من دلتاوية فى مدينة نصر
محل محترم يعنى يعتبر من المحلات الكبيرة بتاعة الموبايلات فى مصر
طيب و ايه رايكم فى الابيض - حاسس انه مختلف شوية و بيتهيألى الزراير بتاعت الباك و المنيو هاتكون ظاهرة من غير نور - صح ؟ و لا ايه ؟
حاجة كمان هل يفرق :
1- انه يكون: Made By Samsung اللى هى طبعاً توازى صنع الصين - و ده اللى موجود بضمان الوكيل يونيون جروب لمدة سنة ...
2- أو يكون مكتوب عليه من جوه : Made in Korea by Samsung ؟ و غالباً ده هايكون من غير ضمان سوى الـ 14 يوم بتوع الاسترجاع
أصل الحكاية دى عاملالى هسهس)))
بص يا برنس موضوع الالوان ده حاجة ذوقية يعنى انا ممكن يعجبنى الاسود و انت يعجبك الابيض مش ديه المشكلة
بالنسبة لموضوع بلد الصنع ده ناس كتير اوى اتكلموا فى الموضوع ده و طلع ان مفيش فرق بين الاجهزة
و ان العيوب اللى ممكن تطلع فى الجهاز بتبقه ملهاش علاقة بالصناعة بدليل ان فيه ناس طلع معاهم عيوب مصنعية فى نسخ كورية
عشان كده يفضل انك لما تشترى الموبايل سواء صينى او كورى او حتى مصرى يكون معاك ضمان تجنبا لاى مشاكل صناعية لانى ما اعتقدش انهم فى عبد العزيز هيرضوا يدولك جهاز بدل اللى طلع فيه عيب مصنعى مثلا ... يا اما هيقولك ده عيب مستخدم اللى هوه حضرتك او لو طلع جدع اوى هياخده منك يصلحه و برده مش هيعرف يصلحه لان العيوب المصنعية بتحتاج تغيير الجزء البايظ و هوه مش وكيل و مش عنده الاجزاء الاصلية للموبايل.. :cool:
المهم يعنى نصيحة اشترى موبايلك بالضمان على الاقل هيبقه جهازك جاى متعرب من المصنع نفسه و حتى لو الضمان طلع واطى معاك ممكن تشتكيه لحماية المستهلك او تشتكيه لسامسونج نفسها
و ان شاء الله ما يبقاش فيه شكاوى و منتحوجلوش اصلا
طيب مانجيب من توكيل سامسونج نفسه الى فى مصر
مهو يونيون جروب هوه توكيل سامسونج فى مصر
لو قصدك على انى اجيب من المحلات بتاعة سامسونج فكده كده المحلات ديه بتبيع الموبايلات بضمان يونيون جروب
بص يا حمادة مفيش حاجة اسمها مركز صيانة لسامسونج .. همه ليهم مراكز بيع و عندهم خدمة عملاء بس
لكن يونيون جروب هيه اللى عندها مراكز الصيانة بتاعة الموبايلات
زى كده فى الكمبيوتر و الشاشات توكيل سامسونج هوه مترا يعنى انت لما اللاب توب بتاعك بيبوظ مش هتروح لسامسونج ... هتروح لمترا
يعنى يونيون جروب هو مركز الصيانه الوحيد لموبيلات سامسونج فى مصر
لا فيه توكيل تانى افضل منه اسمه سكاى و يفضل انك تجيبه بضمان سكاى بس تقريبا هتلاقيه اغلى شوية من بتاع يونيون جروب
بس اللى انا ملاحظه ان اغلب المحلات بتبيع الموبايل اللى هوه توكيل يونيون جروب
غالبا هتلاقى الموبايل اللى هوه توكيل سكاى عامل 4000 جنيه
شكراً يا روش :ah4:
توكلنا على الله :D
ده سعر الموبيل فى توكيل رايه
ياريت الى يشتريه الاول
يقولنا ايه اخبار الموبيل وجابه منين وبكام وبضمان ولا لا
السلام عليكم
انا انهاردة نزلت عملت جولة فى شارع شريف و شارع عبد العزيز عشان اعرف سعر الموبايل وصل كام
مبدئيا كده زى منا توقعت فعلا سعر الموبايل فى النازل
فى شارع شريف السعر بالضمان كان يتراوح بين 3650 و 3800 و بصراحة 3650 بالضمان انا شايفه سعر ممتاز جدا
