مشكلة الالعاب الاون لين مع الواى فاى

**RVD150** · 22-09-2016, 16:40

انا دلوقتى عندى واى فاى و معايا جاهز اندرويد دلوقتى بقى لما اجى العاب لعبة اون لين بلاقى ال ping بيوصل 50000 و حاجات زى كدا مع ان النت لوحدى و السرعة 1 ميجا و مع شركة tedata انا مش فاهم يعنى هما منعو الالعاب الاون لين فى مصر ولا اى بضبط ياريت حد يقولى

**RVD150** · 23-09-2016, 00:42

اية حل موضوع دة ؟؟؟؟

**kahled15486** · 23-09-2016, 16:37

بص البنج بيزيد بسبب داخلى او خارجى

داخلى دة عند حضرتك - يعنى يكون فى برامج فى خلفية الجهاز بتستهلك الانترنت فبتزود البنج زى الانتى فيروس او ان الوندوز بيعمل ابديت ... الخ
وبما انك بتستخدم الواى فاى ممكن يكون بسبب المسافة بينك وبين الروتر او وجود حوائط وخراسانة بين الجهاز والروتر

اسباب خارجية - زى كابل التليفون يكون مقطع او مكشوف - الاسبلتر يكون بايظ او من نوعية رديئة - او اسباب خاصة بالشركة ودة بيبقى بسبب ضغط المشتركين على اجهزة الشركة فى السنترال -

عامة انا كان عندى مشكلة مع تى اى داتا فى 2009 بسبب الموضوع دة وكان السبب من عندهم- بس اى شركة هتقولها كلمة "البنج عالى" هيقولك احنا مبندعمش الالعاب الاونلاين - فريح نفسك واتأكد الاول المشكلة منين ولو طلعت من الشركة شوف الناس اللى فى نفس منطقتك مشتركين مع شركات تانية وشوف البنج عندهم اد اية - والشركة اللى يطلع عندها البنج كويس حول ليها

ولكن تنبية للمرة التانية - الكلام دة اذا اتأكدت ان مفيش اى مشكلة عندك ولا فى خط التليفون ولا الكابلات الخارجية ولا السنترال - يعنى تتأكد 100% ان المشكلة من السنترال

**RVD150** · 23-09-2016, 21:07

انا متاكد ان المشكلة مش من عندى ولا من الكابلات ولا اى حاجة انا اتصلت بيهم قالولى احنا لغينا الاتصال على النت فا دة اثر على الالعاب الاون لين

**kahled15486** · 23-09-2016, 22:16

المشاركة الأصلية كتبت بواسطة RVD150

انا متاكد ان المشكلة مش من عندى ولا من الكابلات ولا اى حاجة انا اتصلت بيهم قالولى احنا لغينا الاتصال على النت فا دة اثر على الالعاب الاون لين

لو الشركة هى سبب المشكلة - ممكن تروح تتكلم مع حد من الدعم الفنى فى الشركة بشكل مباشر وان رفض المساعدة او انتهى الموضوع الى ان يبقى الموضوع كما هو علية - يبقى الغى التعاقد معاهم واتعاقد مع شركة تانية

**RVD150** · 24-09-2016, 00:39

انا تبع شركة tedata اتصلت بى الدعم الفنى قالى فى حاجة اتعملت بتمنع الاتصال عن طريق الانترنت و الكلام دة اطبق على كل الشركات فى مصر و دة قصر على الالعاب الاون لين كمان يعنى ولا فى اتصال ولا فى العاب النت فقط شات و تصفح و دون لود بقولو يعنى النت كدا بقى مافهوش العاب اون لاين ازاى يعنى ما انا مشترك فى النت لية قالى ملناش دعوة احنا ممكن حضرتك تتابع مع شركة الاتصالات العامة فى مصر

**kahled15486** · 24-09-2016, 00:46

المشاركة الأصلية كتبت بواسطة RVD150

انا تبع شركة tedata اتصلت بى الدعم الفنى قالى فى حاجة اتعملت بتمنع الاتصال عن طريق الانترنت و الكلام دة اطبق على كل الشركات فى مصر و دة قصر على الالعاب الاون لين كمان يعنى ولا فى اتصال ولا فى العاب النت فقط شات و تصفح و دون لود بقولو يعنى النت كدا بقى مافهوش العاب اون لاين ازاى يعنى ما انا مشترك فى النت لية قالى ملناش دعوة احنا ممكن حضرتك تتابع مع شركة الاتصالات العامة فى مصر

لو تقصد ان موظف الشركة قالك انهم لغو بروتوكول VOIP فدة مش فى كل الشركات - لان انا فى لينك وما زلت بستخدم الخدمة من خلال برنامج Team Speak - والالعاب مش بتشتغل على البروتوكول دة - ولو فية بروتوكول اتلغى ومتعلق بتشغيل اللعبة فلن يكون هناك اى اتصال مع سيرفير اللعبة

ارتفاع البنج - ممكن يكون مشكلة من الشركة لكن الموظف اللى بيرد عليك ربط اى حاجة باى حاجة -

من واقع تجربتى فعلاً شركة TEdata من اسوأ الشركات فى مصر - خصوصة ان هيا والمصرية للاتصالات بقو حاجة واحدة وعايزين يحتكرو النت

جرب تشغل اللعبة على خط انترنت تانى عند اى حد من اصحابك فى المنطقة يكون متعاقد مع شركة تانية زى لينك - لو البنج كان مناسب انقل للشركة التانية

**RVD150** · 24-09-2016, 01:14

تمام حضرتك من رايك اروح مع شركة لينك صح كدا

**kahled15486** · 24-09-2016, 01:16

المشاركة الأصلية كتبت بواسطة RVD150

تمام حضرتك من رايك اروح مع شركة لينك صح كدا

انا مقصدش ان حضرتك تغيير وتجرب - التغيير هياخد وقت - بس بما ان هدفك هو تشغيل اللعبة

جرب تشغل اللعبة عند حد من اصحابك او جيرانك فى نفس المنقطة- مشتركين فى شركة لينك - ولو اللعبة اشتغلت تمام والبنج كان مظبوط - انقل لشركة لينك

**RVD150** · 24-09-2016, 01:22

تمام

**kahled15486** · 24-09-2016, 01:27

المشاركة الأصلية كتبت بواسطة RVD150

طيب هو فى حاجة مش فاهمها ال voip دة مش المفروض وقف الاسكاى بى و الماسنجر و كل دة طيب ما انا بستعمل البرامج دى عادى جدا و شغالة زى الفل مش فاهم حاجة بصراحة

VOIP = Voice Over IP
ودة برتوكول نقل الصوت على ما اتذكر - وكان فية خبر انتشر على الانترنت - كان اول مرة اشوفة على الفيس بوك - بيقول ان شركات المحمول هتلغى الخدمة دى لاسباب امنية - طبعاً علشان البروتوكول دة بيستخدم من النت وبيقلل استهلاك المشتركين للخدمات المكالمات العادية - وبعدها بفترة ظهر نفس الخبر ولكن على شركات الانترنت (TEdata و Link ) - وحتى الان انا غير متأكد من الموضوع هل تم فعلاً فى شركة TEdata ولا دة مجرد فبركة اعلام - بس ناس كتير زى حضرتك قالو ان خدمة العملاء قالو انهم لغو فعلاً خدمة ال VOIP - لكن الحقيقة فين الله اعلم (انت فى مصر :D )