منافذ الساتا و الماذربورد

[casbarrrr]

السلام عليكم ورحمه الله بركاته

لو سمحتو انا عندي مشكله جننتني ارجو فك كربتي فيها لان الموضوع مضايقني جدا جدا

انا كنت مركب في الجهاز 3 هاردات هارد 320 ويسترن بلو قديم و ده عليه وندوز و هارد 1000 سيجيت بقاله سنه و هارد 500 ويسترن بلو قديم بردو من حوالي اسبوعين النور قطع و انا بنقل ملفات بعدها الهارد ال 500 ظهر عليه باد سيكتورز و و ويك سيكتورز حاولت اظبطه و اعمله ري رايت قعد حوالي اسبوع ف انا استعوضت ربنا فيه و كتير خيره المشكله ظهرت اني بعد كده و انا بنقل بيانات علي الهارد ال 1000 لقيته بطئ جدا مش بينقل اكتر من 3.5 ميجا في الثانيه مع انه كل البرامج بتقول انه مفيهوش اي مشكله سواء HD Tune او HD Sentinal او HDD Regenrator انا قولت يمكن الكهرباء عملت فيه مشكله بس لسه البرامج مش قارياها و هو عليه حاجات مهمه ف روحت اشتريت هارد سيجيت 1000 جديد اول لما ركبته اشتغل كويس و انا بنقل الحاجه عليه و بعمله تيست بعد لما نقل حوالي 70 جيجا لقيت النقل بطيئ جدا وقفت النقل و روحت عملت تيست لقيته بقي زي التاني بالظبط هما 3.5 ميجا في الثانيه قولت كده يبقي المشكله مش في الهاردات ممكن تكون المشكله في كابلات الساتا روحت غيرت كل كابلات الساتا لقيتهم زي ما هما بدلت اماكن الكابلات في بورتات الساتا في الماذربورد لقيتهم اشتغلو تمام و في التيست بيبقي ال Average 150 ميجا في الثانيه روحت اكمل نقل شويه و عملو زي الاول هما 3.5 ميجا في الثانيه غيرت البورتات تاني اشتغلو كويس شويه و بعدين رجعو 3.5 ميجا قولت يبقي المشكله في بورتات الساتا في الماذربورد فكيتها و روحت لمركز صيانه قولت للراجل المشكله الراجل قالي انا عملتلك لحام في منافذ الساتا و شوفته شغال فيها بمكواه اللحام مكملش دقيقتين و قالي خلاص رجعت ركبت الجهاز لقيت نفس المشكله ف انا دماغي لفت مبقيتش عارف ايه الموضوع.


شويه نقط مهمه :-

- انا البورده بتاعتي Gigabyte G41MT-S2P

- الهاردات اللي عايز اركبها في الجهاز ST1000DM010-2EP102 ده اللي لسه جايبه من يومين و ان ربنا اراد هيبقي الاساسي
ST1000DM003 ده هيبقي هارد تاني للتخزين و هارد بلو 320 بردو للتخزين

- هل ممكن يكون بسبب ان الهاردات ساتا 3 و الماذربورد ساتا 2 ؟ بس الهارد اللي بقاله سنه ده كان شغال زي الفل لحد قريب و قرأت ان الهارد بيدعم اي ماذربورد بس مش هيدي كل امكانياته بس هيبقي احسن من الهاردات الساتا 2 ال 5200 !!

- انا من ساعه لما جبت الماذربورد من حوالي 5 سنين معملتهاش اي حاجه بخصوص البايوس و لا تحديث و لا اي حاجه كنت مجرد مستخدم هل ده ممكن يبقي ليه علاقه ؟

- انا و انا باخد الماذربورد من الصيانه الراجل قالي نزل نسخه جديده قولتله لسه منزل و حتي التنزيل كان بطئ قالي ايه النسخه قولتله XP قالي لا نزل 7 هل ده ليه علاقه بالموضوع ما كل كل حاجه كانت شغاله زي الفل بنفس الوندوز !


