ارجو المساعدة فى اختيار البوردة والبروسسور

[ahmedali2255]

يا جماعه بعد اذن حضراتكم
عاوز اعرف هل بودة gigabyte h61 تتوافق مع كارت الشاشه nuvdia geforce gtx 750 ti ؟؟

وازاى اعرف ان البوردة تتوافق مع كارت الشاشه
وايه البروسسور اللى يشغل كارت الشاشه دة باعلى كفاءة للالعاب مع العلم انى مش عارف اسس اختيار البروسسور
ويا ريت توضخوا يعنى ايه جيل تالت او رابع ويعنى ايه الكاش و السرعه بتاعه المعالج ويفرقوا ايه فى الالعاب
يعنى لو هشترى بروسسور core i5 يبقى مواصفاته ايه
ارجو الرد ولكم جزيل الشكر

[phenomenon]

اساس اختيار البروسيسور هو سوكيت اللوحه الام اولا وثانيا مجموعة المعالجات المدعومه في صفحة اللوحه الام
جميع معالجات انتل الجيل الثاني والثالث مدعومه لغالبية لوحات H61 Chipset

اي لوحه ام متوافقه مع اي كارت شاشه طالما اللوحه الام تحتوي على منفذ PCI Ex[ress X16 وهو منفذ اساسي في جميع اللوحات الموجهه للاجهزة المكتبيه

اي طراز من I3-2XXX أو I3-3XXX هيكون كافي للبطاقه الرسوميه GTX 750Ti ولكن احتمال تلاقيهم في سعر المستعمل

ما هي مواصفات جهازك الحاليه بالضبط والميزانيه المتوفره معاك ؟

[ahmedali2255]

انا هجيب الجهاز للالعاب فى المقام الاول
انا كنت هشترى جهاز اوريجينال استعمال خارج واشترى الكارت جديد
ومعايا حوالى 3500 جنيه مع العلم ان الكارت جديد ب1400ج
هجيبه بروسسور core i5 فياريت تقولى ايه الفرق فى رقم الجيل والكاش ميمورى واجيهم كام للالعاب العاليه
يا ريت توضحلى اكتر بالنسبه للبروسسور علشان البائعين بيستغلوا جهل المشترى
وشكرا جزيلا لحضرتك

[phenomenon]

حاول تنتظر عروض أفضل لان بطاقة GTX 750Ti سعرها ارتفع جدا مقابل ادائها فمن الافضل شرائها مستعمل في رنج 1000 جنبيه على اقصى تقدير

هتشتري معالج I5 مستعمل يبقى اكيد هيكون في من الجيل الثاني او الثالث وجميعهم متوافقين على اللوحات الام Socket 1155
الجيل الثاني من معالجات I5 بيكون الرقم الرباعي فيه على شكل I5-2XXX والجيل الثالث على شكل I5-3XXX
من الافضل ان اختيارك يكون من داخل معالجات الجيل الثالث لانها الاحدث ومتواجده بشكل اكبر

حجم الكاش في جميع معالجات I5-3XXX بيكون 6mb Smart Cashe
الفرق الوحيد بين جميع طرازات معالجات Core I5-3XXX هو تردد سرعة النواه فقط وجميعها بتكون فروق طفيفه وجميعهم في رنج ادااء واحد جيد جدا

[ahmedali2255]

طيب هل فيه كارت شاشه اقوى من gtx 750 ti فى نفس السعر اشتريه بداله ؟؟
وبالنسبه للبروسسسور core i5 هل يوجد منه جيل رابع ؟؟
وكنت عايز اشترى شاشه lcd بحيث انها تشغل الالعاب العاليه على جرافيكس كويس ممكن تقترح عليا شاشه واسعارها بردو

[phenomenon]

ممكن تلاقي بعض الكروت في نفس الرنج وتكون اداء أفضل GTX 670 / HD 7950 / R9 270 / GTX 950
هي متوقفه على العروض المتاحه وسعر البائع وحالة السلعه لكن عموما جميعهم افضل في الاداء من GTX 750TI ولكن استهلاك الطاقه ليهم يتطلب على الاقل باور أصلي خامه جيده 500W

