اختبار Cisco اون لان

[ihssanpro]

السلام عليكم ....
لدي استفسار وهل ممكن مساعدتي في ذلك ....
هل يوجد اختبار ل ( سسكو ) اون لاين يعني تختبر وانت في المنزل ؟

وشكرا لكم

[lumark_s]

لا طبعاً يا أخي لا يوجد!

[Iraq IT]

اذا صار فيه بالبيت يعني حيكون الامتحان عالي الامنية وصعب الحصول على Full Mark!!!

[docesam2]

كيف يضمنوا أنه أنت المختبر وليس صديقك ؟

[هندسه العاشر]

لا طبعا لان سيسكو بتهتم جدا باللي معاهم سيرتيفيد ولهم تقدير عالي بالنسبه للعمل في اي شركه
ام بالنسبه للاختبار فكيف يجموا انفسهم ويعطوا الثقه للشركه وكل من هب ودب يمتحن في بيته وكمان بدون مراقبه من اكتر من شخص
اخوك محمد عادل

[محمود الحسن]

أنا بدرس سيسكو وبمتحن بالبيت عادي

[3BADI750]

نعم حضرتك قلت بالبيت
طيب حضرتك امتحنت ايه ...!!!!!؟؟؟

[هندسه العاشر]

اكيد انت بتمتحن امتحانات سيسكو اكاديمي الداخليه وليس امتحانات الدوليه ده بس اللي ممكن تمتحنه يا استاذنا
وهوه غير ذات قيمه لسوق العمل هو مجرد تقويه لمستواك عشان تعدي امتحان الترم في سيسكو اكاديمي
وبعد كدا الامتحان الدولي ماهو تبع سيسكو تبع vue سيسكو هي بس اللي بتحط الامتحان والvue هو الرقيب عليك يعني لازم تكون مراقب وكمان تكون حاجز امتحانك قبل 24 ساعه عشان يحضرولك شخص مخصوص لمراقبتك وانت بتمتحن
اتحياتي وياريت يكون وضح اللي بيتقال من ناحيتي
اخوكم محمد عادل

[Nightspy]

ياريت كان بالبيت كنا زمنا حوشنا الالف جنية الى بيخدوها فى بطنهم وجبنا كنبة
لكن معلش الاحلام مش كلها بتتحقق

[محمود الحسن]

نعم أمتحن الامتحانات العادية تبع الفصل وليس الدولية

[cisckawy]

لا طبعا لان سيسكو بتهتم جدا باللي معاهم سيرتيفيد ولهم تقدير عالي بالنسبه للعمل في اي شركه
اخوك محمد عادل

اختلف معك اخى محمد عادل لو سيسكو فعلا بتهتم كانت غيرت اسئلة الامتحانات بمعدل اكبر من كده

اقو لك نكته
انا داخل امتحان الSND ان شاء الله بعد كم يوم تعرف الباس فور شور بتاعه كام؟

ستين سؤال فقط لا غير و الامتحان كله بيجى منه :Unhappy:

العمليه فى الآخر تجاره و مصدر ربح

[3BADI750]

سؤال صغير هوا ايه ال SND

[cisckawy]

securing Network Devices
و ده عادة أول امتحان فى ال CCSP

[amna_ali]

اكيد انت بتمتحن امتحانات سيسكو اكاديمي الداخليه وليس امتحانات الدوليه ده بس اللي ممكن تمتحنه يا استاذنا
وهوه غير ذات قيمه لسوق العمل هو مجرد تقويه لمستواك عشان تعدي امتحان الترم في سيسكو اكاديمي


اختلف معك اخي في كلامك طلاب سيسكو اكاديمي اقوى بمراحل من الطلاب الاخرين صحيح انهم لا يحصلون على شهادة CCNA بصورة اوتوماتيكية ولكنهم يحصلون على معرفة تؤهلهم للعمل الفعلي و لذلك يجدون ان امتحاناتهم التي قدموها في الاكاديمية اصعب من إمتحان CCNA الذي يمكن ان ينجحه اي شخص بالدرجة الكاملة لو اكتفي بمذاكرة النسخة الاخيرة من pass4sure

[Nightspy]