و برده كان نفس الحال فى شارع عبد العزيز
اهم حاجة فى الموضوع ان انا لاقيت محل بيبيع الجهاز ب 3650 بضمان يونيون جروب فى شارع شريف
و محل تانى برده بيبيع الجهاز ب 3650 بضمان سكاى فى عبد العزيز
المشكلة ان انا ثقتى فى شارع عبد العزيز مش اد كده انا بنزله بس عشان اعرف اخبار الاسعار و ايه الموبايلات اللى نزلت و الكلام ده
فانا دلوقتى محتار هل اجيبه من عبد العزيز و اتوكل على الله ولا اجيبه من شارع شريف بضمان يونيون جروب و انا حظى بقه اذا كانوا هيقرفونى معاهم فى الضمان ولا هيطلعوا معايا ناس محترمين (اشك) :cool:
لكن المحل اللى فى عبد العزيز لما سألته على موضوع ال14 يوم اللى ممكن ارجع فيهم الموبايل قاللى لا همه اول يوم او يومين بالكتير اوى بعد كده تروح للضمان
الصراحة كان بياع اتم اوى و خنقنى بالرد ده اصل بينى و بينكوا محلات عبد العزيز ديه كلها مش بتؤمن بوجود قوانين حماية مستهلك ولا بتاع دول شغالين على مزاجهم و ده اللى بيخلينى افكر الف مرة قبل ما اشترى حاجة من عبد العزيز
بالنسبة للموبايلات اللى بدون ضمان كلها كانت فى رينج 3300 طبعا ما اهتمتش انا بيها اوى لان فرق 350 جنيه ولا حاجة طبعا فانا اجيب اللى بضمان افضل :ah7:
المهم انا رجعت البيت و انا عاوز اعرف طب لو هوه رفض يدينى موبايل غيره هل الضمان هيرضى يدينى موبايل غيره خلال ال14 يوم اذا لا قدر الله طلع فيه اى عيوب مصنعية ولا حاجة
المهم اتصلت بالرقم الساخن بتاع ضمان سكاى فوجئت ان همه مواعيد عملهم من الساعة 9 الصبح للساعة 5 مساء و كمان ماعدا الجمعة .. ايه الهنا ده ياخويا اول مرة فى حياتى اشوف خط ساخن ليه مواعيد عمل .. بصراحة الحتة ديه ضايقتنى اوى من توكيل سكاى ... حسيت ان همه شركة نفرين و طفاية الصراحة
المهم اتصلت على الخط الساخن بتاع يونيون جروب و قولتلها على اللى حصل قالتلى ان لازم عشان نبدلك الجهاز لو لا قدر الله فيه اى عيب لازم يكون معاك فاتورة شراء ضريبية و مكتوب فيها موديل الموبايل و السيريال نمبر و التاريخ و ختم المحل و السجل التجارى و الضريبى و يكون كل ده بخط واضح
موضوع الخط الواضح ده انا بقوله عشان فيه واحد مرضيوش يدخلوله موبايله فى الضمان عشان التاريخ فى الفاتورة مكنش مكتوب بخط واضح
طيب يبقه نطلع من الموضوع ده كله بكام نقطة كويسين نعملهم قبل ما نشترى الموبايل
1- التأكد ان الموبايل موديله I9100 و ليس I9100G
2- التأكد من البرشام الاسود اللى هوه بتاع سامسونج ما يكونش مفكوك او حد لعب فيه و انا كنت سألت الراجل هل سكاى مبرشمة الموبايل بالبرشام بتاعها قالى لأ و ديه الصراحة معلومة انا حابب اسال فيها اى حد اشترى موبايله بضمان سكاى لان هوه قالى ان برشام سامسونج بس هوه اللى موجود لكن سكاى مش بتحط برشام .. !!!
و برده ما خدتش بالى اذا كانت يونيون جروب بتحط برشام على الموبايل ولا برده بتعمل زى سكاى و بتكتفى ببرشام سامسونج الاسود.
3- التأكد من ان النسخة ديه نسخة شرق اوسط و ده بان الكتابة من الضهر بتكون باللغة العربية مش كلها انجليزى ... هوه اكيد طبعا هتكون نسخة شرق اوسط اللى هيه بالضمان يعنى بس برده اعمل تشيك .
