زهقت من شركة TEData .. ما هي أفضل شركة ADSL حاليا في القاهرة سنترال المطرية !!!

[عبدالرحمن زكريا]

السلام عليكم ورحمة الله وبركاته

تم إضافة صور للمشكلة

بصوا كدة على الصور دي وقولوا لي ليا حق افصل ولا لأ

دي صورة النت فصل فيها .. Down >> وكانت السرعة 725



دي صورة كان النت شغال .. PVC Status : Up >> وكانت السرعة 85



ودي صورة للنت شغال والسرعة 309



ودي صورة للنت لما بيكون شغال بسرعة طبيعية 1024




دي أسعار TEData << اللي هسيبها إن شاء الله

ودي أسعار Vodafone >> ياريت حد يقول لنا فيها سرعات غير محدودة ولا لأ !!
عشان مفيش في الموقع سرعات غير محدودة

ودي أسعار etisalat << وانا مايل لشركة اتصالات بصراحة




رسالة شكر
جزاكم الله خيراً على ما تبذلونه من جهد لمساعدة الأخرين
بارك الله فيكم وجعله الله في ميزان حسناتكم




بداية الحكاية
طبعاً شركة TEData من أكبر الشركات في مصر وأشهرها والجميع يشهد بكدة
وطبعاً من خلال تجربة قربت على الخمس سنوات
كانت الخدمة جيدة جداً

وأتذكر منذ سنتين حدث بطء في الخدمة وكان الراوتر بيفصل ويشتغل لوحده
واتصلت بهم والمشكلة اتحلت في ثلاثة أيام لا أكثر

ثم جاءت المشكلة التي جعلتني أقرر بأنني سوف أغير الشركة

المشكلة إن النت أصبح بطيء
بدل ما الخط 1 ميجا .. يصبح 512 وأحياناً 220
وأحياناً الإنترنت يفصل ويشتغل لوحده

واتصلت بهم أكثر من 20 مرة بمعدل مرتين أو ثلاثة في اليوم
ده غير الشات على النت في الأيام الأخيرة
والكلام حفظينه

افصل الراوتر 10 ثواني وشغله تاني
ولما كنت بعمل كدة النت يرجع بسرعته الطبيعية وبعد كدة يقل تاني

ويقولولي

شيل الاسبلتر يا فندم ابعد الخط اللي جاي من تحت عن سلك دش أو ضغط عالي
وجرب توصل من السلك الرئيسي على طول وجرب تغير الراوتر وجرب تغير السلك

وأنا كنت متأكد إن المشكلة مش من عندي

المهم عملت كل اللي بيقولوا عليه ده
وغيرت 3 راوترات
وكل ده مش راضيين يصعدوا المشكلة

ويعد 9 أيام متواصلة تم تصعيد المشكلة أخيراً وسيتم حلها في خلال 48 ساعة

بعد اليوم الأول
واليوم الثاني

واحد اتصل الظهر بي قال لي أنا من شركة TEData وجاي لحضرتك
هي المشكلة لسه عند حضرتك

قلت له مش عارف هي الساعة 12 بالليل امبارح النت متهيألي اتظبط
بس تعالى برضو شوف يمكن في حاجة من عندي
عشان نتأكد

المهم جالي ونزلت له السلم وشاف البوكس من تحت
ولقى السلك بتاعي بعيد خالص عن السلوك ومتوصل كويس
وطلعنا المنزل وشاف السلك وشاف التليفون وشاف كل حاجة

واتصل بالمهندس بتاعه في الشركة وقال له العميل كل حاجة عنده مظبوطة
وخد اللي فيه النصيب
وقال لي لأ يافندم الخدمة مجانية بس انا رضيته

المهم المشكلة اتحلت

كنت أثناء المشكلة اتصلت بهم قلت لهم أنا المفروض أخد الأيام دي
عشان انتم اللي مرضيتوش تصعدوا المشكلة
وكنتم بتقول لي المشكلة من عندك وطلعت مش من عندي