ياجماعة ليه كل واحد عامل نفسة مفتى الموضوع فى سسكو كلة بيتلخص فى الجزء العملى يعنى لو انا خدت مثلا مثلا شهادة خبرة من شركة عملاقة فى مجال الشبكات مثلا عشر سنوات فى تقديرى تعادل الccie او عشر من بتوع سيسكو اكاديمى وكمان مين قال ان مذاكرة الباس فو شور بالسهولة دى تعرف لو حد مش فاهم اى حاجة فى اى حاجة وقام بمذاكرة الموضوعات الى فى اسئلة الباس فور شور هيبقى ذاكر الCCNA
وكمان فى موضوع بيحيرنى كيف مثلا اخفظ حوالى 200 سؤال وانا مش فاهمهم ازاى يعنى
ممكن الواحد مش فاهم سؤالين او ثلاثة لاكن مش فاهم اى حاجة خالص صعب اوى ياجماعة

[memoragaa]

على رأيك يا نايت سباى اهم حاجة الفهم والخبرة

[lumark_s]

ياجماعة ليه كل واحد عامل نفسة مفتى الموضوع فى سسكو كلة بيتلخص فى الجزء العملى يعنى لو انا خدت مثلا مثلا شهادة خبرة من شركة عملاقة فى مجال الشبكات مثلا عشر سنوات فى تقديرى تعادل الccie او عشر من بتوع سيسكو اكاديمى وكمان مين قال ان مذاكرة الباس فو شور بالسهولة دى تعرف لو حد مش فاهم اى حاجة فى اى حاجة وقام بمذاكرة الموضوعات الى فى اسئلة الباس فور شور هيبقى ذاكر الCCNA
وكمان فى موضوع بيحيرنى كيف مثلا اخفظ حوالى 200 سؤال وانا مش فاهمهم ازاى يعنى
ممكن الواحد مش فاهم سؤالين او ثلاثة لاكن مش فاهم اى حاجة خالص صعب اوى ياجماعة

إحنا مش في الأزهر يا ريس، عشان كدة مافيش فتاوي ولا حاجات، هي مجرد آراء نتشارك بها ونفيد بها غيرنا من الإخوان الذي بيسألوا، بس مافيش لا فتاوي ولا حاجة :)


مين اللي قال لك يا ريس إنه لو ذاكرت ال 200 سؤال بتوع الباسفور شور حتبقى ذاكرت ال CCNA ؟؟؟؟ ده اللي قالك الحاجة ديت غشك !!!

ده كلام فاضي يا ريس مع إحترامي لرأيك، وإنت من الناس اللي ليهم حضور مميز في القسم ده، وميصحش تقول الكلام ده لأنك بتهدم مش بتعمر.

مش صعبة أوي تحفظ 1000 سؤال يا ريس وتروح وتجيب 1000 من 1000 !!!

السبب بسيط: عشان الأسئلة بتاعت الإمتحان هي هي بتاعت الباسفور شور، يعني الفل مارك مضمونة بدون تعب و بدون فهم !!! ، بس روح قدم على شغلانة بعد ماتجيب الألف من ألف حيلحقوا الراجل ده بتاع ال 1000 من 1000 بالطوب يا ريس !!!!!!!!

هذا الكلام مرفوض في منتدى عرب هادوير، وخصوصاً في قسم أنا مديره (والعياذ بالله من كلمة أنا) لأنني هنا لكي أبني وأساعد إخواني وأخواتي على النجاح والتفوق، وليس لكي أهدم وأدمر !!


فياريت نبتعد عن ذكر أي من هذه الأفكار التي ممكن تساعد في دمارنا بدل من نجاحنا.

بعدين ربنا يا ريس مش حيبارك في رزقنا!! ولا نسينا الحاجة ديت، ربنا ببارك برزقنا لما يجي بالحلال، دراسة ال سي سي أن إيه ومن ثم مراجعة أسئلة الباسفور شور قبل الإمتحان بيوم مش حرام، لأننا ببساطة بستعمل الباسفورشور عشان ما نسقطش في الإمتحان لأننا ولا مؤاخذة أولاد غلابة، الواحد فينا بينطحن وبيحرم أهله حاجات كتيرة لما يروح يدفع 1000 جنيه ثمن الإمتحان بس عشان نتأكد من نجاحنا لا أكثر ولا اقل، يعني الباسفورشور هو وسيلة وليست غاية يا ريس، وسيلة للنجاح فقط، ولكن النجاح يأتي من فهم المادة فقط.

