم تكن بدرايه كافيه عن الامر وان كان المعالج درجه حرارته فيها عدم راحه بالنسبالك )

مبدايا اعرف درجه حراره الكارت وقت الخمول كام اقصاها ؟
مبدايا اعرف درجه حراره الكارت وقت الضغط كام اقصاها ؟
لمعرفه درجه الحراره فى الضغط الشديد استخدم برنامج زى MSI Kompustor لمده 10 دقائق فقط باختبار Burn in Test
اذا لاحظت اغلاق فجاه للجهاز فهذا عيب من الباور سبلاى
اذا لاحظت درجه حراره الكارت ارتفعت عند 80C ~ 85C فهذا يعتبر الازعاج الا متناهى من صوت المراوح وبالتالى درجه الحراره ليست جيده ايضا
اذا لاحظت ان درجه الحراره فى رنج 75C ~ 80C ابدا بكسر السرعه

اذا لم تقم بتغير الفولتيات فهذا يعتبر كسر امن جدا وسهل الحصول عليه
1- شوف تردد نواه المعالج كام = مكتوب 1000MHz
2- شوف تردد باص ذاكره الفيديو كام = مكتوب 1370MHz
3- برنامج MSI يسمح لك بزياده بسيطه جده ملحوظه من خلال الصوره اللى انت رافعها ( يعنى اكيد نهايه حركه المؤشر للنهايه هى حدودك حتى لو كان هناك سماح اكبر )

ابدا الكسر

1- طريقه رقم 1 هى زياده تردد النواه 5MHz تدريجيا او 10MHz تدريجيا او اجمع 3% من تردد النواه
شخصيا افضل طريقه النسبه المؤيه لانها سريعه ومنجزه ومش هتعرض الكارت للتعذيب فترات طويله وبتوحى بامكانيه اتاحه الكسر او هتوقفنى عند التردد المصنعى

1- اجمع 1000 + 3% = النتيجه 1030MHz - اذن هحرك المؤشر لما وصله لحد 1030MHz او ممكن تكتب فى المربع الاخضر 1030MHz وتضغط انتر
افتح برنامج MSI Konpustor واستخدم اختبار burn in test لمده 5 دقائق
راقب الحراره - هل هى فى حدود الامان ؟ اذن تمام
ارتفاع درجه الحراره مع البرنامج ده ليست خطيره جدا ولكن لا تجعلها تصل للحدود الخطيره جدا 90C واعلى
اذا الحراره تمام
هل لاحظت ظهور نقط بيضاء على الشاشه او خطوط او اى artifacts او شاشه سودا او التعريف عمل اعاده تهيئه لنفسه ؟
مش تقلق من حاجه ولكن ده دليل ان الكسر غير ناجح ولا يمكن السماح لهذه القطعه من معالج 7850 بالكسر
اما اذا بعد 5 دقائق الامور على مايرام اذن اغلق البرنامج
انتظر 5 دقائق قبل ان تبدا فى عمليه الضغط مره تانيه
الافضل انتظر 10 دقائق ( مجرد نصيحه )

افتح برنامج UNIGINE VALLY واعمل اختبار روتينى على اعدادات defaults بتاعته ولكن اتاكد انه متفعل على DX11 وابعاد الشاشه بتاعتك و fullscreen
هل انتهيت تمام ام حصل فريز وتجميد اثناء الاختبار ؟
لو حصل فريز وتجميد يبقى الكسر غير ناجح
اما لو انتهى بدون مشاكل اذن الكسر ناجح
روح زود كمان 3% ووافق وراقب الزياده دائما فى برنامج GPUz بعد الموافقه عليها من برنامج MSI Afterburner
هل المعالج سمح بالزياده 3% كمان ؟
زود
هل لم يمسح باخر 3% ؟
طيب ارجع تانى خليهم 2%
وشوف نتيجه الاختبار