المهم قالوا لي ساعتها طبعاً يا فندم
بس نتأكد من حل المشكلة وتبقى تتصل بقسم المبيعات تقول لهم
على التعويض

بعد حل المشكلة اتصل بقسم المبيعات يقولولي التعويض تم إرساله لقسم الدعم الفني
للتأكد وكلمنا بعد خمس أيام

كلمتهم بعد خمس أيام
قالوا لي لك يوم واحد تعويض

قلت لهم ازاي بقى !!!
وأنا متصل 30 مرة
خلال 10 أيام

قالوا لي كل الاتصالات اللي انت كنت بتتصل بها
كانت المشكلة بتتحل في ساعتها
وبتوع الدعم الفني هما اللي كاتبين كدة

ممكن أحولك للدعم الفني


قلت لها حوليني

رد عليا واحد من الدعم الفني
واديتوا اللي فيه النصيب وكله بالاحترام

قال لي يا فندم زي ما مكتوب أمامي فعلاً المشكلة كانت بتتحل في ساعتها

المهم قعدت أزعق معاهم وبتاع وقلت لهم انت هت***وني لبعض

المهم قلت لهم حسبي الله ونعم الوكيل

وقلت مش مشكلة بس النت يتظبط وخلاص

وجاءت المفاجأة بعد أسبوعين من حل المشكلة النت بطء تاني

وبمجرد ما بطأ

اتصلت بالشركة وقلت لهم افصلولي

ليه يا فندم ومش ليه

قلت له شوف النت سرعته عندك كام
وأنا مشترك على سرعة كام

راح قايلي إيه تخيلوا .. الكلمة المشهورة

طيب ممكن نتخذ بعض الخطوات

قلت له
الحكايات دي انا عارفها
افصل الراوتر 10 ثواني
وصل من غير اسبليتر
ابعد السلك عن أي سلك دش أو ضغط عالي
جرب راوتر تاني

قلت له انا فضلي 3 أيام
الحمد لله إن النت بطء تاني عشان مكنتش اشترك على الفاضي

وقلت له المشكلة ولا من عندي ولا انت هتعرف تحل المشكلة من عندك

المشكلة إن الشركة بقى عليها ضغط .. وهي هي الخطوط
مفيش تدعيم لخطوطها

والحل الوحيد إني أغير الشركة بعد خمس سنين

قال لي يا فندم ده شرف لينا وانت عميل وما نقدرش نسيبك

قلت له طيب عندك حل تاني !!

المشكلة هتفضل طول ما في ضغط والشركة ما بتعملش حاجة

الأعداد بتتزايد والخطوط هي هي
والحمل بيزيد

ملحوظة:
شركة TEData ليست سيئة ، فهي تعتبر من أكبر وأشهر الشركات
لكنها في بعض المناطق ، الضغط بيبقى عليها كبير
وللأسف النقطة دي مش في اهتمام الشركة


فالمهم دلوقتي أنا هفصل

فكنت عاوز أشوف إيه أحسن شركة في سنترال المطرية
يكون الضغط عليها خفيف

فودافون مثلاً
أو اتصالات
أو غيرهم (بس لينك لأ)






أنا مايل لاتصالات

:ah4:
بس أنا عاوز اشترك غير محدود
هل فودافون فيها سرعات غير محدودة؟

فتنصحوني بإيه؟

[عبدالرحمن زكريا]

الله يكرمكم .. أنا هفصل بعد الغد إن شاء الله

وعاوز أوصل في أسرع وقت مع أي شركة ثانية

ياريت تفيدوني لو حد عنده معلومات

[محمد البرديسى]

يا اخى الكريم تعتبر tedata افضل شركة على الاطلاق بدون منازع بس تتمتع برتفع السعر وضعف العروض وخدمة ممتازة بخلاف دى لينك عروض ممتازة وخدمة تعبانة قوى

