Gigabyte-GTX 960 vs Gigabyte GTX 960 Gaming1

[محمد السنهوري]

يا جماعه بعد أذنكو انا نويت اجيب gtx 960 4g
فالقيت نسختين العاديه وال g1
فايه الفرق بينهم لو الفرق التبريد انا هجيب مروحتين للكيسه يعني التبريد مش مشكله اوي بالنسبالي ولا اي رايكم وشكراا

[Sir Ahmed]

لا هم نفس التبريد ...النسخة g1 ترددها مكسور مصنعيا و اعلي من النسخة العادية ومروحة زيادة فقط .. ....وانتظر اراء باقي الاعضاء

أرسلت من G-TiDE E76 بإستخدام تاباتلك

[phenomenon]

اقرا القوانين اخى الكريم واختار عناوين واضحه
العاديه بتستهلك باور اعلى وقت الضغط فى برامج المراجعات والالعاب العاليه
درجات الحراره مساويه فى كلاهما والاداء واحد فى كلاهما ,وهتلاقى مراجعه للنسختين على موقع Tecgoiwerup فى جميع الالعاب الحديثه
تم تعديل عنوان الموضوع الى الفرق بين Gigabyte-GTX 960 vs Gigabyte GTX 960 Gaming1

[محمد السنهوري]

اقرا القوانين اخى الكريم واختار عناوين واضحه
العاديه بتستهلك باور اعلى وقت الضغط فى برامج المراجعات والالعاب العاليه
درجات الحراره مساويه فى كلاهما والاداء واحد فى كلاهما ,وهتلاقى مراجعه للنسختين على موقع Tecgoiwerup فى جميع الالعاب الحديثه
تم تعديل عنوان الموضوع الى الفرق بين Gigabyte-GTX 960 vs Gigabyte GTX 960 Gaming1
العنوان الجديد افضل فعلا واسف علي الخطاء الغير مقصود وشكرا علي ردك بس ايه رايك اجيب ايه فيهم مع العلم ان الفرق مش كبير بينهم وهل ال g1 ijهتكون محتاجه كسر سرعه لا ني مش بفضل كسر السرعه في اي شئ الا لو كان الشركه كسر سرعتها مقدما وشكرا جدل ليك

[phenomenon]

كل نسخه بتعطيلك تلاته بروفايل
بروفايل اساسى Base Clock وده التردد اللى المعالج بيثبت عليه عشان يحافظ على درجات حرارته ويقنن من استخدامه للطاقه
بروفايل Boost Clock وده عشان خاطر يغزى نفسه بالفولتيه الاعلى اوتو ويعلى التردد وتحصل على عدد اطارات اكبر داخل الالعاب
بروفايل OClock وده عشان تحاول تثبت تردده على اقصى تردد بيقدر الكارت يوصله مصنعيا بدون تدخل منك
لكن نظريا لو الكارت وجد حرارته مرتفعه هيتجاهل البروفايل بتاعه ويقلل نفسه على بروفايل Boost او base الى ان يشعر بهدوء حرارته ثم يرفع نفسه مره تانيه
واحيانا بيقلل نفسه لاسباب تانيه عشان يوفر من الطاقه لما بيلاقى ان مفيش داعى للتردد العالى

نسخه G1 ترددها الاساسى هو 1241MHz وتردد Boost بيبدا عند 1266MHz الى 1304MHz حسب رؤيته وبروفايل OC تردده بيوصل عند 1329MHz
ولكن داخل الالعاب ربما تلاحظ نتائج اعلى فى الترددات حسب حاله الالعاب والكارت

اعتقد انك تقصد نسخه OC صاحب مروحه واحده صح كده ولا هل تقصد نسخه بمروحتين ؟
عموما نسخه OC بمروحه واحده ترددها الاساسى هو 1165MHz وتردد Boost بيبدا عند 1228MHz الى 1190MHz حسب رؤيته وبروفايل OC تردده بيوصل عند 1253MHz
طبعا اذا لم تقم بختيار بروفايل من برنامج جيجابايت OC GURU قربما الكروت بتوصل لاقصى ترددادها اوتو بدون تدخل منم فى شىء
وغالبا بتكون حسب الحاله المثاليه اللى المعالج شايف انه مفروض يمشى عليها ( تردد - حراره - طاقه - تطبيق العمل او اللعبه )


لو الباور معاك كافى مفيش داعى للقلق من كسر السرعه لانه سهل وايجابى ولكن مش شرط تنفيذه بمجرد شراء الكارت
نسخه OC بتيجى بدون Backplate بخلاف نسخه Gaming G1 ولكن امر الغطاء الخلفى مش مهم خصوصا مع المعماريات الحديثه
رايى انك تحط فلوسك فى مكانها الصح
GTX 960 4GB فى المراجعات شكله مش مؤثر
فى مراجعات ظهرت انه احيانا بيزيد 6 اطارات وده عدد كويس ومقبول واحيانا ممكن نلاقيه 5% وممكن نقول انت اولى بيهم
لكن انت ممكن بكسر سرعه الكارت تحصلهم حتى لو كانت النسخه 2GB
بعض المراجعات بتظهره احيانا ازيد او اقل لكن غالبا ممكن نقول " 4GB " ليست مقياس صريح لتفضيله على نسخه 2GB
ولكن اذا كان قدامك نسخه 4GB كنسخه OC جايه بسعر نسخه G1 الــ 2GB يبقى اكيد هات النسخه الاولى ولا داعى للنظر فى امر التردد او الكماليات

[محمد السنهوري]