- ده مثال من الهارد الرئيسي اللي انا موصله دلوقتي


https://www11.0zz0.com/2017/09/28/23/406725492.png

https://www11.0zz0.com/2017/09/28/23/556376122.png

https://www11.0zz0.com/2017/09/28/23/578467447.png

- و ده الماذربورد


https://www8.0zz0.com/2017/09/28/23/168184703.png

انا اسف جدا علي الاطاله بس الموضوع غريب و كمان ضيع فرحتي بالهارد الجديد فاكون شاكر جدا ليكو لو ساعدتوني لحل المشكله دي

[abdalhaliem]

الأخ الكريم

مبدئياا

هذا الفنى لم يفعل شىء

لأنه قام بالتأكيد على لحام منافذ الساتا بدون داعى

ونحن لانقوم بذلك ألا فى حاله عدم عمل المنافذ نهائياا

المنفذ طالما يعمل أذاا لحماته جيده وعلى مايرام

والمشكله التى تعانى منها لها علاقه بالبورده

وبالتحديد بدايره ال SOUTH BRIDGE

أو الجسر الجنوبى

https://allyouneedtoknowict.files.wordpress.com/2012/10/motherboard-bridges2.jpg


شريحه الجسر الجنوبي south bridge

( وهى غير موجوده بالبورد الحديثه )

وتقع في القسم الجنوبي من اللوحة الأم

وهي المسئولة عن وصل أجهزة الإدخال والإخراج مع بعضها البعض

ومن ثم وصلها بالمعالج والذاكرة العشوائية

كما أنها هي التي تحدد السرعة القصوى لنقل البيانات بين اللوحة الأم والقرص الصلب

أمامك حل من أثنان

أما أن تبحث عن فنى جيد يفحص لك جميع البفات التى تحيط بال south bridge

والتأكد من عدم أرتفاع درجه حراره

الجسر الجنوبى نفسه بصوره مفرطه مع أستمرار العمل
***************

أو تبحث عن بورده مستعمله وهو حل أسهل وأفضل من وجهه نظرى

نظراا لرخص ثمنها حالياا

وعدم ضمان رجوع البورده التى بها مشكله ألى سابق عهدها


بالتوفيق

تحياتى

[casbarrrr]

اولا بشكر حضرتك علي اهتمامك و ردك و ربنا يزيدك علم.

بالنسبه لل south bridge هل بيتغير ؟ و لا مفيش حل غير صيانته ؟

و بالنسبه للبورده المستعمله سعرها كام ؟ و هل حضرتك تقصد نفس نوع البورده ؟

[abdalhaliem]

أنظر أخى الكريم

كل شىء يتم أستبداله باللوحه الأم طالما توفر البديل الملائم

حتى سوكيت المعالج نفسه !!!

المشكله دائماا بأيجاد الفنى الماهر الموثوق به
**************


و بالنسبه للبورده المستعمله سعرها كام ؟ و هل حضرتك تقصد نفس نوع البورده
السعر بحدود 300 جنيه

وطبعاا أقصد أى بورده سوكيت LGA 775

وحاول أقتنائها ddr3 حتى تستفيد من راماتك الحاليه

وأخيراا برجاء مراعاه أقصى حجم للخط 3

بالتوفيق

تحياتى

[casbarrrr]

طيب بالنسبه للنوع ده من البورده هل قطع الغيار متوفره و لا صعب ان الاقي ؟ و سعر south bridge ده لو امكن تغييره هيبقي كام تقريبا ؟

طب لو هجيبها جديده لان انا مش بفضل اجيب اي حاجه مستعمله و عايز اجيب ماذربورد تتوافق مع كل حاجه في الجهاز عندي يعني التغيير هيبقي في الماذربورد بس حضرتك تنصحني باي ماذربورد و سعرها هيبقي كام ؟

انا عارف اني بزعج حضرتك باسئلتي الكتير بس معلش اعذرني لاني بحب الحاجه تبقي مستقره مش كل يوم يبقي فيها مشكله.

تحياتي لحضرتك

[abdalhaliem]

الأخ الكريم

لايوجد أى أزعاج

فقط أسأل ونحن نجيبك

بالعوده لموضوعنا

للأسف جميع اللوحات الأم ذات السوكيت 775

لايوجد منها جديد مطلقاا

لذلك لايوجد عندك أى خيارات لابد من أقتنائها مستعمله

والسعر كما أوضحنا أعلاه

سيكون بحدود 300 أو يزيد قليلاا

بالنسبه لشريحه g41

لأنها ddr 3

وممكن تجد أنواع أخرى كثيره لسوكيت 775

لكنها غالباا ستكون ddr2

لذا توفيراا للنفقات أبحث عن نوع بوردتك G41MT-S2P

( حتى توفر ثمن الرام فى حاله أقتنائك بورده ddr2 )

وبالنسبه لتصليح البورده القديمه تختلف من فنى لأخر كما ذكرنا أعلاه

أرجوا أن أكون قد أوضحت القصه كامله

بالتوفيق أخى الكريم

تحياتى

[casbarrrr]