4- طلع الضمان من العلبة من غير ما تفكها بيكون فى الجمب كده و شوف تاريخ الضمان بيبتدى من امته لو لاقيت التاريخ قديم ما تشتريش الموبايل يعنى فرضا جيت تبص فى تاريخ الضمان لاقيته بادئ من شهرين فاتوا طب و انا ايه ذنبى اخد موبايل ضاع منه شهرين من الضمان .. انا شايف ان المدة المعقولة تكون شهر واحد و ده كتير اوى كمان بس كده كده السوق نايم فمفيش مشكلة يعنى
كل الخطوات ديه هتعملها قبل ما تفك البرشام يعنى لسه ما دفعتش الفلوس ولا عملت اى حاجة انت كل ده انت طلبت منه انك بس تشوف علبة الموبايل من بره ...
اللى جاى ده بقه هوه الاهم من ده كله
5- قول للراجل انا هاخد الجهاز بس عاوزك تفتحه ابص عليه من جوه ... طبعا الراجل هيفك البرشام و يفتح العلبة بص على الاكسسوارات بتاعة الموبايل و اتاكد ان كل حاجة موجودة الشاحن و وصلة اليو اس ى و البطارية و السماعات و برده تتأكد ان التليفون موجود :D
بعد كده بقه المفروض انك تجرب الجهاز .... بس الصراحة انا مش شايف اى داعى لموضوع تجربة الجهاز جوه المحل ... لو عاوزه يجربلك الموبايل جوه المحل عادى مفيش مشكلة بس اصل كده كده انت لما تروح البيت افتح الموبايل براحتك و اقعد دقق فى كل حاجة فيه لكن و انت فى المحل مش هيبقه عندك الفرصة انك تعمل كده اخرك هتفتح الموبايل و تشغل فيديو و تشوف الالوان و تسمع الصوت و دول مش من العيوب المعروفة بتاعة الجلاكسى
انا ممكن اخد منه الموبايل و اروح البيت اقعد براحتى اجرب الموبايل و افليه بقه
1- تأكد من عدم وجود بقعة حمراء فى منتصف الشاشة اثناء التصوير
2- تأكد من عدم وجود اى بقع صفراء فى الشاشة و ان الشاشة تكون كلها لون واحد و فيه اختبار بتعمله اسمه LCD Test ده من جوه الموبايل مش برنامج ولا حاجة بس الصراحة مش فاكر الكود بتاعه ايه بس انت اعمل سيرش على الحتة ديه و هات الكود و اعمل الاختبار ده هيجيبلك الشاشة كلها لون ابيض مثلا تقوم تدور على نقط مثلا مسودة ولا حاجة و بعد كده يجيبلك اللون الاسود تقوم تدور على نقط مصفرة ولا حاجة كده يعنى
3- عيب صدى الصوت اثناء التحدث ... حط شريحتك و كلم اى حد من اصحابك و سلم عليه و كده و قوله انت سامع اى صدى صوت و انا بتكلم لو قالك لا كله تمام يبقه فل لو قالك اه انا سامع صدى صوت و انت بتتكلم يبقه للاسف العيب ده موجود عندك
اعتقد ان همه دول التلات عيوب الرئيسية فى الجلاكسى 2 اللى كنت بشوف الناس بتشتكى منهم فى المنتديات بس برده احب اطمنكوا ان العيوب كانت فى النسخ الاولى اللى كانت نزلت فى شهر 5 و 6 دلوقتى احنا فى شهر 12 يعنى اكيد العيوب ديه كلها سامسونج تخلصت منها بدليل ان الموبايل محقق المبيعات ديه كلها
اخر حاجة و اهم اهم اهم اهم حاجة نسيت اقولها فى اول الموضوع اسال البياع قبل ما تشترى الموبايل او حتى تشوفه قوله انت هتدينى فاتورة ولا هتدينى الموبايل فى كيس و تقولى مبروك عليك لو قالك بس كده تمن الموبايل هيزيد حاول معاه بشكل ودى ان الفاتورة ديه عشان تحميلك حقك عشان لو الموبايل طلع فيه اى عيوب صناعة تروح التوكيل تبدله و انت فارد جناحاتك عليهم لان لو روحت التوكيل و مش معاك الفاتورة هيقولولك الموبايل هيدخل صيانة مش هنديلك واحد جديد مكانه .. فريح دماغك و اطلب منه فاتورة شراء ده اذا كان مش ناوى يديلك فاتورة يعنى و قوله انا كده كده مليش دعوة بيك انا عشان لو الموبايل طلع فيه اى عيوب مصنعية اروح للتوكيل و انا مطمن انهم هيبدلوا الجهاز ليا