على فكرة ممكن تكون مشكلة ضغط فى السنترال
هل جربت بتغير سلك التليفون الى فى البوكس

[mahmoud20070]

انا بردك عندى معانه قريبه منك بردك وهى ان سرعتى 512 لكن بحمل اوقات بسرعه ممكن توصل ل 12 كيلوبايت فى الثانيه وممكن اقل كمان

وللاسف مبقدرش احمل بكامل سرعتى الا من المواقع اللى بتستخدم كل بورتات او منافذ الاتصال زى موقع جمبوفايلز وموقع ميديافير قبل طبعا ميتنيلوا دلوقتى وحاولت والله مرارا وتكرار اعمل خطواتك ديه ومفيش امل بس انا محدش جالى بقه لانى نفضت بصراحه وزهقت وحقولك ليه

للاسف ممكن تجد نفس مشكلتك فى اى شركه تانيه لان تى اى داتا مش عندها المشكله المشكله بتبقى فى السنترال نفسه السنترال بيبقى فى اجهزه اللى بتوصلنا النت والاجهزه ديه ممكن تعطل ممكن يحصلها زى مقولت ضغط وهكذا فبتحتاج صيانه او تغير او توسيع وهكذا وبالتالى زى مقولتلك العيب مش فى الشركه انت ممكن تشترك فى اى شركه تانيه وللاسف حتبقى زباله بردك والله اعلم لان بردك عندهم اجهزه فى نفس السنترال فلذلك انا راى العيب مش فى الشركه خصوصا ان تى اى داتا فعلا شركه كبيره جدا وافضل من الشركه المنافسه ليها بتاعت لينك

بس العيب صدقنى فى النت عندنا فى مصر زفت سواء اسعار او كخدمه زفت زفت يعنى للاسف عموما جرب ياريس الحلول ولو واحد جيه معاك وبقه تمام اكتبهولنا بردك بس زى مقولت انا راى مش ان العيب مش فى الشركه نفسها ده فى السنترال

صحيح كمان جرب تتصل باللى اسمه الجهاز القومى لتنظيم الاتصالات ده بردك بيعمل مع الشركات كلها بتاعت الاتصالات سواء اتصال عادى او نت شغل وبيخليهم يهتموا بالعميل فانت اتصل بيهم كده وقولهم كمان على الشك اللى انا قولتك ان جايز يكون العيب فى الاجهزه بتاعت السنترال نفسه مش من عندك ولا من الشركه لان الشركه اغلب شغلها فى الاعدادت بس مش فى اسلاك وحاجات زى كده وده رقم الجهاز القومى لتنظيم الاتصالات 155

[mahmoud20070]

يا اخى الكريم تعتبر tedata افضل شركة على الاطلاق بدون منازع بس تتمتع برتفع السعر وضعف العروض وخدمة ممتازة بخلاف دى لينك عروض ممتازة وخدمة تعبانة قوى

على فكرة ممكن تكون مشكلة ضغط فى السنترال
هل جربت بتغير سلك التليفون الى فى البوكس

ده راى بردك والله وانا نفسى عندى احساس ان مشكلتى بسبب كده بس بخصوص الاسعار الاسعار تقريبا واحده فى كل الشركات لان من الاخر الحكومه شكلها هى اللى بتحددلها

يعنى مثلا سرعتى بتاعت 512 بدفعلها 95 جنيه فى الشهر حتلاقيها فى لينك بتاع بردك كده او اقل او ازيد خمسه جنيه وهكذا فى بقيه السرعات

اما موضوع العروض فديه حاجه نسبيه يعنى مش علطول بتحصل عموما ربنا يرحمنا من خدمه النت الزفت ديه عندنا فى البلد كلها مش فى الشركات بس

[عبدالرحمن زكريا]

