مش فاهم حاجة من الدعم الفني

[Mr_D]

السلام عليكم
كل عام وانتم بخير

انا اشتركت مع تي داتا في ميجا بلس
المهم عدي 9 ايام زي ما قالولي
كلمته وجات هنا المشكله
كل لما اساله علي حاجة يرد نفس الاجابه تحس ان اللي اعد يكلمك
متبرمج علي الرد علي الاسئله محدوده فقط
وبيعد يعيد نفس الاجابه
انا الخط جديد و خليت الراجل يركب الاسلاك نحاس
وده نفس اللي بتقوله الشركه ان خطي بيستحمل السرعات العاليه
بس السرعه عندي ثبت علي 4 ميجا اسال الدعم الفني طب هتزيد
يقولي معرفش ويعيد جمله خطك يستحمل السرعات العاليه
و ان العرض بيشوف خطك بيستحمل قد ايه
اقوله ازاي سرعات عاليه و 4 ميجا والله يعيد الجمله
بالنص

هل في ايدي حاجة اعملها ؟
اصل 260 جنيه حرام يعني

[Yasser]

هى معروفه انها حسب خطك وم اللى سمعته عن خدمه العملا هناك مش باستغرب... الفكره انه لو مش فيه حل وده اخرهم خلاص يبقى انتا اولى بالفلوس اللى هاتضيع ....وخليك عارف ان عند لينك مثلا بدون عرض ال4 ميجا ب380 جنيه يعنى اغلى

[Mr_D]

اصل 2 ميجا من 4 ميجا مش كتير بس ضعف الفلوس والتانيه مش محدوده الواحد كان نفسه يجرب سرعات عاليه بجد
هي احلي حاجة في لينك انها بتعمل عروض ضعف السرعه كتير و كمان مفيهاش استخدام عادل ( عن تجربه للخطوط القديمه )

[Yasser]

انا حاليا لينك وفعلا( السياسه العادله لهم ) موجوده لكن موقفنها عن التنفيذ !

[Mr_D]

طب في حل في تي داتا ولا انقل السرعه 2 ميجا وهل هي مش محدوده فعلا ولا ده اي كلام ؟
في حاجة 4 ميجا في تي داتا ب 220 والصراحة مسكتر عليها

[محمد فاروق غازي]

عليكم السلام ورحمة الله وبركاته
وأنت بخير أخي الكريم
جرب الحل دا وإن شاء الله خير،
إتصل بـ 111 وأدخل على قسم أعطال التليفون الأرضي، متدخلش على أعطال الإنترنت خالص،
وبعدين أدخل على قسم الشكاوى ولما تكلم ممثل خدمة العملاء، قوله بإختصار شديد محتاج فني يجيلي عشان يظبطلي فراعات الخط لأن الإنترنت متأثر عندي وفيه مشكلة، هيسجلك الشكوى وخلال 48 ساعة عمل هيجيلك الفني إن شاء الله،
لما يجي ركز في نقطة واحدة إنه يغيرلك مكان الكيبل بتاع خط التليفون في منفذ تاني في البوكس اللي في الشارع، وافضل واقف معاه واتأكد إنه غير مكان الكيبل في منفذ آخر داخل البوكس، وإن الخط الأرضي والإنترنت شغالين تمام،
وخليه يقيسلك الثلاث فراعات الخاصة بخطك ( أظن المفترض يكون كل فرع 218 على ما أتذكر) ويتصل بالسنترال بغرفة التحكم ويسألهم عن قراءة فراعات خطك، ولازم تحسسه إنك فاهم عشان أغلب الفنيين أصلًا إما مش فاهمين أو مش بيشتغلوا بضمير،
وإن شاء الله بعد الخطوة دي السرعة ترفع معاك تدريجي خلال ساعات،
المشكلة دي كانت عند بن خالي وكانت سرعته ثابتة على 6 ميجا تقريبًا مع تشويش شديد في الخط الأرضي وتم الحل بعد تغير مكان الخط في البوكس وضبط الفراعات.