لو تلاحظ في قسمنا هنا، معظم اللي بينجح بيصير معلم فوراً وبيجاوب وبيدرس إخواتة وبيكتب مقالات ممتازة، ليه ؟؟؟ عشان هو نجح بذراعة يا ريس ، وإستعمل الباسفور شور بعد ما إتأكد إنه فاهم مية مية، الباسفور شور بس عشان لاسمح الله مانسقطش.

وكمان يا أخي الحبيب الجانب العملي بدون فهم نظري ماينفعش، كله بيكمل بعض، الفهم أهم بمليون مرة من الخبرة، لأن الفهم هو الذي سيجلب لك الفرصة لكي تكتسب خبرة، بس الخبرة عمرها ماتعلم الفهم، عمرك شفت دكتور معاه طب تخصص عيون و معاه خبرة عشرين سنة في طب العيون قدم في وظيفة دكتور في أمراض القلب ونجح في الوظيفة ؟؟؟ لا طبعاً، لكن لو جبت واحد خريج جديد معاه أختصاص أمراض القلب فوراً حيشغلوه ويوزعوا بتاع العيون، لأنه مبيفهمش في الأعصاب، هو بتاع عيون بس !! حتى لو معاه عشرين سنة خبرة في طب العيون مش حيخدوه وحيخدوا واحد متخرج إمبارح بس بيفهم.

الفهم سيجلب لك الخبرة والنجاح والتفوق، والخبرة أساسها الفهم، بدون فهم لا يمكن إكتساب الخبرة.

ياريت تضيفني على الياهو عشان عايز أدردش معاك إنت مخصوص يا رياسة.

رمضان كريم والسلام عليكم ورحمة الله وبركاته

[mando_79]

احترم رايك لومارك جدا
ولكن

احنا مش في الأزهر يا ريس، عشان كدة مافيش فتاوي ولا حاجات، هي مجرد آراء نتشارك بها ونفيد بها غيرنا من الإخوان الذي بيسألوا، بس مافيش لا فتاوي ولا حاجة
اتمنى ان تكون النية حسنة
لان الازهر فضلة على الاسلام لا يعد ولا يحصى
لو تسمح لى ان نقول

احنا مش في الفضائيات يا ريس، عشان كدة مافيش فتاوي ولا حاجات، هي مجرد آراء نتشارك بها ونفيد بها غيرنا من الإخوان الذي بيسألوا، بس مافيش لا فتاوي ولا حاجة
اشكرك لومارك

[lumark_s]

لا يا مندو أنا مش قصدي حاجة غلط لا سمح الله يا راجل متأولش على كلامي !!!

انا قصدي من العبارة اللي كتبتها إنه الأزهر هو للفتاوي الدينية فقط، والأخ نايت سباي كان بيقول كل واحد عامل نفسه مفتي، عشان كده ضرت مثال الأزهر عشان هو فقط مكان الفتاوي، بس هنا في المنتدى لا يوجد فتاوي، ده مكان نصح وإرشاد فقط، هذا ماقصدته يا أخي فيا ريت لا تتعجل في الحكم على ماكتبت لأن الله هو أعلم بنيتي.

بعدين إيه السطر الثاني اللي إنت كاتبه يا ريس؟؟؟ مش فاهم حاجة !!! يا ريت توضح يا مندو ليه إنت إقتبست كلامي وبدلت كلمة الأزهر بفضائيات ؟؟!!!!!