بصوا كدة على الصور دي وقولوا لي ليا حق افصل ولا لأ

دي صورة النت فصل فيها .. Down >> وكانت السرعة 725



دي صورة كان النت شغال .. PVC Status : Up >> وكانت السرعة 85



ودي صورة للنت شغال والسرعة 309



ودي صورة للنت لما بيكون شغال بسرعة طبيعية 1024



بارك الله فيكم
بس على فكرة يا جماعة أنا ما قلتش إن شركة TEData مش حلوة
وبعدين هي مش غالية ولا حاجة .. نفس الأسعار تقريباً بفروقات بسيطة في السرعات الغير محدودة
وكمان أنا ما جيبتش سيرة Link (مش هشترك فيها أصلاً)

المشكلة إن شركة TEData في المنطقة بتاعتي .. الناس كلها موصلة منها
وده بيعمل ضغط

إنما أنا لو نقلت شركة ثانية .. الضغط بتاعها خفيف
النت هيتظبط

ده على حسب المنطقة ..
يعني مثلاً ممكن تلاقي في القرى مثلاً مفيش ناس موصلين نت كتير
فلو اشتركت في أي شركة هتلاقي النت كويس

إنما في منطقتي كله موصل من TEData حتى السايبرات

عشان كدة كنت عاوز أغير لشركة ثانية ( اتصالات أو فودافون ) أو أي شركة
وكنت عاوز أعرف تجارب المشتركين في فودافون واتصالات في المنطقة بتاعتي وفي الخدمة عموماً
بس ما تكونش Link عشان أنا مقاطع منتجات صاحب الشركة

ودي أسعار TEData << اللي هسيبها إن شاء الله

ودي أسعار Vodafone >> ياريت حد يقول لنا فيها سرعات غير محدودة ولا لأ !!
عشان مفيش في الموقع سرعات غير محدودة

ودي أسعار etisalat << وانا مايل لشركة اتصالات بصراحة

[عبدالرحمن زكريا]

للأسف اتصلت بشركة فودافون .. ومفيش سرعات غير محدودة

كدة مفيش غير اتصالات .. بس كنت عاوز أسأل الناس المشتركة في اتصالات واللي جربوها



لو حد مشترك في اتصالات أو عنده أي معلومة مفيدة عن شركة ثانية .. ياريت يجاوبني


جزاكم الله خيراً

[عبدالرحمن زكريا]

اتصلت باتصالات كمان .. قالوا لي نفس الكلام

واضح إن شركة اتصالات وفودافون يطبقون سياسة الأستخدام العادل



مش عارف أعمل إيه .. شكلي هفضل مع تي إي داتا كمان شهر وأشوف أخرتها

ولو النت لقيته وحش .. هشوف بقى اشترك مع فودافون أو اتصالات

الله المستعان

[mohammed_kamal]

https://www.imholding.com/arabic-version/adsl.html

شركه فى الخباثه ممتازه ومعلهاش احمال

[عبدالرحمن زكريا]

https://www.imholding.com/arabic-version/adsl.html

شركه فى الخباثه ممتازه ومعلهاش احمال

جزاك الله خيراً

طبعاً شركة معروفة بتاعة تقريباً أحمد بهجت

بس المشكلة إن الشركة دي كانت كويسة بس زمان

مش عارف دلوقتي إيه ظروفها

لأن أحمد بهجت أعتقد كان في مشاكل على ممتلكاته وأحكام وكدة

وعموماً أنا اتصلت بالشركة .. واحد رد عليا على طول وزي ما يكون مفيش غيره اللي موجود

وبيقول لي نبعتلك المندوب يوصلك بكرة يا فندم .. شكله عاوز يخلص

قلت له لأ أصل أنا لسه ما فصلتش

مش عارف أنا مستريحتلهاش الشركة دي



ممكن لو حد عنده خلفية عن الشركة ومشترك فيها يدينا معلومات

وشركة TEData اتصلت بها عشان بطأ النت وقالوا لي خلال 48 ساعة سيتم الإصلاح
إن شاء الله .. لما نشوف أخرتها