بلاش زياده فى الفولت عشان ميحصلشى مشاكل لان الباور معاك ممكن ميحقششى الاستقرار المطلوب
فقط اتاكد انك زودت قيمه Power Limit الى اقصى حدودها قبل ان تبدا بعمليه الكسر

[romance11]

شكرا يا غالى ع النصيحة
بس انا جربت انى اعمل الكسر الى ف الصورة دى قبل ما حضرتك تكتب الرد دا

https://s25.postimg.org/e7klxuq27/Untitled.jpg

وعملت علية تست من برنامج FurMark 1.17 على اعدادات الى فى الصورة دى
( ملحوظة انا قاصص الصورة علشان اجيب الاعدادات وبس )

https://s25.postimg.org/beredtppr/Fur_Mark_2015_12_28_23_53_44_52.jpg

عملت الضغط دا حوالى 6 دقايق واقصى حرارة للكارت كانت 78 درجة
وفى الخمول حوالى 28 درجة
فهل اثبت ع كدا ولا انا كدا عالى اوى فى الاوفر كلوك ؟؟؟

معلش بقا هعطل حضرتك معايا

[romance11]

وجربت حضرتك الكسر دا بعد ما شفت رد حضرتك
زى الصورة كدا
( مع العلم انى زودت الكور كلوك بقى 1030 بدل 1025 )

https://s25.postimg.org/msdxp108f/Untitle.jpg

مع الكسر برضة ببرنامج Furmark ولحوالى 6 دقايق برضة
درجة الحرارة القصوى 78 درجة
درجة الحرارة فى الخمول 28 درجة
ياريت اعرف بقا انهى كسر اامن ليا وكويس للكارت وعمرة الافتراضى ؟؟

[phenomenon]

الكسر امن جدا جدا ودرجه الحراره كويسه جدا مع برنامج قاسى زى ده
متقلقشى من عمر المعالج لانه لحد دلوقتى داخل عمره الافتراضى طالما لم تقم بتغير فولتياته
دائما درجه الحراره الكويسه والمعتدله بتساعد على فتره عمر اطول للمعالجات وعشان شيب الرام كمان مشكلته اكبر وعليه خطوره زى المعالج تماما
الاهم من كده سرعه المراوح = لو كانت عاليه جدا وتوصل لحد الازعاج 80% واعلى فده تقريبا خطير على عمرها
لكن عموما كل الامور دى نظريه

دلوقتى انت زودت 3% للنواه ولكن نسيت اقولك ان الميمورى فيه سماح اكبر وشخصيا بفضل انها تكون الضعف
يعنى 6% كبدايه واحتمال كبير تسمحلك بالزياده ان شاء الله - ممكن تبدا ب 5% للاحتياط
1370MHz + 5% = النتيجه 1438MHz ولكن برنامج GPUz هيبينهالك انها 2.5% فقط مش تقلق من دى
المهم اضبطها على 1438MHz

سيبك من FURMARK مؤقتا 0 صدقنى الخلاصه فى UNIGINE VALLY - بالنسبالى كان احباطى دائما لكن اتاكدت انه الافضل والامن بدل العذاب المستمر للمعالج
FURMARK + MSI KOMP كانوا بيتموا معايا لمده ربع ساعه عذاب وكل شىء تمام
اروح اعمل اختبار على UNIGINE VALLY الاقى ارتيفاكت او فريز لمده ثانيتين تلاته

انت ممكن تنفز اختبارات كتيره وتفتكر انك حصلت على استقرار وتيجى على لعبه واحده بعد اسبوع تلاقى فرييز
بتبقى مش مشكله كبيره وبتحتاج هبوط بسيط جدا وترجع ولو 5MHz وبعدها تحصل على استقرار دائم ان شاء الله

[romance11]