في حالة شراء معالج I5-4XXX الجيل الرابع مستعمل وبالنظر الى اسعار السوق حاليا هيضرب الميزانيه منك تماما وممكن سعره يوصل الى 1500 جنبيه لانه اصبح جديد في رنج 2000 جنبيه وكسور
خليك في منصات الجيل الثالث فهي قريبه جدا من الاداء " تقريباً نفس الاداء اذا تحدثنا عن معالج مثل I5-3470 / I5-3550 / I5-3570 ولكن سعرهم اهدى قليلا وهتكون اللوحه الام سعرها اهدى

خليك في شاشه 18.5inch أو 20inch بحد أقصى من سامسونج او BenQ او حسب العروض المتاحه امامك
ممكن تشوف شاشات استيراد فرز اول بدون عيوب ممكن تقدر توفر فيها نصف التمن او ازيد من سعرها جديد

لو عاوز انواع جديده هتوصل سعرها حاليا 750 على اقل تقدير براي شوف شاشه LCD فرز اول ولو هتكون اعلى 50 جنبيه من باقي الشاشات المتواجده معاها مفيش مشكله لكن هتكون حالتها كويسه

[yhya prince]

اي طراز من I3-2XXX أو I3-3XXX هيكون كافي للبطاقه الرسوميه GTX 750Ti ولكن احتمال تلاقيهم في سعر المستعمل

اختلف معاك في الرأي، ده جهاز صاحبي معاه معالج i3 2100 وكرت شاشة GTX 750 Ti وعنده Bottleneck جامد في GTA V:

https://i.imgur.com/rS51hQw.jpg

لاحظ إستهلاك كرت الشاشة 49% بس وإستهلاك المعالج من 97% لـ 99% والحرارة في حدود الـ 65 ~ 70.

والـ FPS المتوسط 50 وبيعمل drop لـ 40!

وديه مواصفات الجهاز للتأكيد:

https://i.imgur.com/PxgUb4j.png

https://i.imgur.com/mE10yeg.png

[Hany Eid]

https://uploads.tapatalk-cdn.com/20160826/a6f6dce5684940ca58527bc757482ff5.jpg
شوف الجهاز دة ومواصفاته بدقة وكمان عندهم دسك توب فيه بوردة Q65 او H61 ومعالج i5 تقريبا ب 1400 وعندهم جهاز برضة بمعالج بانتيوم لو هاتجيب انت معالج i5 من برة ب 700وممكن تشتري كيسة تاور فاضية تنقل فيها علشان الدسك توب مش عملي
وبيبيعو بوردة لينوفو H61 اورجنال مع معالج i5 , بانتيوم لو هاتكمل انت باقي الهاردوير براحتك

[phenomenon]

اختلف معاك في الرأي، ده جهاز صاحبي معاه معالج i3 2100 وكرت شاشة GTX 750 Ti وعنده Bottleneck جامد في GTA V:
لاحظ إستهلاك كرت الشاشة 49% بس وإستهلاك المعالج من 97% لـ 99% والحرارة في حدود الـ 65 ~ 70.
والـ FPS المتوسط 50 وبيعمل drop لـ 40!
وديه مواصفات الجهاز للتأكيد:



الحقيقه أنا لا أختلف معك في الراي - والدليل أقرأ مشاركتي القادمه وهي من الموضوع الأتى :- https://arabhardware.net/forum/showthread.php?t=450308

https://i.imgur.com/SnUOdiX.jpg

وليست فقط الصوره بل بعدة مواضيع كثيره ذكرنا سابقاً وجميعنا نعلم أن أغلب ألعاب العالم المفتوح والعاب تحديد المصائر RPG أو ألعاب RTS التخطيط الحربي
كثيراً ما تعتمد على أداء المعالجه المركزيه وقوة نواة المعالجه المركزيه وحينها يجب الاعتماد على المعالجات المركزيه القويه ومتعددة المصادر أو الحديثه