[mando_79]

والله اعرف ان نيتك سليمه LooL
ولكنى تعمدت اعلق علشان الايضاح حتى لا يفهم احد انك تهزأ بالازهر
ثانيا تغير كلمة الازهر بكلمة الفضائيات لا اعنى شئ حبيبى سوى انة كما تعلم ان الفتاوى كلها الان اصبحت على الهواء بشكل مستمر شبة يومى وبشكل متضارب انما الازهر لا يجرئ عالم منة ابداء اى فتوى منفردا عن غيرة للايضاح فقط لعلمهم بخطورة الفتوى
مع ان هذا ليس مكان ولا زمان لمثل كل هذا الكلام ولكنى اعرف لومارك واعرف ماذا يقصد واعرف قدر المعرفة مكانة الازهر عند كل مسلم غيور على دينة:frnd"

[amna_ali]

ياجماعة ليه كل واحد عامل نفسة مفتى الموضوع فى سسكو
لن ارد باكثر مما قاله الاخ لومارك

[3BADI750]

ياريت يا جماعة نبدي شوية احترام لآراء الاخرين
حتي ولو كان فيها تناقض مع راينا الخاص
او حتي لو كان رايه غلط
نوجهه بس بشكل مهذب شويا

وانا برضوا لن ازيد علي كلام لومارك شئ

[هندسه العاشر]

اهم شئ فيه حد مات ولا اتعور
يا جماعه الغلطه غلطتي
انا مش هتكلم تاني ههههههههههه
للعلم يا امنه انا كنت اقصد انه الشهاده الخاصه بالامتحانات مش مهمه اوي يعني
بس
لكن طبعا سيسكو اكاديمي معروف قوتها في التعليم وانهم مبيسبوش حرف واحد
واخي لومارك اسف لان الناس يمكن بقي موضوع تدخل فيه سياسات دوليه
المهم انا مش هقول غير محدش يكتب وهوه صايم الا لما يركز بقي هههههههههه
كل سنه وانتم طيبين ورمضان كريم
اخوكم محمد عادل

[amna_ali]

ههههههه معاك حق يا محمد محدش يكتب وهو صايم
ياللا عشانك حاعدل رأيئ عشان الموضوع ما بوسع اكتر و عفا الله عما سلف

[MR_ENGINEER]

عندي كلمة واحدة :

طريق الفشل العملي يبدأ من مذاكرة الشهادات الدولية من نماذج الأسئلة....

معه تخسر الفهم...

تخسر ثقتك بنفسك.....تخسر أموال اللامتحانات....حينما تطرد في أول انترفيوا ...ز

ولا عزاء ساعتها للكسااااالى

[lumark_s]

حصل خير يا أخوة

الموضوع مافيه لا سياسة ولا شيء يا أخي الحبيب.

مندو بطل تأويل يا عم :D من ساعة منجحت في ال CCNA محدش قادرلك ، أمال لو جبت ال CCIE حتعمل فينا إيه يا عم مندو، بالطبنجة على دماغنا حتدينا هههههههههههههههههههه

حصل خير يا أحبة وكل سنة وإنتم طيبين :)

[Nightspy]

يا جماعة كلامى اتفهم غلط
اولا بالنسبة لهذا
حاجة وقام بمذاكرة الموضوعات الى فى اسئلة الباس فور شور هيبقى ذاكر الCCNA
ركزوا فى كلمة موضوعات وليس الاسئلة لان كلمة موضوع بتعبر فكرة الموضوع يعنى مثلا لو وجدت سؤال فى الروتنج هروح اذاكر الروتنج انا مش بقول ان دة هية الطريقة الصحيحة لاكن فعلا الباس فور شور لامم المنهج ومعنى لامم المنهج انة اسئلة بتغطى موضوعات ccna

وانا عن نفسى اخدت كورس الاول والان براجع على المنهج

موضوع حفظ الاسئلة دى بصراحة مش هتدخل دماغى لان حتى لو انا حفظت الاسئلة يكفى اسئلة السمليوشن انها تتطير الامتحان الايبهات بتتغير وحتى فى الاسئلة التانية مواضع الاجابات بتتغيير
وكمان لو واحد مش فاهم حاجة مش هيفهم اصلا فكرة الكورس اصلا مثلا لو انا جيبت لشخص عشر( اسطر) لاتينى وقلت لواحد احفظه وهو مش عارف لاتينى اصلا هل يستوى بواحد اعطيتة عشر (صفحات) بالعربى اظن المعنى وصل