حضرتك كده بالفعل وضحت كل حاجه بس فيه نقطه عايز اتاكد منها ، هل انا ملتزم بالسوكيت 775 عشان مغيرش البروسيسور و لو جبت ماذربورد بسوكيت مختلف يبقي لازم اجيب بروسيسور يتوافق مع السوكيت ده ؟ و لو الكلام زي ما انا فهمت كدا و قررت اجيب مازر حديثه تكون قريبه من اللي عندي و بروسيسور يتوافق معاها بردو قريب من اللي عندي يعني انا مش عايز احدث انا بس عايز احل المشكله من غير ما اجيب حاجه استعمال تعملي وش بعد فتره ايه الماذربورد و البروسيسور اللي حضرتك تنصحني بيهم و سعرهم هيبقي كام ؟

تحياتي لحضرتك

[abdalhaliem]

أخى الكريم

أعتقد أنك بعيد عن الأسعار والسوق من مده

القصه أن الأجيال الحديثه هى ماتباع جديده

بعد منصتك توجد العديد من المنصات

أبتداء من سلسله الكور

الجيل الأول ألى الجيل الثامن الذى نحن على أعتابه الأن

ولك أن تتخيل أن المنتشر بالسوق الأن الجيل السابع

مع بقايا من قطع الجيل السادس

أتحدث عن الجديد أخى الكريم

والأسعار مرتفعه جداا جداا جداا

نعم من الممكن أن تجد بورده ومعالج من الجيل الرابع جديد

لكن هذا سيكون بحدود ضيقه جداا

لاأعلم ماهى ميزانيتك تحديداا

لكن كتبسيط للأمر

تستطيع شراء بندل جيل رابع بورده + معالج i5 + رام

مستعملين بحدود 4000 جنيها

وممكن أن تستبدل المعالج ب (i3 ) أو حتى معالج Pentium

وتكون بحدود 1500 أو 1200

لكن أن قررت البحث عنهم جديد ستجد سعرهم مرتفع جداا

ومن الأفضل الذهاب مع الجيل السادس أو السابع وقتها

لأن الفرق بينهم لن يكون كبيراا

لذلك نقول المستعمل لأن جهازا جديداا الأن يتكلف ألوفاا من الجنيهات

لايقل عن 7000 جنيه

لأنه فعلا لابد من تغيير المعالج مع تغيير المنصه

وطبعا بدايه من الجيل السادس عليك أن تقوم بتغيير الرام أيضاا

بالأضافه أن تلك القطع تطلب وجود باور أحترافى لكى تعمل بسلاسه

وهو غالى الثمن

لنختصر الحديث

أذا كانت ميزانيتك تسمح أذكرها لنا لنرشح لك مايلائمك

أو تذهب مع الجيل الرابع ولكن مستعمل

ووقتها ممكن أن تستفيد من الرامات لديك ( ddr3 )

بأنتظارك

تحياتى

[casbarrrr]

دلوقتي حضرتك الوضع اختلف تماما ؛ انا روحت لبتاع الصيانه بالجهاز بحاله و وريته الموضوع ده عشان انا تعبت من كتر وصف المشكله و حتي يبقي معاه الحل قالي موضوع صيانه القطب صعب بعد كده قال يغير البروسيسور و يجرب مفيش حاجه اتغيرت جاله و احد بجهاز فيه نفس البورده بتاعتي قولتله يجرب الهارد علي البورده دي و كنت متاكد بنسبه كبيره ان المشكله هتتحل بس لما جرب حصل نفس اللي بيحصل في الجهاز بتاعي قالي يبقي المشكله في الهارد قولتله الهارد مشتغلش ظ£ ساعات علي بعض و كل البرامج بتقول انه كل حاجه فيه سليمه و كمان الهارد السيجيت اللي عندي من سنه حصل فيه نفس الموضوع قالي السيجيت عموما بطىء و حسسني اني جايب هارد من شركه تحت السلم مع ان ده احسن نوع موجود في السوق
حضرتك شايف ايه ؟

[abdalhaliem]

ماتقوله غريب حقاا

أذا كان العيب بالهارد وهذا مالاأتوقعه

قم بالذهاب ألى الشركه التى قمت بشراؤه منها

وأجعلهم يفحصوه لتقوم بالأستبدال حاله وجود مشكله بالهارد

خصوصاا أنك تقول أن الهارد جديداا

وما فهمته منك أن تلك المشكله ليست بخصوص هذا الهارد فقط ؟؟؟

سؤال جانبى

مانوع النظام الدى تعمل عليه

وهل تقوم بتهيئه الهارد بصوره جيده ؟؟؟

هذا لكى نطمئن فقط

لازلت لاأعتقد أن المشكله عندك بأكثر من هارد سببها الهاردات؟؟؟؟

تحياتى

[koki4life]