اولا ردك أبهرني بصراحه شكرا ليك عليه ....
ثانيا انا انشاء الله ناوي عل النسخه g1 4g فعلا والباور بفكر في سيسونك في حدو 600 او 620 اي راي حضرتك والمزر بور كلمت حضرتك عليها في موضوع سابق هجيب Gigabyte GA-B85-HD3 Socket 1150 لاني بحب الجيجا بايت جدا وكمان فيها كارت صوت قوي لاكن معرفش تدعم الهاردات ssd ولا لا لاني هشتري واحد أنشاء الله وبردو مش عارف كارت اللان كويس ولا لا ارجو حضرتك تنورني في الوضوع ده وشكرا علي رد حضرتك وسؤال اخير كسر السرعه المصنعي دا مش بيحتاج اي تدخل مني صح وهل لو الكارت مكسور مصنعي يحتاج كسر اخر مني ولا لا وهل النسخه دي g1 4gمكسور مصنعيا ولا انا هكسرها

[phenomenon]

الشكر لله
" ان شاء الله " مبروك مقدما ومفيش مانع من اختيار اللوحه الام اللى ترتاح ليها
اللوحه بتدعم جميع هاردات SSDs الموجوده ولكن فى نوع حديث من هاردات ال SSDs وهو SSD PCIe ودا بيحتاج سوكيت M2 مش موجود غير فى لوحات H97 + Z-Series + X99
الهاردات دى منزلتش مصر غير نسخه واحده وسعرها 2000 جنيه ونظام عملها بروتوكولات قديمه SSD SATAIII مفيهوش اى ميزه حقيقيه لكنه مازال افضل
لكن اذا حبيت تشترى هارد صلب زى Samsung EVO + Corsair + Kingstone مفيش مانع لان كلهم شغالين بسرعات SATA6GBps طبيعى بنفس سرعه مخارج اللوحه الام
اللوحه المذكوره ممكن تدعملك لغايت 4 هاردات SSD
واكيد فيها عدد SATA3GBps والحقيقه مفيش فرق كبير حتى لو كان الهارد نفسه 6GBps على سوكيت 3GBps لكن لتحصيل اقصى سرعاته يفضل سوكيت SATAIII

التلات بروفايلات اللى تم ذكرهم هتلاقيهم مسموحين فى سوفت وير الكارت اللى بيكون موجود على CD الكارت او ممكن تحمله اونلاين من موقع الكارت
تفتح السوفت وير بعد تثبيته زى اى برنامج اسمه OC GURU تقريبا وهتلاقى قدامك التلات بروفايلات
اختار بروفايل BASE لو انت على سطح المكتب واختار بروفايل Gaming او ممكن يكون باسم Boost وانت داخل تلعب او ممكن تختار بروفايل OC
لحد دلوقتى انت مكسرتش سرعه الكارت
كل البروفايلات السابقه ضمن خصائص الهاردوير نفسه وضبطه المصنعى
اذا لم تقم باختيار اى بروفايل مفيش مشكله لان الكارت هيشوف ايه المطلوب من نفسه وينفزه حسب رؤيته

شوف يا اخ محمد
تردد الكارت الاساسى ولنفترض انك لقيته فى برنامج GPUz تقييمه 1241MHz ولقيت اقصى اليمين تردد BOOST تقييمه 1304MHz
اذن اول ماهتفتح اللعبه غالبا هتلاقى التردد قصادك اما ده او ده او بينهم او ربما اعلى قليلا من 1304MHz يوصل عند 1329MHz فى الجيم بلاى التقيل

اذا فكرت تكسر سرعته ولنفترض انك نويت زياده تردد النواه 50MHz
اذن هتضيف 50MHz على تردد النواه وبكده هتلاقى برنامج GPUz قراه تردد النواه الجديد اصبح 1291MHz بدلا من 1241MHz
بالشكل ده هتلاقيه بردو قرا تردد اعلى لل Boost وليكن 1354MHz

الميزه فى خاصيه Turbo Boost 2.0 الموجوده بمعماريات انفيديا الحديثه الان
انك ممكن تلاقى تردد النواه داخل اللعبه بيوصل لاعلى من كل هذه الارقام وبيقفز فوق 1400MHz طالما شايف ان درجه الحراره واستهلاك الطاقه فى رنج معتدل
لكن اول ما يلاقى نفسه قرب وليكن من 78C واستهلاك الطاقه اصبح عالى بيبدا يخنق نفسه تدريجى اوتوماتيك ويقل وليكن عند 1291MHz او حسب ما هو شايف
لكن ادنى حاله هيكون ثابت عند 1291MHz ودى هتكون نادره جدا واحتمال فى المستقبل او مع فترات الصيف القاسيه
دائما مع المعماريات الحديثه مهما كان الكارت بتاعك من اى شركه او اى موديل خليك فى رنج 75C ولا تقفز عند 80C
هتلاقى صوت المراوح بقى مزعج جدا وكمان الكارت بيبدا يخنق نفسه عند مراحل الحراره دى فمفيش داعى اسيبه يوصل ليها

رقم 1 - تاكد انك بتفعل خاصيه V-Sync من قوائم جرافيك اللعبه
رقم 2- اذا لاحظت ارتفاع حرارته عند 80C ابدا قلل من خصائص الجرافيك ولو هتتحمل الصوت على بروفايل سرعات المراوح
ملحوظه رقم 2 مش موجهه ليك تحديدا لان المعماريه الجديده بارده فى شغلها لدرجه انك هتلاقى الكارت بيفصل مراوحه تماما فى الخمول

[totyyyd]

النسخة g1 ترددها مكسور مصنعيا و اعلي من النسخة العادية ومروحة زيادة فقط