يا باشا لما دخلت العب لعبة Need for speed 2012 ع الاعدادات الهاى
عدد الفرامات ضعيف مقارنة بقبل الكسر
يعنى قبل الكسر كان متوسط الفريمات 50
انما بعد الكسر حوالى 30
واللعبة بتتلعب معايا حوالى 5 دقايق والشاشة تتحول خطوط والجهاز يقف
الاوفر كلوك كان زى الصورة الاخيرة دى
الاوفر كلوك كان كالاتى
- كور كلوك 1030 ثم قللتها لـ 1000
- الميمورى كلوك 1400
وبرضة الجهاز بيعمل خطوط بطول الشاشة كدا
فى الحالتين سواء 1030 او 1000 للكور
ارجع للوضع الاول خالص ولا اعمل اى ؟؟
مش عارف فى اى ؟؟؟

[phenomenon]

يعنى الزياده فى الميمورى معاك بتتسبب فى خطوط فى الشاشه

مبدايا لعبه NFS لو تقصد The RUN فهى كانت مقفوله وقت الجيم بلاى على 30 اطار
لو تقصد NFS MW فكانت مقفوله على 60 اطار
فى جميع الاحوال لو عاوز تشوف الفرق جرب لعبه تانيه واتاكد انك لاغى تفعيل V-Sync فى قوائم جرافيك اللعبه لحد ما تخلص اختبارات

1- ارفع ال power limit الى اقصاه
2- اضبط الكور كلوك على 30 عادى
3- سيب الميمورى دلوقتى خالص

جرب تلعب اكتر من لعبه تانيه ( جرب باتل فيلد او باتمان او ويتشر او جتا 5 ) بلاش الالعاب المقفوله وشوف النتيجه

[romance11]

انا عملت الاعدادات دى

https://s25.postimg.org/lh66gk4mn/Untitled.jpg

وشغلت برنامج Unigine_Valley 1.0 وعملت لها بنش مرك ع الاعدادت الهاى والالترا
زى الصورتين دول

https://s25.postimg.org/arshoastr/1380_MB_high.jpg

https://s25.postimg.org/8oi2gmt0v/1380_MB_ultra.jpg

وشغال تمام الحمد لله وكويس
اقصى درجة حرارة للكارت هى 65 درجة
والخمول بتوصل 25 او اقل
وشغلت لعبة Need For Speed most wanted 2012 وشغالة تمام وكويسة
بس مش عارف لية قافلة ع 30 فريم
هى بتطلع ثوانى لـ 60 فريم بس بتنزل تانى
هشوف العاب تانية وهجرب تانى واشوف الدنيا

ربنا يستر

[phenomenon]

كويس جدا كده الزياده 3% فقط للنواه مستقره معاك
اللعبه محركها نفسه مقفول على 30 اطار - كان فى كراك زمان ليها بيفتح الاطار تقريبا لفريق Fairlight بس مش متذكر بصراحه
اللعبه دى اساسا كانت مشاكلها stop working فجاه مبتنتهيش

طالما برنامج UV عداه على الترا يبقى ان شاء الله الزياده دى مقبوله
اعطى للكور كمان 2% يعنى وصلها 1050mhz وشوف النتيجه
وقولنا على النتيجه

[romance11]

انا عملت الاعدادات زى ما هى ولكن غيرت فى الكور بس [ من 1030 الى 1040 ]
تغيير بسيط كدا ومش حابب ارفع اكتر من كدا والرامات زى ما هى [ 1380 ميجا ]
ودى الاجتبارت ع برنامج Unigine Valley 1.0

https://s25.postimg.org/gz3vogokv/Untitled.jpg

مع العلم انى عامل الاعدادات ع [ الالترا ] وكمان [ Anti-alising X8 ]
ولسة هجرب كمان ع العاب كتير
يارب بس ربنا يسترها وخير ان شاء الله

الف شكر لحضرتك ومعلش بقا عطلتك معايا
الف شكر

[phenomenon]