سؤال بسيط .........هل الهارد به أي jumber ؟

[abdalhaliem]

سؤال بسيط .........هل الهارد به أي jumber ؟


لهذا سألناه عن نوع النظام

أذا كان XP لابد من وضع ال Jumper بطريقه معينه

أما بدايه من ويندوز7 لاداعى لأى Jumper نهائياا

تحياتى للجميع

[casbarrrr]

انا بستخدم xp بس الكلام ده من زمان و محصلش مشكله و مفيش اي هارد من اللي عندي فيه جامبر او ركبت فيه جامبر قبل كده و علي حد معرفتي ان الهارد الساتا مش بيتركبله جامبر اصلا حتي الهارد مش مرسوم عليه طريقه لتركيب جامبرات و التقسيم عادي 4 بارتيشن 1 برايمري و 3 لوجيكال ده في الهارد الجديد اللي عليه الوندوز و التيرا التاني 2 بارتيشن برايمري و ال 500 بارتيشن واحد برايمري
انا جبت انهارده جهاز شبه جهازي عشان اجرب عليه ركبت الهارد الجديد في منفذ الساتا الرئيسي اللي لوحده و شغلت hdd tune جاب 3 ميجا فصلته و ركبته ك سكندري ماستر و شغلت hdd tune جاب 200 ميجا كده علي ما اعتقد الهارد سليم و الماذربورد بتاعتي سليمه بردو لان حصل نفس الكلام في كذا جهاز فيبقي موضوع الجامبر ده ممكن بسبب اني مركب 3 هاردات من غير جامبرات؛ دلوقتي حضراتكو شايفين ممكن اعمل ايه ؟

تحياتي للجميع و شكرا علي اهتمامكو

[abdalhaliem]

أنظر أخى الكريم

نحن عندما نذكر لك شيئا

تأكد أنه مرت علينا تلك المشاكل مئات المرات

لأن هذا عملنا فنحن نعمل بالصيانه منذ أمد بعيد

وشرح هذا الموضوع طويل جداا

لكن لامانع من الشرح بأيجاز

بدايه من تصنيع الأحجام الكبيره

قامت الشركات القائمه على ذلك بتغيير حجم القطاعات

من 512 بايت الى 4 كيلوبايت

وكان هدفهم من ذلك

هو زيادة أحجام الأقراص الصلبة عن طريق تقليص حجم

الجزء المسؤول عن تصحيح الأخطاء (ECC)

وذلك بزيادة حجم القطاعات أو ال Clusters

و نظرا لأن أغلب التطبيقات على ال xp

تقوم بتخزين البيانات بحجم 512 بايت

ولذلك أبتكرت الشركات نظاماا للمحاكاه والمحاذاه

حيث يقوم متحكم القرص الصلب بايهام التطبيقات ونظام التشغيل

انه يستخدم تهيئة 512 بايت

ويقوم بتقسيم كل قطاع فيزيائى 4 كيلوبايت

الى 8 قطاعات 512 بايت منطقية

ولكن ما يحدث عند تهيئة هذا القرص باستخدام ويندوز XP

يبدأ التقسيم من عند القطاع 63 وهو لايقبل القسمة على 8

وبذلك سيحدث عدم محاذاة بفارق قطاع واحد لذلك يحدث أحياناا البطىء

وهنا يتم اللجوء ألى استخدام Jumper بين السنين 7 و 8

وبحقيقه الأمر كانت الشركات بالبدايه يضعون ملصق

على الهارد يوضح ذلك


https://i.imgur.com/qI0Yc7o.jpg


لكنهم لم يهتموا بذلك لاحقاا

لأن الغالبيه العظمى لم تعد تستخدم ال xp

أرجوا أن أكون قد أوضحت القصه لك

بالتوفيق

تحياتى

[casbarrrr]

حضرتك انا عارف ان كلامك ثقه انا بس بدردش مع حضرتك عشان ما ابوظش حاجه لان هنا عندي الصيانه سيئه جدا لك ان تتخيل اني لما قولت للفني جرب الهارد علي جهاز حديث قالي هو انا هقعد كل شويه افك و اركب الهارد بايظ روح رجعه اللي هو فيما معناه انا هوجع دماغي علي ايه !!
شكرا لحضرتك علي الشرح بس لنختصر الكلام بما ان انا عايز اشتغل ب xp فلازم اركب جامبر في الهاردين التيرا السيجيت عشان يشتغلو كويس؛ الجامبر هيتركب ازاي في الهاردين دول لانهم مختلفين عن الصوره اللي حضرتك وضعتها حيث ان فيه 4 سنون و ليس 8 مع الاخذ في الاعتبار انه كذا بارتيشن و ليس بارتيشن واحد ؟
تحياتي لحضرتك