الصبر جميل

[mohammed_kamal]

https://www.nooradsl.com/ar/pricing.htm

تابع برده نور دى اس ال عروضهم كويسه ... على فكره كل ما كانت الشركه مش معروفه لا سف بتلاقى الخدمه كويسه

[mohammed_kamal]

شركه im فى الاساس كانت ايجى نت ويكفى ان اقول لك ايجى نت كان الانترنت الواحد ميجا منها كافى ل20 مشترك على شبكه واحده

تى داتا عموما ارها شركه غير خبيره حتى لو كانت الخدمه سريعه الاصل لنك وايجى نت ... اجهزه تى داتا فى السنترال صينى هواواى

[عبدالرحمن زكريا]

نسيت أقول لكم النتيجة النهائية

تم حل المشكلة بإرسال مندوب من الدعم الفني للمرة الثانية من TEData
وقام بتوصيل راوتري من البوكس من تحت ووجد أن النت بطيء برضو
ثم قام بتوصيل راوتر معه للتأكد واتصل بالدعم في الشركة
قالوا له النت بطيء برضو

وكدة يبقى طرفين السلك اللي في البوكس عاوزين يتغيروا

وقال لي واحد من السنترال هيجيلك يغير مكان الأرجيه في البوكس على مكان تاني
واتصلت بالسنترال وقالوا هيبعتوا واحد
وبالفعل واحد من السنترال جاء بعدها بيوم
يوم الجمعة
21/9/2012
وغير مكان تليفوني في البوكس
وتم حل المشكلة
والنت بقى كويس

:ah17:

تم بحمد الله

[mahmoud20070]

نسيت أقول لكم النتيجة النهائية

تم حل المشكلة بإرسال مندوب من الدعم الفني للمرة الثانية من TEData
وقام بتوصيل راوتري من البوكس من تحت ووجد أن النت بطيء برضو
ثم قام بتوصيل راوتر معه للتأكد واتصل بالدعم في الشركة
قالوا له النت بطيء برضو

وكدة يبقى طرفين السلك اللي في البوكس عاوزين يتغيروا

وقال لي واحد من السنترال هيجيلك يغير مكان الأرجيه في البوكس على مكان تاني
واتصلت بالسنترال وقالوا هيبعتوا واحد
وبالفعل واحد من السنترال جاء بعدها بيوم
يوم الجمعة
21/9/2012
وغير مكان تليفوني في البوكس
وتم حل المشكلة
والنت بقى كويس

:ah17:

تم بحمد الله

الف مبروك وان شاء الله يعمل معاك علطول بس على كده الشركه هى قادره انها تبعت مندوب فنى فعلا وتتواصل مع السنترال امال ليه دايما بيقولوا ان الراجل بتاع الدعم الفنى حيلعب فى شويه اعدادت بس فى الجهاز المهم ادينا عرفنا اللى فيها اى حد لاقدر الله توجهه مشكله يعقد يتصل ويزن ويرخم على الشركه ويقلب الدنيا هما مع الاسف مبيجوش الا بكده

[هوباهوبا]

انترنت مصر IM هي احسن شركه موجودة دلوقتي وهي مش بتاعت احمد بهجت ولا حاجه وعندهم سرعات لحد 4 ميجا وكله انليمتيد ومابيطبقوش الاستخدام العادل اللي بتطبقه تي اي داتا واتصالات وفودافون وانا مشتركه معاهم علي سرعه 2 ميجا ومشغله بيها حوالي 15 فرد معايا ده غير الوايرلس والناس محترمين جدا والدعم الفني عندهم 24 ساعه وبيحلولك اي مشكله حتي لو كانت مش بتاعتهم وكل فترة عندهم عروض علي الدفع وعندهم عروض دلوقتي اعتقد خصم 50% لمده 6 شهور وممكن تتاكد برضه من العرض ده وكلمهم علي 19910