مش تقلق من اى شىء يارب تفضل تعمل كده طول اليوم - انت ليه قلقان ؟ احنا مغيرناش فى فولتيه الكارت
وكمان برنامج المراجعه ده ذكى جدا باذن الله وانا فضلت انك تشتغل عليه وتبعد عن furmark مؤقتا - يعنى كانك بتلعب شويه فيفا على اعدادات الترا مش اكتر
انا كنت اتمنى انك توصل حتى لكسر 5% فى الكور لكن لو انت شايف ان الزياده 4% كافيه ليك يبقى تمام جدا
الميمورى - غالبا كروت AMD بتكون واخده اقصى حدودها من قبل ما تخرج من المصنع
يعنى ممكن مش تقدر تكسر فيها بعكس كروت تانيه ولكن هى متفاوته
طالما هى ظهرت معاك خطوط قبل كده بمجرد زياده طفيفه يبقى سيبها زى ماهى لكن تذكر انها ظهرت معاك قبل ماتعلى خيار الباور
ممكن تعطيها كمان محاوله او تكتفى لحد كده

[ahmad2006771]

انا اسف اني تدخلت بس عايز اعرف فائدة كسر سرعة الكارت
الا يقلل ذلك من عمر الكارت بسبب ارتفاع درجة حرارته
وهل يؤثر ذلك الكسر ايجابيا في الالعاب

[phenomenon]

كسر سرعه الكارت ايجابى جدا للالعاب عن كسر سرعه المعالج المركزى
ممكن بساطه وزياده طفيفه جدا فى الكور والميمورى تهرب من عنق الزجاجه اللى ممكن يقابلك على الاعدادات اللى بتفضل تلعب عليها بدون ماتضحى بيها
يعنى لو كنت بتحقق على سبيل المثال 53fps معدل متوسط الاطارات فى لعبه بالرغم انك عاوز توصل ل 60fps عشان تنشط خيار V-Sync
ممكن بكسر 5% للنواه و10% للميمورى فقط تحقق المعادله دى بكل سهوله
فى جميع الالعاب هتحقق متوسط عد داطارات لا يقل عن 7 او 10 او 15 اطار مع كسر سرعه الكارت بالنسبه دى


الميزه الاكثر اهميه انه ممكن يحققلك توازن مثالى لو معاك كارتين شاشه مختلفين شركه التصنيع مثلا وليكن Sapphire 7850 + Power color 7850
اختلاف تردداتهم بطبيعه الحال بيتسبب فى عدم توازن وتاخير الكارت التانى ( اللى هيكون اقل فى الترددات )
بمجرد ما تكسر سرعته اذا لاحظت انه سمحلك بكده بالشكل دا بقى فى عمليه توازن مثاليه فى شغلهم بدل مايكون فى واحد متاخر عن واحد فى دوره عمله الزمنيه ( تردداته )


بيساعدك جدا فى رندر المشاهد 3D التقيله وبيحاول ينجر عمليه تحليلها فى وقت زمنى اسرع
ممكن يساعدك فى شغل المونتاج او وقت تصوير العابك بدون ما تبدا ت لاحظ هبوط فى الاداء وقت التصوير عن 60 اطار


كسر سرعه كارت الشاشه للالعاب ايجابى جدا وعن تجربه واكيد ايجابى لاصحاب الالعمال الهندسيه وكمان سهل جدا انك تلغيه او تفعله بدون ريستارت ووجع دماغ
كسر سرعه معالج البيانات ايجابى جدا للاعمال التقيله الا انه لازم فولت اعلى وبالتالى استهلاك اكبر فى الطاقه وفاتوره اعلى بدون داعى
لكن السؤال الاهم ايه مكسبك ؟
هل بتكسب وفى دخل مهنى هيعوضلك استهلاك الطاقه الزايد فى المعالج المركزى ؟ لو الاجابه لا فالسؤال ليه هتكسر ؟
عشان الالعاب ؟ بشرفى لو حققت اطار واحد زياده - مش هتصدق لو قولتلك ان معالجات انتل ذكيه جدا وقريبه من اختناق نفسها اكتر مما تتخيل لانها عنيده فى توفير الطاقه