الامر برمته يقتصر على عدة مبادىء عند ترشيح مكونات الهاردوير وسأذكر لك بعض منها

1- ترشيح قطع الهاردوير يجب ان يكون على أساس الميزانيه الموجوده أمامنا , فذا لاحظنا ميزانيه مفتوحه أو ضخمه حينها ننصح بشراء معالجات I7-SKUs حيث
انها تعتبر افضل المعالجات المركزيه الموجهه للألعاب والميزانيات المفتوحه والبطاقات الرسوميه القويه , وفي نفس الوقت نعمل على ترشيح معالجات I5-SKUs
حيث نتائجها القريبه جداً في أغلب الحالات مع أقوى البطاقات الرسوميه وأغلب الالعاب التي تعتمد على أداء المعالجه المركزيه المُكثفه . ولكن حين وجود ميزانيه
محدوده أمامنا فنبدأ بالتضحيه قليلاً " أم هل يوجد خل أخر أمامنا ؟ "
ولكن في حالة النظر للاجهزه المستعمله نبدأ في النظر لمعالجات I5-SKUs وهو ما كان بردي في مشاركه رقم 6 وحينها ستلاحظ اننا تناسينا تماما مبدأ I3-SKUs
طالما تأكدنا من ميول صاحب الموضوع وتفكيره في الشراء مستعمل " هل تري انني حاولت تغيير فكرته او اقناعه مره ثانيه بمعالج I3 ؟ " بالتأكيد لا لاننا نعرف يقين
المعرفه ان معالج I3 هو معالج متوسط الاداء

2- عنق الزجاجه يظهر بوضوح مع صديقك وهذا بسبب إختياره مجموعه من الأعدادات الرسوميه الثقيله وبالتأكيد أبعاد الشاشه ليست قليله او ضعيفه
وهنا , وفي حالة تشغيل الالعاب التي تعتمد على المعالجه المركزيه , تبدأ باتأكيد في ملاحظة عنق الزجاجه واختناق المعالج المركزي بسبب طلب البطاقه
الرسوميه ما لا طاقه له به ويظهر تأخير واضح للمعالج المركزي وهبوط في الاداء وخمول في اداء البطاقه الرسوميه وفي هذه الحاله ننصح بتقليل
إعدادات الرسوميات باللعبه نفسها لتحقيق نتائج أعلى في مستويات الأداء على حساب الجوده ودقة وضوح الأبعاد الأعلى ونقاء الصور

3- معالج I3-3XXX مُعالج متوسط الأداء - " بالرغم ان الجيل الرابع والسادس من أصحاب التردد العالي ذو أداء أفضل " - ولذلك ننصح بترشيحه للميزانيات
المتوسطه والبطاقات الرسوميه المتوسطه ولكن أحيانا نُجازف قليلا بسبب إعتماد كثير من الالعاب على أداء المعالجه الرسوميه وتحقيق نتائج جيده
في حالة إعتماد أعدادات defaults من قائمه إعدادات Video Settings + Advanced Settings وبهذا الشكل قد تكون مُعضم الحالات في رنج ضبط افتراضي
متوسط ألى اقل احيانا او اعلى قليلا أحياناً ومثال على ذلك ألعاب مثل Metro + Crysis وغيرهم ولكن حتى الالعاب التي تعتمد على اداء البطاقه الرسوميه
حين زيادتها الى مستويات متقدمه من جودة الرسوم تبدأ حينها في الضغط على مواصفات البطاقه الرسوميه وهو الأمر الذي يتطلب جهد أكبر من المعالج
المركزي وحينها يقع ايضا المعالج المتوسط في الاداء من عنق الزجاجه

في نهاية الامر اريد ان اوضح لك اختيار معالج متوسط الاداء مع بطاقه رسوميه متوسط الاداء له اسباب وهي محاولة توازن المنصه
نعم وباتأكيد ربما هناك نسبه من عنق الزجاجه المتوقعه مع بعض الالعاب ولكن حينها علينا التضحيه فيمكن ان نقول ان اختيار معالج I3 تكون
عواقبه الجيده الى عواقبه السلبيه بنتيجه 3 الى واحد ولذلك ننصح الميزانيات المتوسطه بامتلاكه
ولكن في ظل وجود فرصه لشراء الاقوى حتى وان كان مستعمل وهناك ميول لدي صاحب المشوره فلما لا
هل وصلتك الفكره ؟

GTA V = CPU Intensive Tasks
حاول تقليل بعض الاعدادات من قائمة اللعبه ربما تحصل على اداء اسرع وتاكد من تفعيل V-Sync لتثبيت مستوى الاطار عند 60 اطار
فاذا استطعت الوصول الى 60 اطار على الاعدادات الجرافيكيه المناسبه " المناسبه " ابدا حينها النظر في منسوب او مستوى الضغط على البطاقه الرسوميه
فبالرغم من تقليل اعدادات الجرافيك والجوده الا ان البطاقه ذاتها ستسترفع مستوى تحميلها Loading بسبب عدم انتظارها وخمولها نتيجة تأخير المعالج المركزي
وحينها تقدر وقتها تحدد بالضبط الاعدادات المناسبه التي تناسب منصتك لهذه اللعبه