بس كده اعتقد ان انا قولت كل المعلومات اللى اعرفها عن الجلاكسى 2 موبايلى القادم ان شاء الله و ياريت الناس تاخد بالها من موضوع الفاتورة و البرشام
كلام جامد ومفيد جدا
بس انا عايز اقولك حاجه انت لو جربت تسأل على يونيون جروب هتلاقى الناس بتشتم فيهم كتير وحتى شوف على الجروب
بتعهم على الفيس بوك
ولو انت هاتجيب من يونيون جروب روح اشتريه من التوكيل نفسه يعنى المركز الرئيسى للتوكيل
انا مش عارف بصراحه اشتريه منين (استحاله اشتريه من شارع عبد العزيز)
انا كده كده هاشتريه فى اخر شهر واحد بعد ماخلص امتحانات
انا كنت عايز اشتريه من توكيل رايه او I2 بس غالى اوى ب 4000 ج
لو السعر مانزلش فى رايه او I2 هاروح اشتريه من يونيون جروب
طب و هتفرق فى ايه لما تجيبه من يونيون جروب نفسها
هيه هيه نفس المشكلة برده هيبقه بضمان يونيون جروب و هيبقه غالى كمان هيكون ب 4000 جنيه زى ما المحلات الكبيرة بتبيعه زى موبايل شوب و رايه شوب
هوه انت متخيل يا حمادة انك لما تشترى من فرع من فروع يونيون جروب هيعاملوك فى الضمان بطريقة مختلفة
هوه يفضل انك تشترى الموبايل من محل معروف زى التميمى او دلتاوية او دريم 2000 كل ديه محلات مشهورة و دايما هتلاقى سعرهم اقل لانهم بيشتروا كميات كبيرة جملة من التوكيل فبياخدوا خصم عليها عشان كده تلاقى ان المحلات ديه بتبيع اقل من التوكيل 100 جنيه ولا حاجة
عندك دلتاوية فى مدينة نصر فى مكرم عبيد عند السلاب ب 3700 ضمان يونيون جروب هاته من عندهم و انت مطمن عشان دول هتلاقى عندهم ستوكات و بيتعاملوا بفاتورة ضريبية و كده فانت ممكن اصلا تبدل من عندهم الموبايل خلال اول 14 يوم لو فيه اى عيوب مصنعية ... يعنى مش هيقولولك اتعامل مع الضمان لا همه بياخدوا منك الجهاز المعيوب و يدولك واحد جديد و همه بيتصرفوا مع الوكيل
بس ده اللى اعرفه و الله اعلم
لا انا قصدى علشان التوكيل مايتلككش فى حوار الفاتوره
روش باشا مشكور على المجهود ومشاركة المعلومات المفيدة
بالنسبة للكود بتاع الشاشة انا جبته من على النت لأنى لسة مشترتش الموبيل ( بس بأذن الله هاجيبه :-))) )
*#0*# cood :
مش راضى يتكتب صح بالانجليزى - بص هو من الشمال لليمين : نجمة - شباك - زيرو - نجمة - شباك
بالنسبة لـ I9100G
هو هو بس لونة ابيض من غير اى تغيير فى المواصفات
بالنسبة لكلام حمادة 2010
هو يقصد ان الفاتورة هاتكون طالعة من عندهم و اكيد فيها كل البيانات المطلوبة و مايقدروش يتلككوا عليها لانها بتاعتهم و ده اللى انا فكرت فيه بس الواحد اولى بفرق 300 ج على الاقل يجيبلوا اكسسوار أصلى - على فكرة انا قريت ان الجرابات السليكون الاصلى ممتازة و بتوصل حوالى 150 ج أحسن من المضروب ابو 25 جنية - حاجة كدة متعلقة بتصريف الرطوبة علشان الشاشة الاورجانيك ماتعلقش
و على فكرة هو نزل فى فودافون بس برده ب 4000 جندى !
يعنى قولت اشارك معاكو و أدينا بنتبادل المعلومات
ضوابط المشاركة
المفضلات