[abdalhaliem]

تمام أخى الكريم

تفسيراا لما مضى لم اكن أقصد بردى أعلاه

أنه لزاما عليك تركيب ال Jumper ؟؟؟

فقط نفسر لك لماذا أستفسرنا منك عن وجود Jumper من عدمه

لكن توجد أنواع كثيره من الهاردات من ذوات ال 1 تيرا

تعمل بدون تركيب أى جنبر عليها

لكن بنفس الوقت لما لاتفكر بتجربه ويندوز 7 كمثال

ياأخى الكريم

مايكروسوفت نفسها أوقفت الدعم عن هذا النظام القديم ؟؟

نحن نتماشى معك لأننا نحاول مساعدتك من وراء الشاشات

والجهاز والهارد ليس أمامنا

ونتبع فى ذلك سياسه تحييد الأحتمالات

وعندما نستنفذ الوسائل سيسقط بيدينا

وسنتيقن حينها أن العيب بالهارد نفسه لسبب ما

لكن من الخطأ القفز فوق جميع الأحتمالات

وصولا لأحتمال وجود عيب بالهارد نفسه !!

لابد أن نحيد أحتمالا تلو الأخر

ولما كنت ذكرت أن الفنى قام بتركيب الهارد على جهاز أخر وكانت به نفس المشكله



جاله و احد بجهاز فيه نفس البورده بتاعتي قولتله
يجرب الهارد علي البورده دي و كنت متاكد بنسبه كبيره ان المشكله هتتحل
بس لما جرب حصل نفس اللي بيحصل في الجهاز بتاعي قالي يبقي المشكله في الهارد


وقتها أتجهت شكوكنا بأتجاه النظام نفسه وأحتمال حدوث مشكله

تسبب بطىء الهارد من جراء عدم توافقه مع النظام

ماعليك بهذا الفنى أخى الكريم

قم بأخذ الهارد ألى أى سيبر وتركيبه على أى جهاز وأختبر نقله للداتا

وياليتك تجربه على جهاز به نظام أحدث من ال xp

بالتوفيق

[casbarrrr]

تمت تجربه الهارد علي جهاز فيه وندوز 7 واشتغل تمام كده المشكله في وندوزxp مع الهاردات الحديثه بس اعتقد زي ما حضرتك قولت حلها في تركيب جامبر لاني مش عايز اغير xp لان الجهاز بالنسبه ليا زكريات بشكله ده بقاله عندي 10 سنين يوم ما يحصل فيه حاجه او يبقي مش بيدعم اي برامج هسيبه و اروح اجيب جهاز جديد فحاليا انا بعد اذن حضرتك عايز اشغل الهاردات علي xp بدون مشاكل

[Black foxer]

يوجد نسخ من اكس بي بها تعريفات للساتا الجديدة لكنها لن تقدم الاداء الذي يقدمه انظمة التشغيل الاخرى

[koki4life]

اذا كنت مصرا علي الاحتفاظ بالجهاز بحالته كما هي و بنظام التشغيل XP ....اذا عليك اللجوء الي الهاردات الخارجية للتخزين فهذا سيكون حلا أفضل لك ......

[abdalhaliem]

أنظر أخى الكريم

قم بتصوير الهارد من ناحيه الملصق الذى به البيانات

صوره واضحه كبيره بحيث يمكن قرائتها بوضوح

وقم بتصوير أماكن الجنبر بالهارد

وياحبذا لو كتبت موديل الهارد كاملاا

بالتوفيق

تحياتى

[casbarrrr]

اولا انا بعتزر علي التأخر في الرد و ده لان كارت اللان ضرب للاسف

الحمد لله تم حل المشكله عن طريق تجربه عنده وندوزات xp و فيهم نسخه الدنيا ظبطت بيها

بشكرا حضراتكم جميعا و خصوصا الاستاذ عبدالحليم اللي صبر علي اسئلتي الكتير ربنا يزيده علم

تحياتي لكم جميعا و شكرا

[abdalhaliem]

اولا انا بعتزر علي التأخر في الرد و ده لان كارت اللان ضرب للاسف
الحمد لله تم حل المشكله عن طريق تجربه عنده وندوزات xp و فيهم نسخه الدنيا ظبطت بيها

بشكرا حضراتكم جميعا و خصوصا الاستاذ عبدالحليم اللي صبر علي اسئلتي الكتير ربنا يزيده علم

تحياتي لكم جميعا و شكرا


لاشكر على واجب أخى الكريم

نحمد الله لحل مشكلتك

مرحب بك دائماا

تحياتى