[khaled moh]

طيب هل فيه كارت شاشه اقوى من gtx 750 ti فى نفس السعر اشتريه بداله ؟؟
وبالنسبه للبروسسسور core i5 هل يوجد منه جيل رابع ؟؟
وكنت عايز اشترى شاشه lcd بحيث انها تشغل الالعاب العاليه على جرافيكس كويس ممكن تقترح عليا شاشه واسعارها بردو

الميزانيه دى حضرتك عشان تجيب جهاز يشغل الالعاب ويبقى قوى هتضطر تجيب مستعمل لانك شايف اسعار الجديد بقت عامله ازاىى اقل تجميعه i5 بتكون فى حدود 5500

فى عرض عجبنى لجهاز استيراد 8200 hp مع انى كنت بفضل التجميع لكن دا الصراحه مناسب جدا للميزانيه وكمان تقدر تطوره فى المستقبل بسهولة مش هتغير فى حجات كتير
الجهاز نوعه hp
core i5 -second generation
ram 4gb ddr3
hdd:250

--------------------------------------
انت كنت سالت عن اجيال i5 فى منهم
جيل تانى 2000
جيل تالت 3000
جيل رابع وخامس وسادس المهم ان الفروق بين التانى والسادس انت مش هتحس بي اصلا عشان كدا مش ضرورى تكلف نفسك بالجديد
المطلوب دبوقتى فى التجميعه الى فوق دى انك هتجيب كرت شاشة خارجى مثلا nvidia 750ti
,وباقى المواصفات تمام هتقبل معاك فى التحديث بعد كدا للمستقبل لحد معالج i7 ورام 32 جيجا
سعره 1900 جنيه ودى اكتر لفتت نظرى ليه بدون كرت الشاشة طبعا

جهاز HP 8200 تاااور
اخر جهاز خالص متبصش على اجهزة ال workstation دى خالص
https://arabhardware.net/forum/showthread.php?t=449093

[Hany Eid]

أخر اتنين كويسين جدا وانا نشرتله واحد فوق
الأجهزة دي تستحق تفكر فيها نظراً لميزانيتك وأمكانية التحديث وكمان توفر فلوسك علشان تشتري كارت شاشة محترم

أرسلت من Infinix X509 بإستخدام تاباتلك

[ahmedali2255]

طيب يا جماعه لو اشتريت جهاز اوريجينال زى hp 8200 هقدر اغيرله الباور سبلاى لان كارت gtx 750 ti محتاج على الاقل 450watt
وايه سعر الباور سبلاى المناسب ؟؟

[Hany Eid]

اتصل الأول وشوف مواصفات الجهاز وانتا هاتعرف انت محتاج ايه
مش يمكن تلاقي الباور 500 وات
انا بصراحة ماشفتش الجهاز ده غير من كذا اعلان لكن تفاصيل ماعرفش
انت كدا قدامك جهاز " كامل" جيل تاني بمعالج i5 بسعر مستحيل تجمع بيه جهاز جديد
شوف مواصفاته وهاتستفاد بأيه منه وتغير ايه واحسب التكلفة قصاد النتيجة النهائية وساعتها هاتلاقي نفسك بتاخد قرارك بدون أي مساعدة

أرسلت من Infinix X509 بإستخدام تاباتلك

[محمد السنهوري]

طيب يا جماعه لو اشتريت جهاز اوريجينال زى hp 8200 هقدر اغيرله الباور سبلاى لان كارت gtx 750 ti محتاج على الاقل 450watt
وايه سعر الباور سبلاى المناسب ؟؟

ينفع جدا لاكن يجب التأكد من الكابلات الخاصه بالجديد هل تتوافق مثل القديم لان بعض الباورات الخاصه بهذه الكيسات تختلف في الكابلات

وأفضل باور سيسونك

[khaled moh]

إيه الكلام ده؟؟!!!
الفرق بين الثانى والسادس .. مش حتحس بيه أصلا!!!!
ليه
هو حضرتك شوفت الجيل السادس آداءه عامل إزاى عشان تقول كلمة زى ديه..