اما كارت الشاشه - انت لو فكرت تعلى الفولتيه عشان تعمل كسر عالى مش ممكن تتخيل ايه النتيجه
بسهوله ممكن توصل للكارت اللى فوقه علطول ( 7870 )

استخدام الفولتيات العاليه نظريا بتساعد على تقليل عمر الهاردوير ولكن لو كانت درجه حراره الهاردوير مع المشتتات الاحترافيه اقل حتى من الفولتيات المصنعيه
على المشتتات المصنعيه - اذن مستحيل يكون كسر السرعه خطير او يقلل من العمر

انت بتعمل اللى الشركه سابتهولك عشان تعمله انت فقط لانهم عارفين جدا انك هتوصل للمرحله دى والجميع بقى هاوى
بس
لكن لو الفولتيات الجديده اللى هتضبطها بدات تاثر والمشتت بتاعك ضعيف فى التبريد وطول وقت شغلك المعالج فوق 80C
فممكن والله اعلم ( خصوصا مع الهاردوير الحديث ) يقرب عمره
عموما الكلام فى المواضيع دى كلها نظريا

بعض الخبراء قالوا مفيش حاجه اسمها اقصى حراره :)
يعنى ايه اقصى حراره ؟ مفيش حاجه فعلا اسمها اقصى حراره لان المعالجات مش مواتير سيارات شغاله بطاقه الحركه وانما قنوات وامكانيات من السليكون ممتلئه بالبيانات
صعب جدا تعرف امتى اقصى حراره ليها حتى لو كانت 100C


عموما هما بيقولولنا 105C اخر المعالجات دى وبعدها هتعمل اعاده تهيئه لنفسها فورا او هتتفخم واكيد الحاله الاولى هى الافضل
بس مفيش داعى للقلق خصوصا مع كارت الشاشه لانك اساسا معطيتلوش فولتيه زياده وبالتالى مراوحه شغاله بنفس طبيعتها
كل الحكايه هتبقى زياده كفيفه جدا فى الجهد وبالمقابل درجه او اتنين فى متوسط الحراره

لكن مع بدا استخدام الفولتيات فليها احتياطات كتيره جدا وقلق من كل شىء لحد الباور سبلاى وكابلاته

[ahmad2006771]

شكرا جزيلا لمشرفنا الغالي - انت اضفت معلومات مهمة وكانت مجهولة بالنسبالي - لأن أنا طول عمري بصراحة بخاف أكسر سرعة معالج او كارت شاشة ومحاولتش اعمل الموضوع ده خالص

[phenomenon]

الشكر لله - مش تقلق من كسر السرعه طالما الامكانيات مساعداك وخصوصا الباور واللوحه ( معالج مركزى )
اما كارت الشاشه لو مغيرتش فى الفولتيات ( يبقى الباور اللى مشغله هو المناسب ليه ) لو غيرت فى الفولتيات ( يبقى لازم الدقه فى الامر )
انا متذكر ان موقع KITGURU حرق باورين EVGA SuperNOVA من اربعه وقت محاولته لكسر سرعه اربعه كروت TITAN-X مع التغيير فى فولتياتهم

المشكله ان التلاعب فى الفولتيه لكارت الشاشه خطير جدا لان اساسا هى على فولتياتها فى برامج الاختبارات بتوصل 85C بطبيعه الحال واحيانا اعلى مع معالجات High-END
بالشكل ده لو انت حطيتلها فولت كمان هتروح بعد كده فين ؟ الا لو مركبلها بلوك مائى او كارت زى FURY-X او Gigabyte 980TI Xtreme
دول مسموح انت تعلى الفولتيات معاهم لان تبريدهم مائى وتعليه الفولت امنه ليهم طالما فى حدود الحراره المقبوله
لذلك عموما انا بنصح دايما بعدم زياده الفولتيه لكارت الشاشه عشان خاطر برامج التعذيب الصعبه Furmark + Kompustor + 3DMARK وهكذا