انتا قولت
فياريت نبتعد عن ذكر أي من هذه الأفكار التي ممكن تساعد في دمارنا بدل من نجاحنا.
مين قال انى باييد الفكرة بتاعت حفظ الاسئلة بالعكس دى فكرة متدهورة لاكن انا مستبعد ان واحد يقدر يعملة وان عملها فهذا ضحك على النفس

لاكن الشئ الى انا اقصدة ان الناس عندهم جلد الذات قبل الCCNA قلنا ملناش مكان فى العمل و بعد ماخدناها قلنا اصحاب سيسكو اكديمى احسن ______ مش بالطريقة دى يا اخوة يعنى ربنا خلق لنا عقول ومش لازم الى بيدفع اكثر هو الى بيكون احسن

يعنى بيعجبنى الاخ لومارك لما كان بيشرح برنامج الدينمابس فى البحث عن صور لاجهزة سيسكو وفيديو المنتجات الخاصة بسسكو والاعتماد على النفس لتنمية المهارات والمعرفة فى اى مجال كان

على العموم انا اعتذر لو اتفهمت غلط عشان تهدى النفوس وكل عام وانتم بخير

[Nightspy]

نسيت حاجة انا ضيفتك يا اخ لومارك ولية الشرف لذلك

[amna_ali]

لاكن الشئ الى انا اقصدة ان الناس عندهم جلد الذات قبل الCCNA قلنا ملناش مكان فى العمل و بعد ماخدناها قلنا اصحاب سيسكو اكديمى احسن ______ مش بالطريقة دى يا اخوة يعنى ربنا خلق لنا عقول ومش لازم الى بيدفع اكثر هو الى بيكون احسن


على فكرة انا لما قلت طلبة سيسكو اكاديمي افضل ما قلتش كدة لانهم بيدفعوا اكتر او لان عقولهم افضل انا قلت كدة لان تدريبهم العملي في الاكاديمية مركز اكتر تقدر تقولي وين الكورسات اللي بتبتدي مع طلبتهم من تعليمهم بصورة عملية كيف يصنعوا انواع الكيبلات المختلفة لحدي ما يصلوا لعمل كونفجريشن كاملة هل تعلم ياخي ان طلبة سيسكو اكاديمي يمتحنون امتحانات عملية يعطون فيه رسمة ل Network Topology ويطالبون فيها بعمل كونفجريشن ل DHCP و NAT و Frame Relay و OSPF هذا في امتحان واحد رايته بنفسي, هذا بالاضافة للامتحانات النظرية

ياخي انا لا اتحيز لسيسكو اكاديمي لاسباب واهية و على فكرة انا لست طالبة نظامية في سيسكو اكاديمي حتى لا تعتقد اني ازكي نفسي و لكنني اتدرب في لاباتهم و اتيحت لدي الفرصة لاحضر بعض محاضراتهم و ارى احد امتحاناتهم و صراحة اعجبت جدا بمستوى تجهيز اللابات و كفاءة المعلمين و كمية التدريب العملي المتاح لهم

ياخي مدح طلبة سيسكو اكاديمي لا يعني ذم الاخرين فلا تاخذ الموضوع بصورة شخصية و لكن لا احد ينكر مستوى الاهتمام و التدريب الذي يلاقاه طلبة الاكاديمية

و بعدين ما فيش حد بيجلد في نفسه و انا ما قلتش ان اي خريج من سيسكو اكاديمي حيلقى شغل و الباقين مش حيلقوا ببساطة لان الشغل دا ارزاق من الله و غير كدة بتدخل فيه عوامل كثيرة قد تطغى على الكفاءة في بعض الاحيان

ياريت قبل ما كنت تهاجمنا و تقول احنا بنفتي كنت سألتنا احنا نقصد ايه بكلامنا و بعدين ليس بالضرورة ان كل من لا يوافقك الراي فهو مفتي

الافتاء ياخي كلمة كبيرة يختص بها اناس لهم هيبتهم و مكانتهم لا ارتقي انا لهم فالرجاء عدم استخدام هذه الكلمة لذم الاخرين

[mando_79]

انت بتقول فيها يا لومارك
دة انا لونجحت فى ال ccie مش هاستخدم طبنجة واحدة والا اتنين بالثلاثة
بس فى الهوا هههههههههههههههه