حضرتك انا من فترة كنت بلعب gta v على اعلى اعدادات فى احد مراكز الالعاب على معالج i3-2100 وانت تعلم انه معالج قديم جدا يعتبر فى الوقت الحالي كان الـ usage فيه حوالى 70%

يعنى فى الالعاب مش هتحتاج اكتر من كدا اما فرق الاداء لصالح الجيل الجديد فى برامج الريندر المعتمدة على المعالج زى c4d دا البرنامج الى انا جربته بنفسى

فحتى لو كان جيل افضل زى ما حضرتك بتقول انا ليه اشتريه طالما الجيل الحالى يقوم بالمطلوب على اكمل وجه؟

[محمد السنهوري]

إيه الكلام ده؟؟!!!
الفرق بين الثانى والسادس .. مش حتحس بيه أصلا!!!!
ليه
هو حضرتك شوفت الجيل السادس آداءه عامل إزاى عشان تقول كلمة زى ديه..

كلامك مظبوط فعلا لاكن أظنه فقط خطاء أو سهو

[محمد السنهوري]

حضرتك انا من فترة كنت بلعب gta v على اعلى اعدادات فى احد مراكز الالعاب على معالج i3-2100 وانت تعلم انه معالج قديم جدا يعتبر فى الوقت الحالي كان الـ usage فيه حوالى 70%

يعنى فى الالعاب مش هتحتاج اكتر من كدا اما فرق الاداء لصالح الجيل الجديد فى برامج الريندر المعتمدة على المعالج زى c4d دا البرنامج الى انا جربته بنفسى

فحتى لو كان جيل افضل زى ما حضرتك بتقول انا ليه اشتريه طالما الجيل الحالى يقوم بالمطلوب على اكمل وجه؟

لا أخي خالد الفرق كبير جدا بينهم فنحن ننصح دائما في المنتدي بأن الجيل السادس الافضل ا الترقيه ليه لأصحاب الاجيال القديمه بالطبع في حالت توافر ميزانيه تساعد أو الحاجه للترقيه
أنظر للمقارنه

https://arabhardware.net/forum/attachment.php?attachmentid=33971&d=1472406889
33971

[ahmedali2255]

طيب يا جماعه انا دلوقتى قدامى جهازين اوريجينال واحد core i5 جيل تالت كاش 6 والتانى workstation بمعالج xenon كاش 8 والاتنين تقريبا فى حدود 2000 جنيه
اشترى انهى جهاز مع العلم انى هركب للجهاز كارت gtx 750 ti والجهاز الغرض الاساسى منه تشغيل الالعاب التقيله ..... علشان فيه ناس بتقول ان xenon اعلى من الcore i7 وانه طالما جبتله كارت شاشه قوى هيشتغل بكفاءة عاليه وفيه ناس بتقولى ان الxenon مش للالعاب وان core i5 افضل منه . .
ارجو الرد من حضراتكم

[khaled moh]

لا أخي خالد الفرق كبير جدا بينهم فنحن ننصح دائما في المنتدي بأن الجيل السادس الافضل ا الترقيه ليه لأصحاب الاجيال القديمه بالطبع في حالت توافر ميزانيه تساعد أو الحاجه للترقيه
أنظر للمقارنه

https://arabhardware.net/forum/attachment.php?attachmentid=33971&d=1472406889
33971

شكرا على التوضيح
انا اعتمدت فى المقارنة على هذه المواصفات .... مارايك ؟

https://store2.up-00.com/2016-08/1472438355191.png (https://www.up-00.com/)

[khaled moh]

طيب يا جماعه انا دلوقتى قدامى جهازين اوريجينال واحد core i5 جيل تالت كاش 6 والتانى workstation بمعالج xenon كاش 8 والاتنين تقريبا فى حدود 2000 جنيه
اشترى انهى جهاز مع العلم انى هركب للجهاز كارت gtx 750 ti والجهاز الغرض الاساسى منه تشغيل الالعاب التقيله ..... علشان فيه ناس بتقول ان xenon اعلى من الcore i7 وانه طالما جبتله كارت شاشه قوى هيشتغل بكفاءة عاليه وفيه ناس بتقولى ان الxenon مش للالعاب وان core i5 افضل منه . .
ارجو الرد من حضراتكم

شوف مواصفات الاتنين وهتلاقى ان الجيل التانى تردده اعلى اختاره وهيكون اداءه معاك افضل من ال xenon ان شاء الله