[Mr_D]

شكرا لك اخي سوف اجرب

[abdalhaliem]

السلام عليكم ورحمه الله وبركاته

ماذكره أخى محمدفاروق

يحدث فعلا

وبالنسبه لشركه لينك

عندها الأستخدام العادل

لكن كل الشركات بالخطوط المفتوحه

تراقب السرعات العاليه ( أكبر من 2 ميجا )

قم بتنفيذ مانصحك به الأخ محمد

وكل عام وأنتم بخير

[Mr_D]

انا حاليا لينك وفعلا( السياسه العادله لهم ) موجوده لكن موقفنها عن التنفيذ !


فعلا اخي كلامك صحيح سياسه الاستخدام العادل غير مفعله في لينك

[N3V3RMiND.2016]

اولا ارحب بجميع الاخوه الافاضل و رمضان مبارك عليكم جميعا

فقط اردت ان اوضح وجهة نظرى فى الكلام من خلال المناقشات هنا فى عدة نقاط:

شركة لينك لديها الاستخدام العادل و هو مفعل بالتأكيد ولكن طريقة استخدام الانترنت ذاتها قد تفرق معك فى الشعور بتطبيق الاستخدام العادل من عدمه (انا كنت مشترك لينك لأكثر من 8 سنوات)
بالنسبه لشركة TE-Data فطبعا لديهم الاستخدام العادل بالطبع و لكن الاختلاف فى الشركات فى طريقة تطبيق الاستخدام العادل فقط و لا يمكن لشركه ان لا تفعل الاستخدام العادل.

بالنسبه لتحمل الخط للسرعات العاليه كان فى ميزه حسب ما اتذكر كانت فى شركة لينك و هى انهم كانوا موفرين اداة اختبار للخط لديك لمعرفة اقصى سرعه يتحملها خطك قبل ان تشترك فى سرعات عاليه و تضيع اموالك هباء.
و الاداة كانت متوفره لمشتركينهم على موقعم الرسمى.

و لكن فى شركة TE-Data المفروض اصلا انت تسألهم قبل الاشتراك خطك يتحمل سرعات قد ايه. و العميل اللى كلمك كان عارف انت خطك يتحمل السرعات دى او لا و لكن مش بالضبط.
اخيرا فى نقطه لا يعرفها الكثيرين و هى ان TE-Data لما بتكتب فى اعلان عن عروض السرعات العاليه هاتلاقى مكتوب غالبا فى العروض "سرعات تصل الى كذا" و كلمة "تصل الى" معناها انك هايوصلك اقصى سرعه يتحملها خطك فقط! (طبعا فى حدود اشتراكك)
يعنى لو اشتركت فى سرعة 8 ميجا و خطك لا يتحمل الا 2 ميجا اذا هايجيلك 2 ميجا فقط و انت تدفع اشتراك 8 ميجا و لا يوجد اى شئ خطأ على الشركه!

اخيرا خدها كلمه منى عميل TE-Data ممنوع عليه انه يحددلك رقم للسرعه اللى يتحملها خطك بالضبط لكن فقط ممكن يقولك الجمله "خطك يتحمل سرعات عاليه" لكن هو عارف خطك يتحمل قد ايه لكن مش بالضبط
يعنى مثلا ممكن الجمله دى تكون معناها ان خطك يتحمل فى حدود بين 3 و 4 ميجا.

[abdalhaliem]

شركة لينك لديها الاستخدام العادل و هو مفعل بالتأكيد ولكن طريقة استخدام الانترنت ذاتها قد تفرق معك فى الشعور بتطبيق الاستخدام العادل من عدمه (انا كنت مشترك لينك لأكثر من 8 سنوات)
بالنسبه لشركة TE-Data فطبعا لديهم الاستخدام العادل بالطبع و لكن الاختلاف فى الشركات فى طريقة تطبيق الاستخدام العادل فقط و لا يمكن لشركه ان لا تفعل الاستخدام العادل.


أحسنت أخى الكريم

وللتوضيح أكثر

لاتوجد شركه بمصر

ليس بها الأستخدام العادل

وهذا قرار ملزم لجميع الشركات

ولكنهم يتهاونون بسرعات 1+ 2 ميجا

ويغضون الطرف عنها نسبياا

فوق تلك السرعات تراقب مراقبه مشدده

هذا عن تجارب عديده

لأنهم يعلمون أن السرعات العاليه أغلبها من أصحاب الوصلات

وكل عام وأنتم بخير